শুক্ৰবাৰে অসম চৰকাৰে ৰাজ্যৰ আৰক্ষী প্ৰশাসনত এক ব্যাপক ৰদবদল কৰে। এই ৰদবদলৰ অধীনত বহুকেইগৰাকী জ্যেষ্ঠ আই পি এছ আৰু এ পি এছ বিষয়াক নতুন দায়িত্ব অৰ্পণ কৰা হৈছে। চৰকাৰৰ এই নতুন নিৰ্দেশনাত আই জি, ডি আই জি আৰু এছ এছ পি পদৰ বহুকেইগৰাকী বিষয়াৰ নাম অন্তৰ্ভুক্ত আছে।
গৃহ আৰু ৰাজনৈতিক বিভাগৰ জাননী অনুসৰি ৰত্ন সিংহক স্পেচিয়েল ব্ৰাঞ্চৰ আই জি আৰু বিজয় গিৰি কুলিগামক কোকৰাঝাৰৰ বি টি এ ডিৰ আই জি হিচাপে দায়িত্ব দিয়া হৈছে। একেদৰে কংকন জ্যোতি শইকীয়াক যোৰহাটৰ ইষ্টাৰ্ণ ৰেঞ্জৰ আই জি হিচাপে আৰু প্ৰশম সাগৰ চাংমাইক ফায়াৰ এণ্ড ইমাৰ্জেন্সি চাৰ্ভিচেছৰ আই জি হিচাপে নিযুক্তি দিয়া হৈছে।
ডি আই জি পৰ্যায়তো বহু সালসলনি কৰা হৈছে। ডাঃ ৰবীন কুমাৰক এম পি চিৰ ডি আই জি, গৌতম বৰাক সীমান্ত শাখাৰ ডি আই জি, অমৃত ভূঞাক স্পেচিয়েল ব্ৰাঞ্চৰ ডি আই জি আৰু সুধাকৰ সিঙক তিনিচুকীয়াৰ নৰ্থ ইষ্টাৰ্ণ ৰেঞ্জৰ ডি আই জি হিচাপে নিযুক্তি দিয়া হৈছে। ইয়াৰ উপৰিও ৰঞ্জন ভূঞাক নিৰাপত্তা শাখাৰ, প্ৰণৱজ্যোতি গোস্বামীক প্ৰশাসনৰ আৰু ৰাজেন সিঙক চেণ্ট্ৰেল আৰু হিলছ ৰেঞ্জৰ ডি আই জি হিচাপে দায়িত্ব দিয়া হৈছে। ৱাই টি গিয়াটচোক ৱেষ্টাৰ্ণ ৰেঞ্জৰ ডি আই জি পদলৈ বদলি কৰা হৈছে।
জিলা পৰ্যায়ৰ আৰক্ষীৰ মুৰব্বী পদতো সালসলনি কৰা হৈছে। পাৰ্থ প্ৰতিম দাসক কাছাৰৰ এছ এছ পি আৰু বীৰা ভেংকট ৰাকেশ ৰেড্ডীক নগাঁৱৰ এছ এছ পি হিচাপে বদলি কৰা হৈছে। শৰ্মিষ্ঠা বৰুৱাক দৰং জিলাৰ, আচিফ আহমেদক বিশ্বনাথৰ, নিৰূপম হাজৰিকাক হোজাইৰ, নিশান্ত সৌৰভক মৰিগাঁৱৰ আৰু প্ৰকাশ সোণোৱালক ধেমাজিৰ এছ এছ পি হিচাপে নিযুক্তি দিয়া হৈছে।
অন্যান্য গুৰুত্বপূৰ্ণ নিযুক্তিৰ ভিতৰত মোহন লাল মীনাক ফৰেনছিক বিজ্ঞান সঞ্চালকালয়ৰ সঞ্চালক, স্বপ্ননীল ডেকাক গোলাঘাটৰ এছ এছ পি, সঞ্জীৱ কুমাৰ শইকীয়াক পানবাৰীৰ ২০ নং অসম আৰক্ষী বেটেলিয়নৰ কমাণ্ডেণ্ট আৰু জ্যোতি ৰঞ্জন নাথক কাহিলিপাৰাৰ ১০ নং অসম আৰক্ষী বেটেলিয়নৰ কমাণ্ডেণ্ট হিচাপে নিযুক্তি দিয়া হৈছে।
ইয়াৰ লগতে ২০২১ বেটচৰ কেইবাগৰাকীও আই পি এছ বিষয়াকো নতুন দায়িত্ব দিয়া হৈছে। ইয়াৰ ভিতৰত নিতিশা সঞ্জয় জগতাপক চি আই ডিৰ এছ এছ পি, ৰজত কুমাৰ পালক এ আই জি পি, অতুল কুমাৰক ডি জি পিৰ ষ্টাফ অফিচাৰ, মাহাতো অমিতকুমাৰ সিদ্ধিপ্ৰসাদক গুৱাহাটীৰ সীমান্ত শাখাৰ ডি চি পি, অমন প্ৰকাশ মীনাক দুৰ্নীতি নিবাৰক শাখাৰ এছ এছ পি আৰু দেশাই তুষাৰ উত্তমক চি আই ডিৰ চাইবাৰ ক্ৰাইম শাখাৰ এছ এছ পি হিচাপে নিযুক্তি দিয়া হৈছে।
চৰকাৰী জাননীখনত উল্লেখ কৰা হৈছে যে ৰাইজৰ স্বাৰ্থত আৰু প্ৰশাসনৰ সুবিধাৰ বাবে এই বদলি আৰু পদোন্নতিসমূহ কৰা হৈছে। বিষয়াসকলে নিজৰ নতুন দায়িত্ব গ্ৰহণ কৰা দিনাৰ পৰাই এই নিৰ্দেশনা কাৰ্যকৰী হ’ব।
