ব্যক্তিগত শত্ৰুতা পূৰণ বা নিজৰ ভাবমূৰ্তি ৰক্ষাৰ বাবে আইনী যুঁজত আদালতৰ মূল্যৱান সময় অপচয় কৰিব নোৱাৰিব। ১১ বছৰ ধৰি এজন জ্যেষ্ঠ অধিবক্তা আৰু তেওঁৰ প্ৰাক্তন ক্লায়েণ্টৰ মাজত চলি থকা দীঘলীয়া আইনী যুদ্ধ (উচ্চতম ন্যায়ালয়ৰ বিলাসী মামলা)ক লৈ দেশৰ সৰ্বোচ্চ ন্যায়ালয়ে চৰম অসন্তুষ্টি প্ৰকাশ কৰিছে।
এনে ‘বিলাসিতাৰ আইনী যুঁজে’ (Luxury Litigation) প্ৰকৃত ন্যায়প্ৰাৰ্থীসকলৰ ন্যায় লাভৰ গতি পিছুৱাই নিয়ে বুলি কঠোৰ পৰ্যবেক্ষণ ৰাখি ন্যায়াধীশ বিক্ৰম নাথ আৰু ন্যায়াধীশ সন্দীপ মেহতাৰ বিচাৰপীঠে দুয়োপক্ষক ৫ লাখ টকাকৈ জৰিমনাৰ আদেশ দিয়ে।
এই ঘটনাৰ আৰম্ভণি হৈছিল ২০১৩ চনৰ পৰা। ভাতৃৰ সৈতে বিবাদৰ অন্তত এগৰাকী মহিলাই মালাড থানালৈ গৈ এজন শীৰ্ষ আৰক্ষী বিষয়াৰ সৈতে পৰিচয় হয়। অভিযোগ অনুসৰি আৰক্ষী বিষয়াগৰাকীয়ে সহায় কৰাৰ অজুহাতত তেওঁক শাৰীৰিক নিৰ্যাতন আৰু যৌন নিৰ্যাতনৰ চেষ্টা চলাইছিল।
বিষয়টোত আইনী সহায়ৰ বাবে এগৰাকী অধিবক্তাৰ কাষ চাপি মহিলাগৰাকীয়ে সকলো গোপনীয় তথ্য আৰু প্ৰমাণ তেওঁৰ হাতত গতাই দিয়ে। কিন্তু পিছত মহিলাগৰাকীয়ে অধিবক্তাই তেওঁৰ পেছাদাৰী মৰ্যাদা উলংঘা কৰি তেওঁৰ সন্মতি অবিহনে সংবাদ মাধ্যমৰ আগত গোপনীয় তথ্য ফাদিল কৰা আৰু জাননী জাৰি কৰাৰ অভিযোগ উত্থাপন কৰে।
এই সন্দৰ্ভত ভাৰতীয় বাৰ কাউন্সিলৰ ওচৰত অভিযোগ দাখিল কৰাৰ সময়ত বাৰ কাউন্সিলৰ অনুশাসন সমিতিয়ে অধিবক্তাজনক দোষী সাব্যস্ত কৰি দুবছৰৰ বাবে অনুজ্ঞাপত্ৰ নিলম্বন কৰে। একে সময়তে অভিযোগকাৰীক ক্ষতিপূৰণ হিচাপে ৩ লাখ টকা আৰু বাৰ কাউন্সিলক ২ লাখ টকা দিবলৈ নিৰ্দেশ দিয়ে। পিছত এই সিদ্ধান্তক প্ৰত্যাহ্বান জনাই দুয়োটা পক্ষই প্ৰথমে বম্বে উচ্চ ন্যায়ালয়ৰ আৰু পিছত উচ্চতম ন্যায়ালয়ৰ কাষ চাপে।
১১ বছৰ ধৰি চলি থকা এই দীৰ্ঘদিনীয়া গোচৰৰ শুনানিত উচ্চতম ন্যায়ালয়ে দুয়োপক্ষকে ভর্ৎসনা কৰে। ন্যায়াধীশসকলে স্পষ্ট কৰি দিয়ে যে দেশৰ আইনী ব্যৱস্থা ব্যক্তিগত প্ৰতিশোধ পূৰণ বা তেওঁলোকে নিজেই সৃষ্টি কৰা বিতৰ্কৰ সুবিধা লোৱা ঠাই নহয়। দুয়োটা পক্ষই প্ৰকৃত তথ্য লুকুৱাই আদালতলৈ আহিছিল। বাৰ কাউন্সিল, উচ্চ ন্যায়ালয় আৰু উচ্চতম ন্যায়ালয়ে অপচয় কৰা ১১ বছৰৰ সময়খিনি আন কোনোবা জৰুৰী বিচাৰ প্ৰাৰ্থীৰ প্ৰাপ্য আছিল।
ইয়াৰ পিছত বিচাৰপীঠে দুয়োপক্ষকে চাৰি সপ্তাহৰ ভিতৰত ‘উচ্চতম ন্যায়ালয়ৰ আইনী সেৱা সমিতি’ত ৫ লাখ টকাকৈ জৰিমনা জমা দিবলৈ নিৰ্দেশ দিয়ে।
