অসম জাতীয় পৰিষদৰ যুৱ নেত্ৰী কুংকি চৌধুৰীৰ নাম ব্যৱহাৰ কৰি বানপীড়িতক সহায় কৰাৰ চলেৰে একাংশ দুষ্ট চক্ৰই ৰাইজৰ পৰা ধন সংগ্ৰহ কৰাৰ এক ভয়ংকৰ প্ৰৱঞ্চনাৰ পোহৰলৈ আহিছে। জানিব পৰা মতে, কোনো আৰিফুল হক নামৰ ব্যক্তিয়ে ‘For Kunki Choudhury’ (ফৰ কুংকি চৌধুৰী) নামৰে এটা ভুৱা ইনষ্টাগ্ৰাম একাউণ্ট খুলি লৈছে। এই একাউণ্টটোৰ জৰিয়তে বানৰ কৱলত পৰা লোক আৰু বিশেষকৈ শিশুসকলক সহায় কৰাৰ নামত ধন সংগ্ৰহৰ এক প্ৰৱঞ্চনামূলক অভিযান চলোৱা হৈছে। প্ৰৱঞ্চক চক্ৰটোৱে ছ’চিয়েল মিডিয়াৰ একাউণ্টটোত এটা গুগল পে’ৰ স্কেনাৰ আপলোড কৰি ৰাইজক ধন দিবলৈ আহ্বান জনাইছে।
সাধাৰণ ৰাইজক আৱেগিকভাৱে আকৰ্ষণ কৰিবলৈ উক্ত পোষ্টটোত লিখা হৈছে, “এইদৰে যদি কোনোবাই ল’ৰা-ছোৱালীৰ বাবে সহায়ৰ হাত আগবঢ়াব বিচাৰে, অনুগ্ৰহ কৰি মোক জনাব। আপুনিও QR Code স্কেন কৰি আপোনাৰ সাধ্য অনুসৰি সহায় আগবঢ়াব পাৰে। আপোনাৰ সবল এটি সহায়ে কোনোবা এগৰাকী শিশুৰ পঢ়াৰ সপোন আগুৱাই নিব পাৰে।” এনে আৱেগিক বাৰ্তাৰ জৰিয়তে দুষ্ট চক্ৰটোৱে মানুহক বিভ্ৰান্ত কৰি ধন লুটিবলৈ চেষ্টা চলাইছে।
বানপীড়িতৰ আৱেগক মূলধন কৰি দুষ্ট চক্ৰই চলোৱা এই ভয়ংকৰ প্ৰৱঞ্চনাৰ কথা গম পোৱাৰ লগে লগেই সৰৱ হৈ পৰিছে কুংকি চৌধুৰী। তেওঁ স্পষ্ট ভাষাত ৰাইজক সকীয়াই দিছে যে তেওঁৰ নাম লৈ চলোৱা এই ধন সংগ্ৰহ সম্পূৰ্ণ মিছা আৰু ইয়াৰ আঁৰত এটা প্ৰৱঞ্চক চক্ৰ জড়িত হৈ আছে। বিপদৰ সময়ত সহায় কৰিবলৈ গৈ যাতে কোনো ব্যক্তি এই জালিয়াতিৰ বলি নহয়, তাৰ বাবে নেত্ৰীগৰাকীয়ে এনে ভুৱা স্কেনাৰত পইচা নিদিবলৈ ৰাইজলৈ কাতৰ আহ্বান জনাইছে।
