আমেৰিকাৰ অৰ্থনীতিয়ে দীৰ্ঘদিন ধৰি উচ্চ মুদ্ৰাস্ফীতিৰ চাপ সহ্য কৰি আহিছে। ইয়াৰ লগতে নিবনুৱা সমস্যাও আছে। এই পৰিস্থিতিত ভৱিষ্যতে আমেৰিকাৰ ঋণ নীতিত কোনো ডাঙৰ পৰিৱৰ্তন হ’ব নেকি? এই প্ৰশ্নত ৰঘুৰাম ৰাজনে গুৰুত্বপূৰ্ণ ভূমিকা ল’বলৈ ওলাইছে।
আমেৰিকাৰ কেন্দ্ৰীয় বেংক ফেডাৰেল ৰিজাৰ্ভে দেশৰ ঋণ নীতিৰ সংস্কাৰৰ ক্ষেত্ৰত হাত দিছে। ইয়াৰ বাবে গঠন কৰা হৈছে টাস্ক ফ’ৰ্চ। ভাৰতীয় ৰিজাৰ্ভ বেংকৰ প্ৰাক্তন গৱৰ্ণৰ ৰঘুৰাম ৰাজনক সদস্য হিচাপে আমন্ত্ৰণ কৰা হৈছে। তেওঁৰ উপৰিও আৰু দুজন ভাৰতীয়ক পৰ্যালোচনা সমিতিত অন্তৰ্ভুক্ত কৰা হৈছে – হাৰ্ভাৰ্ড বিশ্ববিদ্যালয়ৰ অৰ্থনীতিবিদ ৰাজ চেট্টী আৰু মাইক্ৰ’ছফ্টৰ আশা শৰ্মাক।
২০১২ চনত ৰঘুৰাম ৰাজনে আমেৰিকাৰ এখন প্ৰতিষ্ঠিত বিশ্ববিদ্যালয়ত অধ্যাপকৰ পদ এৰি দেশলৈ উভতি আহে। তেওঁ ভাৰত চৰকাৰৰ মুখ্য অৰ্থনৈতিক উপদেষ্টা হিচাপে যোগদান কৰে। পিছৰ বছৰ ২০১৩ চনত কেন্দ্ৰৰ তদানীন্তন ইউ পি এ চৰকাৰে তেওঁক ৰিজাৰ্ভ বেংকৰ গৱৰ্ণৰ হিচাপে নিযুক্তি দিয়ে।
ৰাজনৰ তিনি বছৰীয়া কাৰ্যকালত আৰ বি আইয়ে কেইবাটাও গুৰুত্বপূৰ্ণ পদক্ষেপ গ্ৰহণ কৰিছিল। বিশেষকৈ মুদ্ৰাস্ফীতিৰ সৈতে ৰিজাৰ্ভ বেংকৰ মোকাবিলা আলোচনাৰ কেন্দ্ৰবিন্দু হৈ পৰে। আৰ বি আইৰ গৱৰ্ণৰৰ কাৰ্যকাল শেষ হোৱাৰ পিছত এইগৰাকী বিশিষ্ট অৰ্থনীতিবিদ পুনৰ শিক্ষা জগতলৈ ঘূৰি আহে।
আমেৰিকাৰ ফেডাৰেল ৰিজাৰ্ভৰ অধ্যক্ষ কেভিন ৱাৰ্ছে মুদ্ৰানীতি আৰু কৰ্ম পদ্ধতিৰ সংস্কাৰৰ বাবে পাঁচটা বিশেষ টাস্ক ফ’ৰ্চ গঠন কৰাৰ কথা ঘোষণা কৰিছে। ৰঘুৰাম ৰাজনৰ উপৰিও এই সমিতিসমূহৰ ভিতৰত আছে বেংক অৱ ইংলেণ্ডৰ প্ৰাক্তন গৱৰ্ণৰ মাৰ্ভিন কিং, ৱালমাৰ্টৰ প্ৰাক্তন চিইঅ’ কাৰ্ল ডগলাছ মেকমিলান, নোবেল বিজয়ী অৰ্থনীতিবিদ থমাছ চাৰ্জেণ্ট আৰু ছিলিকন ভেলীৰ ভেঞ্চাৰ কেপিটেলিষ্ট মাৰ্ক এণ্ডাৰছন।
ৰঘুৰাম ৰাজনক ফেড ৰিজাৰ্ভৰ বেলেন্স শ্বীট পলিচি টাস্ক ফ’ৰ্চৰ সদস্য হিচাপে নিযুক্তি দিয়া হৈছে। অৱশ্যে আমেৰিকাৰ কেন্দ্ৰীয় বেংকে তেওঁলোকৰ কামৰ পৰিসৰ সন্দৰ্ভত কোনো সবিশেষ এতিয়াও সদৰী কৰা নাই।
