একেদিনাই মণিপুৰত নগা সম্প্ৰদায়ৰ পাঁচজন লোক হত্যাৰ বলি হয়। বৃহস্পতিবাৰে কাংপকপি জিলাত সংঘটিত হয় এই ভয়াবহ ঘটনা। প্ৰত্যক্ষদৰ্শীয়ে দাবী কৰিছে যে দুৰ্বৃত্তই অঞ্চলটোত প্ৰৱেশ কৰি গুলীচালনা আৰম্ভ কৰে। নিহতসকলৰ ভিতৰত এজন স্থানীয় বিদ্যালয়ৰ প্ৰধান শিক্ষক আছিল।
কুকিসকলৰ পিনে উঠিছে অভিযোগৰ আঙুলি। অৱশ্যে অভিযুক্তৰ পৰিচয় সন্দৰ্ভত এতিয়ালৈকে মণিপুৰ আৰক্ষীয়ে কোনো তথ্য প্ৰকাশ কৰা নাই। মণিপুৰৰ বৰ্তমানৰ মুখ্যমন্ত্ৰী ইউমনাম খেমচান্দ সিঙে এনেধৰণৰ আক্ৰমণক তীব্ৰ গৰিহণা দিছে।
উল্লেখ্য যে ২০২৩ চনৰ পৰা উত্তৰ-পূৰ্বাঞ্চলৰ ৰাজ্য মণিপুৰত অশান্তিৰ সৃষ্টি হৈছে। হিংসাৰ বাবে এই অঞ্চলত কেইবাশ লোকৰ মৃত্যু হৈছে। নিৰাপত্তাৰক্ষীৰ ওপৰতো বাৰে বাৰে আক্ৰমণ সংঘটিত হৈ আহিছে। বিগত মাহত বিদ্ৰোহীৰ আক্ৰমণত আছাম ৰাইফলছৰ দুজন জোৱান নিহত হৈছিল।
কুকি-মেইটেই সংঘাতৰ ফলত মণিপুৰত ইখনৰ পিছত সিখন জিলা জ্বলি উঠিছে। ক্ষতিগ্ৰস্ত জিলাসমূহৰ ভিতৰত কাংপকপি আৰু সেনাপতি জিলা অন্যতম। এনে পৰিস্থিতিত চৰকাৰৰ লগতে বিভিন্ন নাগৰিক সমাজৰ সংগঠনে শান্তি ঘূৰাই অনাৰ প্ৰচেষ্টা অব্যাহত ৰাখিছে।
অৱশ্যে কুকি গোষ্ঠীয়ে হিংসাত্মক কাৰ্যকলাপ অব্যাহত ৰখাৰ অভিযোগ বাৰে বাৰে উত্থাপন হৈ আহিছে। দাবী কৰা হৈছে যে তেওঁলোকক ‘ছাছপেন্সন অফ অপাৰেছন’ চুক্তিত স্বাক্ষৰ কৰা প্ৰায় দুই ডজন বিদ্ৰোহী সংগঠনে সমৰ্থন জনাইছে।
বৃহস্পতিবাৰে মণিপুৰ চৰকাৰৰ এক বিবৃতিত কোৱা হৈছে যে মুখ্যমন্ত্রী ইউমনাম খেমচান্দ সিং, অন্যান্য ৰাজ্যিক মন্ত্রী, আমোলা আৰু নিৰাপত্তা বাহিনীৰ বিষয়াসকলৰ বৈঠকত সিদ্ধান্ত লোৱা হয় যে শান্তি আলোচনা প্রক্রিয়াত জড়িত যিকোনো সংগঠনৰ কোনো সদস্যক নির্দিষ্ট শিবিৰৰ বাহিৰত অস্ত্র লৈ ঘূৰি ফুৰা দেখা গ’লে কঠোৰ ব্যৱস্থা গ্রহণ কৰা হ’ব৷ লগতে নিৰীহ সাধাৰণ নাগৰিকক নিৰ্মমভাৱে গুলীচালনা কৰি হত্যা কৰা কাৰ্যক চৰকাৰে তীব্ৰ গৰিহণা দিয়ে।
কিছুদিন পূৰ্বেই মণিপুৰ অস্থিৰ হৈ পৰাৰ খবৰ পোৱা গৈছিল। দুটা গোটৰ সংঘৰ্ষৰ মাজত এজন চি আৰ পি এফ জোৱান গুলীবিদ্ধ হয়। দুষ্কৃতিকাৰীয়ে ইটোৰ পিছত সিটো ঘৰ জ্বলাই দিয়াৰ অভিযোগ উত্থাপন হৈছে।
দেওবাৰৰ নিশাৰ পৰা সোমবাৰে পুৱালৈ ৰাজ্যখনত ধাৰাবাহিক হিংসাত্মক ঘটনাই ব্যাপক আতংক বিয়পাই দিয়ে। এইবাৰ বৃহস্পতিবাৰে দুস্কৃতিকাৰীৰ আক্ৰমণত পুনৰ ৰক্তাক্ত হৈ পৰিল মণিপুৰ।
