এতিয়াৰ পৰা প্লাষ্টিক বা এলুমিনিয়াম ফইলৰ পেকেটত পাণমছলা বিক্ৰী কৰিব নোৱাৰিব। ভাৰতৰ খাদ্য সুৰক্ষা আৰু মান প্ৰাধিকৰণে এই কথা স্পষ্ট কৰি দিছে। কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ৰ অধীনস্থ এই সংস্থাই এখন জাননীযোগে পাণমছলাৰ পেকেট কি সামগ্ৰীৰে তৈয়াৰ কৰিব লাগিব, সেই বিষয়েও নতুন নিৰ্দেশনা জাৰি কৰিছে।
কি নীতি সংশোধন কৰা হ‘ল?
২০১৮ চনৰ খাদ্য সুৰক্ষা আৰু মান (পেকেজিং) নিয়ন্ত্ৰণ নীতি সংশোধন কৰি তাত পাণমছলা সম্পৰ্কীয় নতুন নিয়ম অন্তৰ্ভুক্ত কৰা হৈছে। ‘খাদ্য সুৰক্ষা আৰু মান (পেকেজিং) সংশোধনী নীতি, ২০২৬’ৰ জৰিয়তে এই নতুন নিয়মৰ বিষয়ে জাননী জাৰি কৰিছে এফএছএছএআই। সোমবাৰে এই সন্দৰ্ভত এক চৰকাৰী গেজেট জাননীও প্ৰকাশ কৰা হৈছে। ইয়াত স্পষ্টকৈ কোৱা হৈছে যে প্লাষ্টিকৰ বাহিৰে আন প্ৰাকৃতিক সামগ্ৰীৰে তৈয়াৰী পেকেটতহে পাণমছলা বিক্ৰী কৰিব লাগিব।
কিহৰে তৈয়াৰ কৰিব লাগিব পাণমছলাৰ পেকেট?
এফএছএছএআইৰ নিৰ্দেশনা অনুসৰি, কাগজ, পেপাৰবৰ্ড, চেলুল’জ আদিৰ দৰে পৰিৱেশ অনুকূল সামগ্ৰীৰে পাণমছলাৰ পেকেট তৈয়াৰ কৰিব লাগিব। পেকেটৰ সামগ্ৰীত কোনো কাৰণতে প্লাষ্টিক থাকিব নোৱাৰিব। পলিথাইলিন, পলিপ্ৰপাইলিন, পলিষ্টাৰ, পলিভিনাইল ক্ল’ৰাইড আদিৰ দৰে প্লাষ্টিকজাত সামগ্ৰীৰে পাণমছলাৰ পেকেট তৈয়াৰ কৰিব নোৱাৰিব। ইয়াৰ উপৰি এলুমিনিয়াম ফইল বা মেটালাইজড লেয়াৰৰ দৰে সামগ্ৰীৰেও পাণমছলাৰ পেকেট বনোৱাত নিষেধাজ্ঞা আৰোপ কৰা হৈছে। অৱশ্যে, টিন বা কাঁচৰ বটলত পাণমছলা বিক্ৰী কৰাত কোনো বাধা আৰোপ কৰা নাই।
নতুন নিয়মৰ আঁৰৰ কাৰণ
সংশোধিত নীতিত জনোৱা হৈছে যে, ২০১৬ চনৰ প্লাষ্টিক আৱৰ্জনা ব্যৱস্থাপনা নীতি আৰু ১৯৮৬ চনৰ পৰিৱেশ (সুৰক্ষা) আইন মানি চলি এতিয়াৰ পৰা পাণমছলা পেকেট কৰিব লাগিব। চলিত বৰ্ষৰ ২৮ এপ্ৰিলত কেন্দ্ৰীয় চৰকাৰে এই নীতি সংশোধনীৰ খচৰা প্ৰকাশ কৰিছিল। এই সন্দৰ্ভত সাধাৰণ মানুহৰ মতামত বিচাৰি ৬০ দিনৰ সময় দিয়া হৈছিল। এফএছএছএআই-এ জনাইছে যে সাধাৰণ ৰাইজৰ মতামত বিবেচনা কৰাৰ পাছতহে এই চূড়ান্ত সংশোধনী প্ৰকাশ কৰা হৈছে। অৱশ্যে, কেন্দ্ৰীয় চৰকাৰৰ এই জাননীত এয়াও স্পষ্ট কৰি দিয়া হৈছে যে দেশত পাণমছলা কোনো কাৰণতে নিষিদ্ধ কৰা হোৱা নাই। বৰঞ্চ পাণমছলা কেনেদৰে পেকেট কৰা হ’ব, তাৰ দ্বাৰা যাতে পৰিৱেশৰ ক্ষতি নহয়, সেই সম্পৰ্কীয় নীতিহে কঠোৰভাৱে প্ৰণয়ন কৰা হৈছে।
