বেংগালুৰুৰ উপকণ্ঠ অঞ্চলৰ মডাপট্টন গাঁৱত অৱস্থিত এটা শিলৰ খনিত বৃহস্পতিবাৰে এটা বৃহৎ শিল খহি পৰাৰ ফলত সাতজন শ্ৰমিকৰ মৃত্যু হোৱাৰ লগতে অন্য পাঁচজন শ্ৰমিক গুৰুতৰভাৱে আহত হৈছে। কাবেৰী কোম্পানীৰ মালিকানাধীন এই খাদটোৰ ওপৰৰ অংশত এক্সকেভেটৰ ব্যৱহাৰ কৰি খনন কাৰ্য চলাই থকাৰ সময়তে প্ৰায় ৪০ ফুট উচ্চতাৰ পৰা শিলটো খহি তলত কাম কৰি থকা শ্ৰমিকসকলৰ ওপৰত পৰে। দুৰ্ঘটনাগ্ৰস্ত শ্ৰমিকসকল মূলতঃ মধ্যপ্ৰদেশ আৰু ছত্তীশগড়ৰ নিবাসী বুলি জানিব পৰা গৈছে।
খনিটোত কাম কৰি থকা এজন শ্ৰমিকে সংবাদ মাধ্যক জনোৱা মতে, ঘটনা সংঘটিত হোৱাৰ সময়ত স্থানডোখৰত প্ৰায় ১৮ জন শ্ৰমিক উপস্থিত আছিল। দুৰ্ঘটনাৰ খবৰ পোৱাৰ লগে লগে আৰক্ষীৰ দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। ধ্বংসস্তূপৰ মাজত আৱদ্ধ হৈ থকা কেইবাজনো লোকক আৰক্ষী আৰু উদ্ধাৰকাৰী দলে সুৰক্ষিতভাৱে উদ্ধাৰ কৰিবলৈ সক্ষম হয়। জ্যেষ্ঠ বিষয়াসকলৰ তত্ত্বাৱধানত বৰ্তমানো উদ্ধাৰ আৰু অনুসন্ধান অভিযান অব্যাহত আছে আৰু দুৰ্ঘটনাটোৰ প্ৰকৃত কাৰণ জানিবলৈ প্ৰশাসনৰ তৰফৰ পৰা প্ৰচেষ্টা চলোৱা হৈছে। প্ৰশাসনে ইতিমধ্যে নিহতোৰ পৰিয়ালবৰ্গৰ সৈতে যোগাযোগ কৰি খবৰ দিয়াৰ ব্যৱস্থা গ্ৰহণ কৰিছে।
এই শোকাৱহ ঘটনা সন্দৰ্ভত প্ৰতিক্ৰিয়া প্ৰকাশ কৰি কৰ্ণাটকৰ মুখ্যমন্ত্ৰী ডি কে শিৱকুমাৰে মাগাদি ৰোডৰ সমীপত সংঘটিত এই অঘটনক অতি দুৰ্ভাগ্যজনক বুলি অভিহিত কৰে। তেওঁ জনায় যে প্ৰশাসনিক বিষয়াসকল ঘটনাস্থলীত উপস্থিত আছে আৰু প্ৰাথমিক প্ৰতিবেদন অনুসৰি এয়া কোনো বিস্ফোৰণৰ ফলত হোৱা নাই, বৰঞ্চ মাটিৰ খহনীয়াৰ বাবেহে সংঘটিত হৈছে। খাদটোত নিৰ্ধাৰিত চৰকাৰী নীতি-নিয়ম মানি খনন কৰা হৈছিল নে নাই সেই বিষয়ে এক বিতং প্ৰতিবেদন বিচৰা হৈছে বুলি মুখ্যমন্ত্ৰীগৰাকীয়ে স্পষ্ট কৰি দিয়ে। ভৱিষ্যতে যাতে এনে ঘটনাৰ পুনৰাবৃত্তি নঘটে তাৰ বাবে সমগ্ৰ ৰাজ্যতে এনেধৰণৰ খনন কাৰ্যৰ বাবে চৰকাৰে শীঘ্ৰেই নতুন নিৰ্দেশনা জাৰি কৰিব বুলিও তেওঁ আশ্বাস প্ৰদান কৰে।
