আদালত চৌহদতে সংঘটিত হয় গুলীচালনাৰ ঘটনা। গুলীচালনাত এজন কুখ্যাত গেংষ্টাৰ নিহত হয়। এই ঘটনাত হাৰিয়ানাৰ হিছাৰ জিলা আদালতত আহত হয় আন এজন ব্যক্তি। ইয়াৰ ফলত অধিবক্তা আৰু আন লোকৰ মাজত আতংক বিয়পি পৰে। আৰক্ষীয়ে জনোৱা মতে, এই গুলীচালনাৰ সন্দেহযুক্ত অভিযুক্তক গ্ৰেপ্তাৰ কৰা হৈছে।
বৃহস্পতিবাৰে হাৰিয়ানাৰ হিছাৰ আদালত চৌহদত দিনৰ পোহৰতে গুলীয়াই হত্যা কৰা হয় গেংষ্টাৰ বিনোদ পানু ওৰফে কানাক। বিনোদ হিছাৰৰ থুৰানা গাঁৱৰ বাসিন্দা। দুপৰীয়া প্ৰায় ২:৪৫ বজাত যেতিয়া গুলীচালনা সংঘটিত হয় তেতিয়া তাত উপস্থিত থকা অধিবক্তা আৰু অন্যান্য লোকৰ মাজত আতংক বিয়পি পৰে। গুলীচালনাৰ ঘটনাত আহত হয় আন এজন ব্যক্তি।
আৰক্ষী সূত্ৰৰ পৰা জানিব পৰা মতে, পাৰ্কিং এলেকা আৰু আদালত চৌহদৰ মূল গেটৰ সমীপতে গুলীচালনা সংঘটিত হয়। চিকিৎসালয়ত চিকিৎসাধীন অৱস্থাত মৃত্যু হয় পানুৰ। অৱশ্যে আহত ব্যক্তিজন সম্প্ৰতি বিপদমুক্ত বুলি কোৱা হৈছে। প্ৰত্যক্ষদৰ্শীয়ে দাবী কৰিছে যে আক্ৰমণকাৰীয়ে পানুৰ ওপৰত মুঠ ১৪ৰাউণ্ড গুলীচালনা কৰে।
জানিব পৰা মতে, গাড়ীৰে মূল গেটেৰে ক’ৰ্টত প্ৰৱেশ কৰি থকা অৱস্থাতে পানুক গুলীচালনা কৰা হয়। আক্ৰমণৰ পৰা ৰক্ষা পাবলৈ তেওঁ মূল গেটৰ ফালে দৌৰিবলৈ চেষ্টা কৰে। অৱশ্যে আক্ৰমণকাৰীয়ে তেওঁক খেদি যায়। আক্ৰমণকাৰীয়ে দ্ৰুত একেৰাহে কেইবা জাই গুলীচালনা কৰি পলায়ন কৰে।
এই ঘটনাৰ পিছতে আৰক্ষীয়ে তদন্ত আৰম্ভ কৰে। হিছাৰ আৰক্ষী বিষয়া সিদ্ধাৰ্থ জৈনে জনোৱা মতে, এই গুলীচালনাৰ সৈতে জড়িত এজন সন্দেহযুক্ত লোকক গ্ৰেপ্তাৰ কৰা হৈছে। ধৃত ব্যক্তিজনৰ পৰা এটা আগ্নেয়াস্ত্ৰও উদ্ধাৰ কৰা হৈছে। বিষয়াসকলৰ মতে আদালত চৌহদত হোৱা গুলীচালনাত এইটোৱেই ব্যৱহাৰ কৰা হৈছিল। এই আক্ৰমণৰ কাৰণৰ তদন্ত চলি আছে।
বিষয়াসকলে জনোৱা মতে, আক্ৰমণৰ লগত জড়িত আন লোকৰ সন্ধানো চলি আছে। মন কৰিবলগীয়া যে ২০১৪ চনত হত্যাৰ গোচৰত পানুক যাৱজ্জীৱন কাৰাদণ্ডৰ শাস্তি প্ৰদান কৰা হৈছিল। তেওঁৰ বিৰুদ্ধে হত্যাকে ধৰি কমেও ৩১টা গোচৰ আছে।
