মাত্ৰ চাৰিদিনৰ ব্যৱধানতে স্থিতি সলনি কৰিবলৈ বাধ্য চৰকাৰ ! ‘প্ৰশাসনিক কাৰণ’ দৰ্শাই আন্দামান আৰু নিকোবৰ দ্বীপপুঞ্জ প্ৰশাসনে ব্যক্তিগত খণ্ডৰ দ্বাৰা দ্বীপটোত নিৰ্মাণ কৰিবলগীয়া এটা ‘গ্ৰীণ এ আই ডেটা চেণ্টাৰ’ বা সেউজ কৃত্ৰিম বুদ্ধিমত্তা তথ্য কেন্দ্ৰৰ প্ৰস্তাৱ প্ৰত্যাহাৰ কৰিছে। ১৪ আগষ্টত তথ্য প্ৰযুক্তি বিভাগৰ সচিবৰ কাৰ্যালয়ে এক নিৰ্দেশনাযোগে এই কথা সদৰী কৰে।’প্ৰশাসনিক কাৰণ’ দৰ্শাই তথ্য প্ৰযুক্তি বিভাগৰ সচিবৰ কাৰ্যালয়ে ১৪ আগষ্টত এই প্ৰস্তাৱ বাতিলৰ কথা ঘোষণা কৰিছিল, অথচ ইয়াৰ মাত্ৰ চাৰিদিন পূৰ্বে অৰ্থাৎ ১০ আগষ্টতহে এই প্ৰকল্পৰ বাবে ব্যক্তিগত খণ্ডৰ পৰা প্ৰস্তাৱ বিচৰা হৈছিল।
১৪ আগষ্টৰ নিৰ্দেশনাটোত উল্লেখ কৰা অনুসৰি, প্ৰশাসনিক কাৰণত তৎকালীনভাৱে কাৰ্যকৰী হোৱাকৈ এই প্ৰস্তাৱ আহ্বানৰ নিবিদা প্ৰত্যাহাৰ কৰা হৈছে। অৱশ্যে, এই ‘প্ৰশাসনিক কাৰণ’ প্ৰকৃততে কি, সেই বিষয়ে নিৰ্দেশনাটোত কোনো স্পষ্টীকৰণ বা বিতং তথ্য দিয়া হোৱা নাই।
ইয়াৰ পূৰ্বে ১০ আগষ্টৰ জাননীখনত গ্ৰেট নিকোবৰ বা লিটল আন্দামানৰ নিৰ্দিষ্ট স্থানত এই গ্ৰীণ এ আই ডেটা চেণ্টাৰ নিৰ্মাণৰ সম্ভাৱনীয়তা অন্বেষণ কৰিবলৈ ব্যক্তিগত খণ্ডৰ পৰা প্ৰস্তাৱ বিচৰা হৈছিল। এই প্ৰকল্পত ডাঙৰ পৰিসৰৰ আৰু এ আই ডেটা চেণ্টাৰৰ আন্তঃগাঁথনি, উন্নত কম্পিউটিং ব্যৱস্থা, সাগৰৰ পানীৰ ওপৰত আধাৰিত কুলিং চিষ্টেম আৰু নৱীকৰণযোগ্য শক্তিৰ ব্যৱহাৰ আদি অন্তৰ্ভুক্ত আছিল। গ্ৰেট নিকোবৰৰ কেম্পবেল বে, এণ্ডাৰছন বে, বিজয় নগৰ বে আৰু গান্ধী নগৰ বে এলেকাত এই প্ৰকল্পৰ স্থান নিৰ্ধাৰণ কৰা হৈছিল।
উল্লেখযোগ্য যে, গ্ৰেট নিকোবৰ দ্বীপত ইতিমধ্যে ৯২,০০০ কোটি টকা ব্যয়সাপেক্ষ কেইবাটাও বৃহৎ আন্তঃগাঁথনি প্ৰকল্পৰ কাম চলি আছে। ইয়াৰ ভিতৰত এটা নতুন বিমানবন্দৰ, আন্তঃৰাষ্ট্ৰীয় কণ্টেইনাৰ টাৰ্মিনেল আৰু বিদ্যুৎ প্ৰকল্প অন্যতম। কিন্তু কেন্দ্ৰীয় পৰিৱেশ মন্ত্ৰালয়ে এই প্ৰকল্পসমূহক অনুমোদন জনোৱাৰ প্ৰক্ৰিয়া আৰু স্থানীয় লোকৰ বিৰোধিতাক আওকাণ কৰাৰ অভিযোগত এইবোৰ তীব্ৰ বিতৰ্কৰ মাজত সোমাই পৰিছে। পৰিৱেশ ধ্বংসৰ আশংকা লৈ বৰ্তমান কলকাতা উচ্চ ন্যায়ালয়ত এই বিষয় সম্পৰ্কীয় দুটাকৈ গোচৰৰ শুনানি চলি আছে।
