বন্দে মাতৰমক লৈ বিজেপিৰ সমালোচনাৰ মাজতে নিজৰ ৮৯ বছৰ পুৰণি সিদ্ধান্তত অটল থকাৰ কথা স্পষ্ট কৰিলে কংগ্ৰেছে। দলীয় সভা আৰু অনুষ্ঠানত বন্দে মাতৰমৰ ছটা স্তৱক গোৱাৰ পৰিৱৰ্তে কেৱল প্ৰথম দুটা স্তৱকহে পৰিৱেশন কৰা হ’ব বুলি কংগ্ৰেছৰ সাধাৰণ সম্পাদক কে চি বেণুগোপালে জানিবলৈ দিছে।
বুধবাৰে অনুষ্ঠিত কংগ্ৰেছ ৱৰ্কিং কমিটীৰ বৈঠকত বন্দে মাতৰমক লৈ বিস্তৃতভাৱে আলোচনা হয়। ইয়াৰ পূৰ্বে শনিবাৰে স্বাধীনতাৰ ৮০ বছৰ উদযাপন উপলক্ষে কংগ্ৰেছৰ মুখ্য কাৰ্যালয়ত অনুষ্ঠিত অনুষ্ঠানত সেৱাদলৰ কৰ্মীসকলে বন্দে মাতৰমৰ ছটা স্তৱক পৰিৱেশন কৰিছিল। বিজেপিয়ে অভিযোগ কৰিছিল যে গান পৰিৱেশনৰ মাজতে ছোনিয়া গান্ধীয়ে অসন্তুষ্টি প্ৰকাশ কৰি সেৱাদলৰ কৰ্মীসকলক গান বন্ধ কৰিবলৈ কৈছিল।
ইয়াৰ পিছতে বিষয়টোক লৈ কংগ্ৰেছক আক্ৰমণৰ লক্ষ্য কৰি লয় বিজেপিয়ে। সোমবাৰে গোৱাত কংগ্ৰেছ সভাপতি মল্লিকাৰ্জুন খাৰ্গেৰ উপস্থিতিত অনুষ্ঠিত দলীয় অনুষ্ঠানতো বন্দে মাতৰমৰ প্ৰথম দুটা স্তৱক গোৱা হৈছিল।
চলিত বছৰৰ আৰম্ভণিতে কেন্দ্ৰীয় চৰকাৰে জাৰি কৰা এক নিৰ্দেশনাত চৰকাৰী অনুষ্ঠানৰ আৰম্ভণি আৰু শেষত ৰাষ্ট্ৰীয় সংগীতৰ পূৰ্বে বন্দে মাতৰম পৰিৱেশন কৰাৰ কথা উল্লেখ কৰা হৈছিল। ইয়াৰ উপৰি শেহতীয়াকৈ সংসদত ৰাষ্ট্ৰীয় সন্মানৰ অপমান ৰোধৰ আইন সংশোধন কৰা হৈছে। সংশোধিত আইন অনুসৰি বন্দে মাতৰমৰ দৰে ৰাষ্ট্ৰীয় বন্দনা গীতৰ অপমান কৰিলে তিনি বছৰ পৰ্যন্ত কাৰাদণ্ড আৰু জৰিমনা হ’ব পাৰে।
কিন্তু এই বিষয়ত কংগ্ৰেছে নিজৰ পুৰণি সিদ্ধান্ত সলনি নকৰাৰ কথা স্পষ্ট কৰিছে। বুধবাৰে কংগ্ৰেছ ৱৰ্কিং কমিটীৰ বৈঠকত কেইবাগৰাকীও নেতাই ১৯৩৭ চনত গ্ৰহণ কৰা সিদ্ধান্তটো বাহাল ৰখাৰ পক্ষে মত প্ৰকাশ কৰে। সেই সিদ্ধান্ত অনুসৰি কংগ্ৰেছৰ সভা আৰু অনুষ্ঠানত বন্দে মাতৰমৰ প্ৰথম দুটা স্তৱকহে গোৱা হ’ব।
কংগ্ৰেছৰ মতে, সেই সময়ত দলৰ ফালৰ পৰা কবিগুৰু ৰবীন্দ্ৰনাথ ঠাকুৰৰ মতামত বিচাৰি তেওঁলৈ চিঠি প্ৰেৰণ কৰা হৈছিল। জৱাহৰলাল নেহৰুলৈ লিখা চিঠিত ৰবীন্দ্ৰনাথ ঠাকুৰে বন্দে মাতৰমৰ প্ৰথম দুটা স্তৱক গোৱাটোৱেই উপযুক্ত বুলি পৰামৰ্শ দিছিল।
বন্দে মাতৰমৰ প্ৰথম দুটা স্তৱকত দেশমাতৃৰ বন্দনাৰ কথা উল্লেখ আছে। আনহাতে, পৰৱৰ্তী চাৰিটা স্তৱকত ধৰ্মীয় বিষয়ৰ উল্লেখ থকা বাবে বিভিন্ন ধৰ্মৰ লোক উপস্থিত থকা সভা বা অনুষ্ঠানত সেই অংশ পৰিৱেশন নকৰাই উচিত বুলি তেতিয়া কংগ্ৰেছ ৱৰ্কিং কমিটীয়ে সিদ্ধান্ত লৈছিল।
বুধবাৰে কংগ্ৰেছ সভাপতি মল্লিকাৰ্জুন খাৰ্গেই বিজেপিৰ সমালোচনাৰ প্ৰত্যুত্তৰ দি কয় যে মহাত্মা গান্ধী, জৱাহৰলাল নেহৰু আৰু চৰ্দাৰ বল্লভভাই পেটেলৰ দৰে জাতীয় নেতাসকলে বন্দে মাতৰমৰ যিমানখিনি অংশ গাইছিল, কংগ্ৰেছেও সেই অংশহে পৰিৱেশন কৰিব।
বন্দে মাতৰমক লৈ আইনী ব্যৱস্থা গ্ৰহণ কৰাৰ বিজেপিৰ হুংকাৰৰ প্ৰসংগত খাৰ্গেই প্ৰশ্ন কৰে, যদি এই বিষয়ত গোচৰ ৰুজু কৰা হয়, তেন্তে প্ৰয়াত জাতীয় নেতাসকলৰ বিৰুদ্ধেও বিজেপিয়ে গোচৰ ৰুজু কৰিব নেকি? বন্দে মাতৰমক লৈ ৰাজনৈতিক বিতৰ্ক চলি থকাৰ মাজতে কংগ্ৰেছৰ এই স্থিতিয়ে বিষয়টো পুনৰ ৰাজনৈতিক চৰ্চাৰ কেন্দ্ৰলৈ আনিছে।
