ভাৰতীয় বায়ুসেনাৰ এজন উইং কমাণ্ডাৰক হানীট্ৰেপত পৰি দেশৰ প্ৰতিৰক্ষা সম্পৰ্কীয় স্পৰ্শকাতৰ তথ্য পাকিস্তানক গতাই দিয়াৰ অভিযোগত গ্ৰেপ্তাৰ কৰা হৈছে।
ৰাষ্ট্ৰীয় সংবাদ মাধ্যমৰ প্ৰতিবেদন অনুসৰি যোৱা ৩১ মে’ত দিল্লী আৰক্ষীৰ বিশেষ শাখাই তেওঁক চোৰাংচোৱাগিৰিৰ অভিযোগত গ্ৰেপ্তাৰ কৰে। বৰ্তমান তেওঁ ন্যায়িক জিম্মাত আছে।
আৰক্ষীৰ সূত্ৰ অনুসৰি এয়া কোনো বিচ্ছিন্ন ঘটনা নহয়। ইয়াৰ আঁৰত এটা ডাঙৰ চক্ৰ আছে। পাকিস্তানী চোৰাংচোৱাক দেশৰ নিৰাপত্তা সম্পৰ্কীয় বিতং তথ্য অৰ্পণ কৰা এনে বহুকেইজনক শেহতীয়া সময়ত গ্ৰেপ্তাৰ কৰা হৈছে। এয়াৰ ফৰ্চৰ এই উইং কমাণ্ডাৰো সেই ফান্দত জড়িত হৈ পৰিছিল।
প্রতিবেদন অনুসৰি দিল্লী আৰক্ষীয়ে জনোৱা মতে, তেওঁ ব্যক্তিগত জীৱনৰ এক কঠিন পৰিস্থিতিৰ মাজেৰে পাৰ হৈ যোৱাৰ সময়ত ছ’চিয়েল মিডিয়াত এগৰাকী মহিলাক লগ পাইছিল৷ ইয়াৰ পিছত বন্ধুত্ব আৰু লাহে লাহে গঢ়ি উঠিছিল ‘প্ৰেমৰ সম্পৰ্ক’।
অভিযোগ অনুসৰি সেই মহিলাগৰাকীৰ আব্দাৰতে উইং কমাণ্ডাৰে সেনাৰ গতিবিধি, সেনা নিয়োগৰ সৈতে জড়িত তথ্য, গুৰুত্বপূৰ্ণ নথি-পত্ৰ আৰু ছবি আৰু ভিডিঅ’ প্ৰেৰণ কৰিবলৈ আৰম্ভ কৰে।
কেৱল সেয়াই নহয়, মহিলাগৰাকীৰ কথা মতেই তেওঁ সহকৰ্মীসকলৰ ফোনত এপ বা স্পাইৱেৰ ইনষ্টল কৰে। যাৰ জৰিয়তে সহকৰ্মীসকলৰ ফোনৰ তথ্য চুৰি কৰি তেওঁলোকৰ গতিবিধি নিৰীক্ষণ কৰা হৈছিল। তদন্তকাৰীসকলে দাবী কৰিছে যে উইং কমাণ্ডাৰগৰাকীৰ প্ৰতি অনুৰক্ত মহিলাগৰাকীৰ পাকিস্তানী হেণ্ডলাৰৰ সৈতে যোগাযোগ আছিল।
প্ৰতিবেদন অনুসৰি বায়ুসেনাই অৱগত কৰিছে যে বিষয়াজনক কিছুদিন ধৰি নিৰীক্ষণ কৰি আছিল। তেওঁৰ কাৰ্যকলাপ সন্দেহজনক যেন লগাত তেওঁলোকৰ চোৰাংচোৱা শাখাই আৰক্ষীক সমগ্ৰ বিষয়টো অৱগত কৰে। কিছু প্ৰমাণো আৰক্ষীক গতাই দিয়া হয়। ইয়াৰ পিছতে অভিযুক্ত উইং কমাণ্ডাৰজনক গ্ৰেপ্তাৰ কৰা হয়।
