বৰ্তমানৰ বান পৰিস্থিতিৰ সুযোগ লৈ পৰিয়ালৰ পৰা বিচ্ছিন্ন হৈ পৰা শিশুসকল মানৱ সৰবৰাহ, উৎপীড়ন আৰু শোষণৰ বলি হোৱাৰ তীব্ৰ সম্ভাৱনা থকাৰ প্ৰতি লক্ষ্য ৰাখি অসম চৰকাৰৰ মহিলা আৰু শিশু উন্নয়ন বিভাগৰ অধীনস্থ ৰাজ্যিক শিশু সুৰক্ষা সমিতিয়ে এক গুৰুত্বপূৰ্ণ সজাগতামূলক নিৰ্দেশনা জাৰি কৰিছে। ‘মিছন বাৎসল্য’ৰ অধীনত প্ৰকাশিত এই পৰামৰ্শৱলীত ৰাজ্যৰ বানাক্ৰান্ত অঞ্চলসমূহত শিশুসকলৰ সুৰক্ষা আৰু মৰ্যাদা অক্ষুণ্ণ ৰাখিবলৈ নাগৰিক, স্বেচ্ছাসেৱক, সাহায্যকৰ্মী, সংবাদ মাধ্যম আৰু জনপ্ৰতিনিধিসকলক সন্মিলিতভাৱে সজাগ হ’বলৈ আহ্বান জনোৱা হৈছে। বানৰ বাবে ঘৰ-বাৰু হেৰুৱাই আশ্ৰয়হীন বা পৰিয়ালৰ পৰা আঁতৰি যোৱা শিশুসকলৰ সুৰক্ষা নিশ্চিত কৰাই এই পৰামৰ্শৱলীৰ মূল উদ্দেশ্য বুলি সদৰী কৰিছে।
চৰকাৰী নিৰ্দেশনা অনুসৰি, সাধাৰণ নাগৰিক বা স্বেচ্ছাসেৱকসকলে কোনো পৰিত্যক্ত বা অকলশৰীয়া শিশু পাই নিজৰ ঘৰলৈ লৈ যোৱা, দত্তক লোৱাৰ প্ৰস্তাৱ দিয়া বা ছ’চিয়েল মিডিয়াত দত্তক গ্ৰহণ সম্পৰ্কে কোনো আহ্বান জনোৱাৰ পৰা সম্পূৰ্ণভাৱে বিৰত থাকিবলৈ কোৱা হৈছে। শিশু কল্যাণ সমিতিৰ অনুমোদন অবিহনে এনে কোনো শিশুকে কোনো ব্যক্তি বা সংগঠনৰ হাতত তুলি নিব নোৱাৰিব। প্ৰায়ে দেখা যায় যে অকলশৰীয়া যেন লগা শিশুসকলৰো অভিভাৱক বা আত্মীয়ই তেওঁলোকক বিচাৰি থাকে। এই ক্ষেত্ৰত শিশুসকলৰ যত্ন, পুনৰুদ্ধাৰ বা আইনগত প্ৰক্ৰিয়া কেৱল কিশোৰ ন্যায় (যত্ন আৰু সুৰক্ষা) আইন, ২০১৫-ৰ নিয়ম অনুসৰিহে পৰিচালিত হ’ব বুলি স্পষ্ট কৰি দিয়া হৈছে।
শিশুসকলৰ আইনী সুৰক্ষা আৰু গোপনীয়তা ৰক্ষাৰ প্ৰতি লক্ষ্য ৰাখি ফেচবুক, ইনষ্টাগ্ৰাম, হোৱাটছএপ বা ইউটিউবৰ দৰে ছ’চিয়েল মিডিয়া প্লেটফৰ্মত কোনো দুৰ্ভগীয়া শিশুৰ ফটো, ভিডিঅ’ বা ব্যক্তিগত তথ্য আপলোড কৰাটো সম্পূৰ্ণ নিষেধ কৰা হৈছে। কিশোৰ ন্যায় আইন, ২০১৫-ৰ ধাৰা ৭৪ অনুসৰি যিকোনো শিশুৰ পৰিচয় প্ৰকাশ কৰাটো দণ্ডনীয় অপৰাধ। ইয়াৰোপৰি সাহায্য শিবিৰ, আশ্ৰয়স্থল বা শিশু যত্ন প্ৰতিষ্ঠানত আশ্ৰয় লোৱা শিশুসকলৰ কাষত ভিৰ নকৰিবলৈ, তেওঁলোকৰ ভিডিঅ’ বা সাক্ষাৎকাৰ গ্ৰহণ নকৰিবলৈও সকীয়াই দিয়া হৈছে, যাতে শিশুসকলে মানসিক শান্তি আৰু নিৰাপদ পৰিৱেশ লাভ কৰিব পাৰে।
যিকোনো স্থানত পৰিয়ালৰ পৰা বিচ্ছিন্ন, আঘাতপ্ৰাপ্ত বা দুৰ্দশাগ্ৰস্ত শিশু পোৱা গ’লে তাৎক্ষণিকভাৱে নিকটৱৰ্তী থানাত খবৰ দিবলৈ অথবা জৰিয়তে ১১২ নম্বৰ বা শিশু সাহায্য হেল্পলাইন ১০৯ৰ-ত যোগাযোগ কৰিবলৈ অনুৰোধ জনোৱা হৈছে। ইয়াৰ লগতে সংশ্লিষ্ট জিলাৰ জিলা শিশু সুৰক্ষা ইউনিট আৰু শিশু কল্যাণ সমিতিক অৱগত কৰাটো বাধ্যতামূলক কৰা হৈছে। ৰাজ্যিক শিশু সুৰক্ষা সমিতিৰ এই সময়োপযোগী পদক্ষেপক প্ৰশংসা কৰি জনসাধাৰণৰ সজাগতা বৃদ্ধিত গুৰুত্ব আৰোপ কৰিছে বিভিন্ন অসামৰিক সংস্থাই।
নাগৰিক সমাজৰ নেটৱৰ্ক ‘জাস্ট ৰাইটছ ফৰ চিড্ৰেন’ৰ ৰাষ্ট্ৰীয় সম্পাদক ঋষি কান্টে প্ৰকাশ কৰা মতে, বানাক্ৰান্ত পৰিস্থিতিত মহিলা আৰু শিশুসকল অতিশয় সংবেদনশীল অৱস্থাত থাকে আৰু এই সুযোগতে সৰবৰাহকাৰীয়ে বিশেষকৈ ৰেলপথসমূহ ব্যৱহাৰ কৰি অপৰাধ সংঘটিত কৰাৰ আশংকাক নুই কৰিব নোৱাৰি। সেয়েহে অসম আৰু পশ্চিম বংগৰ ৰেৱে ষ্টেচন তথা ৰে’লগাড়ীসমূহত ৰে’লৱে সুৰক্ষা বাহিনী, চৰকাৰী ৰে’ল আৰক্ষী আৰু শিশু সুৰক্ষা অংশীদাৰসকলৰ মাজত সহযোগিতা বৃদ্ধি কৰি তীক্ষ্ণ দৃষ্টি ৰাখিবলৈ তেওঁলোকৰ ফালৰ পৰাও দাবী উত্থাপন কৰিছে। বৰ্তমান ৰাজ্যজুৰি শিশু সুৰক্ষা আৰু সজাগতা নিশ্চিত কৰাৰ দিশত প্ৰশাসনৰ তৰফৰ পৰা সতৰ্কতামূলক ব্যৱস্থাৱলী কঠোৰভাৱে অব্যাহত ৰখা হৈছে বুলি জানিবলৈ দিছে।
