পৰ্তুগালৰ বিৰুদ্ধে অন্তিম-১৬ৰ মেচত য’ত শেষ কৰিছিল, বেলজিয়ামৰ বিৰুদ্ধে কোৱাৰ্টাৰ ফাইনেলত তাৰ পৰাই যেন আৰম্ভণি কৰিলে মাইকেল মেৰিনোৱে। তেওঁ শেষ মুহূৰ্তত পৰিৱৰ্ত হিচাপে নামি গ’ল দি পূৰ্বৰ মেচখনত স্পেইনক কোৱাৰ্টাৰ ফাইনেললৈ লৈ আনিছিল। এইবাৰ একে নাটকৰ পুনৰাবৃত্তি কৰি বেলজিয়ামক ২-১ গ’লত পৰাস্ত কৰি ১৬ বছৰৰ পাছত বিশ্বকাপৰ ছেমি ফাইনেললৈ লৈ গ’ল লা ৰোজাৰ বাহিনীক।
শুকুৰবাৰে নিশা লছ এঞ্জেলছত অনুষ্ঠিত হোৱা ৰোমাঞ্চকৰ কোৱাৰ্টাৰ ফাইনেলত স্পেইনৰ হৈ ফেবিয়ান ৰুইজ আৰু মাইকেল মেৰিনোৱে গ’ল দিয়ে। বেলজিয়ামৰ হৈ চাৰ্লছ ডি কেটেলাৰে একমাত্ৰ গ’লটো দিয়ে। ১৪ জুলাইত ছেমি ফাইনেলত লুইছ ডি লা ফুয়েণ্টেৰ দলটোৱে ফ্ৰান্সৰ বিৰুদ্ধে খেলিব।
খেলখনৰ আৰম্ভণিৰে পৰাই স্পেইনে নিয়ন্ত্ৰণ আৰু আক্রমণত আধিপত্য বিস্তাৰ কৰিছিল৷ লেমিন ইয়ামাল, ডানি অলমো, ফেৰাণ টৰেছে ইটোৰ পিছত সিটোকৈ আক্ৰমণ চলাইছিল যদিও থিবাউট ক’ৰ্টোৱাই বেলজিয়ামৰ গ’লপোষ্টৰ তলত দেৱালৰ দৰে থিয় হৈ আছিল।
অৱশেষত ৩০ মিনিটত স্পেইনে এটা গ’ল দিয়ে। পেড্ৰ’ প’ৰ’ই ইয়ামালৰ সৈতে এটা দুৰ্দান্ত ৱান টু খেলি বলটো ডানি অলমোক পাছ কৰে। ক’ৰ্টোৱাই প্ৰথমে অলমোৰ লো শ্বটটো ব্লক কৰে। কিন্তু ফেবিয়ান ৰুইজে ৰিটাৰ্ণ বলত সুযোগ নষ্ট নকৰিলে।
পাঁচ মিনিটৰ পাছত ক’ৰ্টোৱাই পুনৰ অসাধাৰণ দক্ষতাৰে ইয়ামালৰ দুৰন্ত ফ্ৰী কিকটো ব্লক কৰে।
স্পেইনৰ একেৰাহে আক্ৰমণৰ পিছতো বেলজিয়ামে এটা সুযোগৰ বাবে অপেক্ষা কৰি আছিল। ৪১ মিনিটত চাৰ্লছ ডি কেটেলাৰে সেই সুযোগ কামত লগায়।
কেভিন ডি ব্ৰুইনৰ নিখুঁত ক্ৰছৰ গোলৰ সন্মুখত হেড কৰি উনাই চাইমনক পৰাস্ত কৰে। প্ৰথমাৰ্ধ ১-১ গ’লত ড্ৰ’ত সমাপ্ত হয়।
দ্বিতীয়াৰ্ধতো স্পেইনে আক্ৰমণাত্মক চোক হ্ৰাস কৰা নাছিল। ৫৮ মিনিটত দীৰ্ঘ দূৰত্বৰ শ্বটত ক’ৰ্টোৱাই ইয়ামালক হতাশ কৰে। তাৰ পাছত ৬১ মিনিটত একক প্ৰচেষ্টাৰে আন এটা গ’লৰ সুযোগ সৃষ্টি কৰে যদিও বেলজিয়ামৰ গ’লৰক্ষকগৰাকীয়ে এটা ডাঙৰ ছেভ কৰে।
আনহাতে স্পেইনৰ গ’লৰক্ষক উনাই চাইমনে ডি ব্ৰুইনৰ শ্বটটো দৰ্শনীয়ভাৱে ব্লক কৰে। গ’লৰক্ষক দুগৰাকীৰ দুৰ্দান্ত প্ৰদৰ্শনত খেলখনৰ উত্তেজনা আৰু অধিক বৃদ্ধি পায়।
খেলখনৰ আটাইতকৈ আৱেগিক মুহূৰ্তটো আহিছিল ৭১ মিনিটত। আঘাতৰ বাবে খেলপথাৰ এৰিবলৈ বাধ্য হয় থিবাউট ক’ৰ্টোৱাই। তেওঁ চকুলো টুকি খেলপথাৰ এৰি গুচি গ’ল। তেওঁৰ ঠাইত চেনে লেমেন্সক নমোৱা হয়। কৰ্টোৱাই যোৱাৰ পিছতো স্পেইনে কিছু সময়ৰ বাবে বেলজিয়ামৰ ডিফেন্স ভাঙিব নোৱাৰিলে।
৮৪ মিনিটত ডানি অলমোৰ বিকল্প হিচাপে খেলপথাৰত নামে মাইকেল মেৰিনো। খেলপথাৰত নমাৰ মাত্ৰ ১১৫ ছেকেণ্ডৰ পিছতে তেওঁ মেচখনৰ ভাগ্য সলনি কৰি দিলে। ৮৮ মিনিটত লেমেন্সে প্ৰথমে পাউ কুবেৰ্চিৰ দীৰ্ঘ দূৰত্বৰ শ্বটটো ব্লক কৰিও বলটো সম্পূৰ্ণৰূপে ক্লিয়াৰ কৰিবলৈ সক্ষম নহ’ল। মেৰিনোৱে সুযোগটো গ্ৰহণ কৰি গ’লৰক্ষকৰ মূৰৰ ওপৰেৰে বলটো নেটত সোমাই দিয়ে। এই গ’লেৰে স্পেইন ২-১ গ’লত অগ্ৰগতি লাভ কৰে।
পৰ্তুগালৰ বিৰুদ্ধে অন্তিম ১৬ৰ খেলখনতো মেৰিনোৱে পৰিৱৰ্ত হিচাপে নামি বিজয়ী গ’লটো দিছিল। এইবাৰ কোৱাৰ্টাৰ ফাইনেলতো তেওঁ একে কৃতিত্ব অৰ্জন কৰে।
ইয়াৰ ফলত স্পেনিছ মিডফিল্ডাৰগৰাকীয়ে বিশ্বকাপৰ নকআউট পৰ্যায়ত একেৰাহে দুখন মেচত ৮০ মিনিটৰ পাছত বিজয়ী গ’ল দিয়া প্ৰথমজন ফুটবলাৰ হিচাপে ইতিহাস ৰচনা কৰে। ইয়াৰ উপৰিও খেলপথাৰত নমাৰ ১১৫ ছেকেণ্ডৰ ভিতৰতে অহা এই গ’লটো বিশ্বকাপত স্পেনিছ বিকল্প খেলুৱৈৰ আটাইতকৈ দ্ৰুত গ’ল। এতিয়ালৈকে এই অভিলেখ ১৯৮২ চনত যুগোশ্লভিয়াৰ বিৰুদ্ধে এনৰিকে ছাউৰা (১৫৯ ছেকেণ্ড)ৰ হাতত আছিল।
