এনেয়ে ৯ কোটি টকাৰ চেক বাউন্স গোচৰে লগ এৰা নাই! তাতেই এক ‘ভুতৰ ওপৰত দানহ’ৰ দৰে এক নতুন আইনী জটিলতাৰ মাজত সোমাই পৰিছে ৰাজপাল যাদৱ। জুলাইৰ আৰম্ভণিতে আদালতে এই সম্পৰ্কীয় গোচৰত কমেডিয়ানগৰাকীক তিনি মাহৰ কাৰাদণ্ডৰ শাস্তি প্ৰদান কৰিছিল। এইবাৰ বেংকৰ পৰা কোটি কোটি টকাৰ ঋণ লৈ পৰিশোধ নকৰাৰ বাবে পুনৰ বিপদত পৰিছে ৰাজপাল যাদৱ।
খবৰ অনুসৰি, বেংক কৰ্তৃপক্ষই শ্বাহজাহানপুৰত অভিনেতা গৰাকীৰ পৈতৃক ভেটিত নিলামৰ জাননী লগাইছে। নিৰ্দিষ্ট সময়ৰ ভিতৰত টকা নিদিলে বলীউডৰ অভিনেতাজনে গাঁৱৰ মাটি আৰু ঘৰ হেৰুৱাই সৰ্বহাৰা হ’ব লাগিব।
আইনী দণ্ডই ৰাজপালক একেবাৰে এৰি দিয়া নাই। ৯ কোটি টকাৰ চেক বাউন্স গোচৰত ফেব্ৰুৱাৰী মাহত তিহাৰ জেলত এঘাৰ দিন কটাবলগীয়া হৈছিল কমেডিয়ানগৰাকীয়ে। পিছত দিল্লী উচ্চ ন্যায়ালয়ে তেওঁক অন্তৱৰ্তীকালীন জামিন মঞ্জুৰ কৰে যদিও ৰাজপাল যাদৱৰ ওপৰত কেইবাটাও চৰ্ত আৰোপ কৰে।
কিন্তু জুলাই মাহত উচ্চ ন্যায়ালয়ে আদালতৰ নিৰ্দেশ অনুসৰি অভিযোগকাৰীৰ বাকী থকা ধন পৰিশোধ নকৰাৰ বাবে বলীউডৰ অভিনেতাগৰাকীক নতুনকৈ তিনিমাহৰ কাৰাদণ্ডৰ শাস্তি প্ৰদান কৰিছিল। সেই ঘটনাৰ এমাহো পাৰ হোৱা নাই। ২৭ দিনৰ ভিতৰত ৰাজপালৰ সন্মুখত এইবাৰ নতুন বিপদ!
দৰাচলতে কি ঘটিছে? সূত্ৰ অনুসৰি ৰাজপাল যাদৱে চেন্ট্ৰেল বেংক অফ ইণ্ডিয়াৰ মুম্বাই শাখাৰ পৰা পত্নী ৰাধা যাদৱ আৰু মাতৃ গোদাৱৰীৰ নামত ১৬.৬১ কোটি টকাৰ ঋণ লৈছিল। কিন্তু তেওঁ সেইখিনি ঘূৰাই দিব নোৱাৰিলে। দুবছৰমান আগতে ৰাজপালক সকীয়াই দিয়া হৈছিল আৰু তেওঁৰ পৈতৃক ঘৰটো নিলাম কৰিবলৈ জাননী দিয়া হৈছিল।
সেই সময়ত বেংকে অভিনেতাজনৰ সৈতে চুক্তিত উপনীত হৈছিল যদিও ৰাজপাল যাদৱে ঋণ পৰিশোধ কৰিব নোৱাৰিলে। সেই পৰিপ্ৰেক্ষিতত এতিয়া বেংক কৰ্তৃপক্ষই শ্বাহজাহানপুৰৰ অভিনেতাগৰাকীৰ ঘৰৰ নিলামৰ জাননী জাৰি কৰিছে।
বেংকে জনোৱা মতে, অহা ৩৪ দিনৰ ভিতৰত বেংকে ধন ঘূৰাই নিদিলে ৰাজপালৰ পৈতৃক সম্পত্তি নিলাম কৰা হ’ব। নিলামৰ দিন ৯ ছেপ্টেম্বৰত নিৰ্ধাৰণ কৰা হৈছে।
এই প্ৰসংগত ৰাজপাল যাদৱৰ জ্যেষ্ঠ ভাতৃ শ্ৰীপাল যাদৱে কয় যে, “এয়া পুৰণি বিষয়। ঋণ পৰিশোধৰ সন্দৰ্ভত বেংকৰ সৈতে আলোচনা চলি আছে। অতি সোনকালে ইয়াৰ সমাধান হ’ব। বৰ্তমান সম্পত্তি নিলামৰ দৰে কোনো পৰিস্থিতি হোৱা নাই।”
কিন্তু খবৰ অনুসৰি চেন্ট্ৰেল বেংক অফ ইণ্ডিয়াই শেহতীয়াকৈ শ্বাহজাহানপুৰৰ ৰাজপালৰ ঘৰত নিলামৰ জাননী লগাইছে। কোৱা বাহুল্য যে অভিনেতাগৰাকী বৰ্তমান ঋণৰ বোজাত জৰ্জৰিত।
