দিল্লী উচ্চ ন্যায়ালয়ে টিভি টুডেৰ জ্যেষ্ঠ সাংবাদিক অঞ্জনা ওম কাশ্যপ আৰু জনপ্ৰিয় শিক্ষক ফৈজল খান ওৰফে খান ছাৰৰ মাজত চলি থকা মানহানিৰ গোচৰটো মধ্যস্থতাৰ বাবে প্ৰেৰণ কৰিছে। এই গোচৰৰ শুনানি গ্ৰহণ কৰি বিচারপতি তুষাৰ ৰাও গেডেলাই কয় যে এই বিবাদৰ সমাধান দুয়োপক্ষৰ যৌথ সন্মতিৰে কৰিব পৰা যাব। আদালতে এই গোচৰটো বৃহস্পতিবাৰে বিয়লি ৪ বজাত মধ্যস্থতাৰ বাবে তালিকাভুক্ত কৰাৰ নিৰ্দেশ দিয়ে। আদালতে স্পষ্টকৈ কয় যে যি ক্ষতি হ’ব লগা আছিল সেয়া ইতিমধ্যে হৈ গৈছে, গতিকে এতিয়া দুয়োপক্ষই বিবাদ বৃদ্ধি কৰাৰ পৰিৱৰ্তে এক শান্তিপূৰ্ণ সমাধানৰ দিশত খোজ পেলোৱা উচিত।
শুনানিৰ সময়ত দিল্লী উচ্চ ন্যায়ালয়ে উল্লেখ কৰে যে দুয়োপক্ষই আলোচনাৰ জৰিয়তে এই সমগ্ৰ সমস্যাটো সমাধান কৰিব পাৰিব বুলি অনুভৱ হৈছে। কোনো অভিজ্ঞ মধ্যস্থতাকাৰীৰ সহায় ল’লে এই ক্ষেত্ৰত এক ইতিবাচক বুজাবুজি হ’ব পাৰে বুলি আদালতে বিশ্বাস কৰে। এই কথা লক্ষ্য ৰাখিয়েই আদালতে জ্যেষ্ঠ অধিবক্তা ৰাজশেখৰ ৰাওক এই গোচৰৰ মধ্যস্থতাকাৰী হিচাপে নিযুক্তি দিয়ে। ন্যায়াধীশে লগতে কয় যে কেতিয়াবা কিছুমান কথা কোৱাটো উচিত নহয় আৰু কাৰোবাক সমালোচনা কৰাৰো এক সীমা বা মৰ্যাদা থকা উচিত। তেওঁ উল্লেখ কৰে যে প্ৰতিক্ৰিয়াসমূহ হয়তো পূৰ্বে কোৱা কথাবোৰৰ বাবেই আৰম্ভ হৈছে, কিন্তু তেওঁলোকেও এনেধৰণৰ ভাষা ব্যৱহাৰ কৰাটো অনুচিত আছিল আৰু সেই আপত্তিজনক অংশসমূহ আঁতৰাই পেলালে ভাল হ’ব।
আদালতত শুনানি চলি থকাৰ সময়ত অঞ্জনা ওম কাশ্যপ আৰু টিভি টুডে নেটৱৰ্কৰ তৰফৰ পৰা কোৱা হয় যে ছচিয়েল মিডিয়াত একাংশ শিক্ষকে কৰা পোষ্টসমূহ তেওঁলোকৰ ভাৱমূৰ্তি যথেষ্ট ক্ষুণ্ণ কৰিছে। তেওঁলোকৰ অধিবক্তাই এই পোষ্টসমূহৰ ওপৰত অন্তৱৰ্তীকালীন নিষেধাজ্ঞা জাৰি কৰিবলৈ আদালতক অনুৰোধ জনায়। ইয়াৰ উপৰিও অভিযোগ কৰা হয় যে খান ছাৰে সাংবাদিকগৰাকীৰ সন্তানৰ বিদ্যালয়ৰ নাম ৰাজহুৱা কৰি দিয়াৰ পিছত তেওঁলোকৰ পৰিয়ালটোলৈ প্ৰাণৰ ভাবুকি আহিবলৈ ধৰিছে। সেয়েহে তেওঁলোকে ল’ৰা-ছোৱালীৰ সৈতে জড়িত সকলো তথ্য অতি সোনকালে ছচিয়েল মিডিয়াৰ পৰা আঁতৰাবলৈ দাবী জনায়।
আনহাতে খান ছাৰৰ তৰফৰ পৰা আদালতক জনোৱা হয় যে ছচিয়েল মিডিয়াত অঞ্জনা ওম কাশ্যপৰ সন্তানৰ সৈতে জড়িত যিবোৰ তথ্য শ্বেয়াৰ কৰা হৈছে, সেই সকলোবোৰ সোনকালেই আঁতৰাই দিয়া হ’ব। তেওঁলোকৰ অধিবক্তাই কয় যে শিশুসকলক এই সমগ্ৰ বিবাদৰ পৰা আঁতৰাই ৰখা উচিত। ইয়াৰ লগতে তেওঁলোকে আদালতক কয় যে কেৱল তেওঁলোকৰ ফালৰ পৰাই নহয়, বৰঞ্চ অঞ্জনা ওম কাশ্যপৰ তৰফৰ পৰাও যাতে বিবাদ বৃদ্ধি কৰিব পৰা কোনো কথা কোৱা নহয়, তাৰ ওপৰত গুৰুত্ব দিব লাগে।
এই সমগ্ৰ বিবাদটোৰ আৰম্ভণি হৈছিল নীট পৰীক্ষাক লৈ অনুষ্ঠিত হোৱা এটা লাইভ তৰ্ক অনুষ্ঠানৰ পিছত। অভিযোগ অনুসৰি এই আলোচনাৰ সময়ত অঞ্জনা ওম কাশ্যপে অনলাইনযোগে পাঠদান কৰা একাংশ শিক্ষকৰ বিৰুদ্ধে তীব্ৰ মন্তব্য কৰিছিল, যাৰ পিছতে খান ছাৰকে ধৰি কেইবাজনো শিক্ষকে ছচিয়েল মিডিয়াৰ জৰিয়তে ইয়াৰ প্ৰত্যুত্তৰ দিছিল। ইয়াৰ পিছতে অঞ্জনা ওম কাশ্যপ আৰু টিভি টুডে নেটৱৰ্কে শিক্ষকজনৰ বিৰুদ্ধে ২ কোটি টকাৰ মানহানিৰ গোচৰ ৰুজু কৰে আৰু ছচিয়েল মিডিয়াৰ পৰা আপত্তিজনক শব্দ তথা পোষ্টসমূহ আঁতৰাবলৈ দাবী জনায়। এই গোচৰটোৰ পৰৱৰ্তী শুনানি অহা ৯ জুলাইত অনুষ্ঠিত হ’ব।
