ফ্ল’ৰিডাৰ মিয়ামীৰ হাৰ্ড ৰক ষ্টেডিয়ামত তৃতীয় স্থান নিৰ্ণায়ক মেচখনত দেখা গ’ল কেবল গ’লৰ পিছত গ’ল। ইখনৰ পিছত সিখন নাটক। ছেমি ফাইনেলত ক্ৰমে আৰ্জেণ্টিনা আৰু স্পেইনৰ হাতত চেম্পিয়নশ্বিপৰ দৌৰৰ পৰা বাহিৰ হোৱা দুই ইউৰোপীয় শক্তি এই মেচত সান্ত্বনা বিচাৰি খেলপথাৰত নামিছিল।
মেচখনৰ আৰম্ভণিৰে পৰাই থমাছ টুচেলৰ ইংলেণ্ডৰ ফুটবল দলে ফ্ৰান্সৰ ৰক্ষণক ব্যতিব্যস্ত কৰি তুলিছিল। খেলৰ মাত্ৰ ৩ মিনিটৰ ভিতৰতে বক্সৰ বাহিৰৰ পৰা ডেক্লান ৰাইছে ইংলেণ্ডক ১-০ গ’লত অগ্ৰগতি দিয়ে। ১৮ মিনিটত ডেক্লান ৰাইছৰ দুৰ্দান্ত কৰ্ণাৰ কিকৰ পৰা হেডাৰেৰে এজৰি কোনছাই ব্যৱধান ২-০ গ’ললৈ নিয়ে।
প্ৰথমাৰ্ধ শেষ হোৱাৰ পূৰ্বে বুকায়ো ছাকাই ফ্ৰান্সৰ ডিফেন্সৰ দুৰ্বলতাৰ সুযোগ লৈ ৩৭ আৰু ৪৫+১ মিনিটত একেৰাহে দুটা গ’ল দিয়ে। ফলত থ্ৰী লায়ন্সে ৪-০ গ’লত অগ্ৰগতি লাভ কৰি বিৰতিলৈ যায়।
বিৰতিৰ পিছত ৪টা গ’ল হজম কৰাৰ পিছত বিদায়ী প্ৰশিক্ষক ডিডিয়েৰ ডেশ্বাম্পে ফ্ৰান্সৰ ডাগআউটত একেলগে চাৰিটা পৰিৱৰ্তন কৰে। ইয়াৰ পিছতে মেচখনৰ ছবিখন সম্পূৰ্ণ সলনি হৈ গ’ল। ৪৭ মিনিটত ফ্ৰান্সৰ হৈ কাইলিয়ান এমবাপেই প্ৰথমটো গ’ল দিয়ে। এই গ’লটোৰে তেওঁ লিয়নেল মেছিক গোল্ডেন বুটৰ দৌৰত চেৰ পেলায়। ৫৩ মিনিটত যুৱ উইংগাৰ ব্ৰেডলি বাৰ্কোলাই চমৎকাৰ ফিনিছিঙেৰে ৪-২ গ’ললৈ ব্যৱধান হ্ৰাস কৰে। ৬৫ মিনিটত এমবাপে খেলখনৰ দ্বিতীয়টো গ’ল দি ফ্ৰান্সক ৪-৩ গ’লেৰে পুনৰ খেলখনলৈ ঘুৰাই আনে। এই গ’লটোৰে তেওঁ বিশ্বকাপৰ ইতিহাসত সৰ্বাধিক গ’লদাতা হোৱাৰ অনন্য কৃতিত্বৰ কৃতিত্ব গঢ়ে।
মেচখন পুনৰ নিয়ন্ত্ৰণ কৰিবলৈ ইংলেণ্ডৰ প্ৰশিক্ষক টুচেলে তাৰকা মিডফিল্ডাৰ জুড বেলিংহামক নমায়। ইংলেণ্ডে ৮৬ মিনিটত বক্সৰ ভিতৰত কৰা ফাউলৰ বাবে পেনাল্টি লাভ কৰে। বুকায়ো ছাকাই পেনাল্টি স্পটৰ পৰা নিজৰ হেট্ৰিক সম্পূৰ্ণ কৰি ইংলেণ্ডক ৫-৩ গ’লত অগ্ৰগতি প্ৰদান কৰি ফৰাচী দলটোক প্ৰত্যাৱৰ্তনৰ আশাত প্ৰায় চেঁচা পানী ঢালে।
নিৰ্ধাৰিত ৯০ মিনিটৰ পিছত অতিৰিক্ত সময়ত মেচখনৰ উত্তেজনা আৰু অধিক বৃদ্ধি পায়। আঘাতৰ সময়ত ৯০+৫ মিনিটত ফ্ৰান্সৰ অউছমান ডেম্বলেই গ’ল দিয়াৰ পিছত গেলেৰীত তীব্ৰ উত্তেজনাৰ সৃষ্টি হয়। অৱশ্যে মাত্ৰ দুমিনিটৰ পাছত (৯০+৭ মিনিটত) ইংলেণ্ডৰ হৈ জুড বেলিংহামে শীতল মস্তিষ্কৰে খেলখনৰ শেষৰটো গ’ল দিয়ে। শেষত ৰেফাৰীৰ চূড়ান্ত হুইচেল বজাৰ সময়ত ৬-৪ গ’লত ঐতিহাসিক জয়ৰে খেলপথাৰ এৰে ইংলেণ্ডে।
