আজি পুৱা থাইলেণ্ডত সংঘটিত হয় এক ভয়ংকৰ ঘটনা। এখন বিদ্যালয়ত শ্ৰেণী আৰম্ভ হোৱাৰ পিছতে হঠাতে নাবালক এজনে বন্দুক উলিয়াই ছাত্ৰ-ছাত্ৰী আৰু শিক্ষকৰ ওপৰত নিৰ্বিচাৰ গুলীচালনা কৰিবলৈ আৰম্ভ কৰে।
এই গুলীচালনাত এতিয়ালৈকে মুঠ ৬ জনৰ মৃত্যু হোৱাৰ লগতে প্ৰায় ১৫ জন আহত হৈছে। দেশখনৰ নন্থাবুৰী প্ৰদেশৰ বাং ক্ৰুয়াই অঞ্চলৰ দেৱশিৰিন বিদ্যালয়ত সংঘটিত হয় এই ঘটনা। এই ঘটনাত আতংকিত হৈ পৰে সমগ্ৰ বিদ্যালয়খনৰ ছাত্ৰ-ছাত্ৰী আৰু শিক্ষকসকল।
জানিব পৰা মতে, আজি পুৱা সচৰাচৰৰ দৰে একেদৰেই বিদ্যালয় আৰম্ভ হৈছিল। কিন্তু আজি শ্ৰেণী আৰম্ভ হোৱাৰ পাছতে হঠাতে গুলীচালনাৰ শব্দ শুনা গ’ল। নৱম শ্ৰেণীৰ এজন ছাত্ৰই হঠাতে বন্দুক উলিয়াই গুলী চলাবলৈ আৰম্ভ কৰে। তাৰ পিছত গোটেই বিদ্যালয়খনৰ ভিতৰতে প্ৰাণ ৰক্ষাৰ বাবে হুৱাদুৱা লাগি যায়।
এই পৰিস্থিতি চম্ভালিবলৈ আগবাঢ়ি আহে এজন শিক্ষক। তেওঁকো গুলীওৱা বুলি অভিযোগ উঠিছে। তথ্য লাভ কৰাৰ পিছতে সেই স্থানত উপস্থিত হয় আৰক্ষী।
এই আক্ৰমণৰ পিছতেই অভিযুক্ত নাবালকজনে আত্মহত্যা কৰে বুলি আৰক্ষীয়ে জানিবলৈ দিয়ে। হতাহতৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
প্ৰাথমিক তদন্তৰ অন্তত আৰক্ষীয়েও জানিব পাৰে যে অভিযুক্তই ককাকৰ বন্দুক বিদ্যালয়লৈ লৈ আহিছিল। অহাৰ আগতে ঘৰতে ককাক আৰু আইতাকক হত্যা কৰিছিল। কিন্তু এই ঘটনাৰ কাৰণ এতিয়াও জানিব পৰা হোৱা নাই। ঘটনা সন্দৰ্ভত তদন্তকাৰী দলে তদন্ত অব্যাহত ৰাখিছে।
