হিমবাহ স্খলনৰ ফলত সৃষ্টি হোৱা ভয়ংকৰ বানত বিধ্বস্ত নেপালে এইবাৰ আন্তঃৰাষ্ট্ৰীয় পৰ্যায়ত জলবায়ু ন্যায় আৰু ক্ষতিপূৰণৰ দাবীত সৰৱ হৈ পৰিছে। নেপাল আৰু চীনৰ তিব্বত অঞ্চলত এই প্ৰলয়ংকাৰী দুৰ্যোগত মৃত্যু হোৱা লোকৰ সংখ্যা ইতিমধ্যে ১,০১০ অতিক্ৰম কৰিছে আৰু এতিয়াও প্ৰায় ৪,০০০ লোক সন্ধানহীন হৈ আছে। ত্ৰিশূলী আৰু ভোতেকোশী নদীৰ পাৰৰ বিস্তীৰ্ণ অঞ্চল বোকামাটিৰ তলত জাহ যোৱাৰ লগতে কেইবাটাও জলবিদ্যুৎ প্ৰকল্পৰ সুৰংগত শ শ শ্ৰমিক আৱদ্ধ হৈ পৰিছে। সেনাই হেলিকপ্টাৰ আৰু অত্যাধুনিক সঁজুলিৰে উদ্ধাৰ অভিযান অব্যাহত ৰাখিছে যদিও দুৰ্গম অঞ্চলসমূহত ভূমিস্খলনৰ বাবে সাহায্য সামগ্ৰী যোগান ব্যাহত হৈছে।
এই ভয়ংকৰ পৰিস্থিতিৰ মাজতে নেপালৰ বৈদেশিক মন্ত্ৰী শিশিৰ খনালে স্পষ্ট কৰি দিয়ে যে নেপালে আন্তঃৰাষ্ট্ৰীয় সাহায্যক কোনো ‘দান‘ হিচাপে নহয়, বৰঞ্চ ‘ক্ষতিপূৰণ আৰু ন্যায়‘ হিচাপে দাবী কৰিছে। তেওঁ কয় যে বিশ্বৰ সেউজগৃহ গেছ নিৰ্গমনত নেপালৰ ভূমিকা মাত্ৰ ০.০১ শতাংশ, যি প্ৰায় শূন্যৰ সমান। অথচ বিশ্ব উষ্ণায়ন আৰু হিমবাহ গলনৰ চূড়ান্ত মূল্য ভৰিবলগীয়া হৈছে নেপালৰ নিৰীহ জনসাধাৰণে। এই দুৰ্যোগক ‘পাৰ্বত্য ছুনামি‘ বুলি অভিহিত কৰি তেওঁ কয় যে হিমালয়ৰ হিমবাহবোৰ ধ্বংস হ‘লে গংগা আৰু ত্ৰিশূলী নদীৰ ওপৰত নিৰ্ভৰশীল দক্ষিণ এছিয়াৰ ২০০ কোটিতকৈ অধিক লোকৰ জল সুৰক্ষা চিৰদিনলৈ বিপন্ন হ‘ব। সেয়েহে চীন, আমেৰিকা আৰু ভাৰতৰ দৰে সৰ্বাধিক প্ৰদূষণকাৰী ৰাষ্ট্ৰসমূহৰ এনে ক্ষতিৰ বিপৰীতে ক্ষতিপূৰণ দিয়াৰ ঐতিহাসিক দায়িত্ব আছে।
ইফালে, ভোতেকোশী নদী অববাহিকাত সংঘটিত অভূতপূৰ্ব ধ্বংসলীলাৰ পৰিপ্ৰেক্ষিতত নেপালে আনুষ্ঠানিকভাৱে ৰাষ্ট্ৰসংঘৰ ‘ক্ষতি আৰু লোকচান পুঁজি‘ৰ ব‘ৰ্ডৰ ওচৰত জৰুৰী বিত্তীয় সাহায্য বিচাৰি পত্ৰ প্ৰেৰণ কৰিছে। নেপালৰ বিত্তমন্ত্ৰী স্বৰ্ণিম ৱাগলে আৰু বনমন্ত্ৰী গীতা চৌধুৰীয়ে যৌথভাৱে স্বাক্ষৰ কৰা পত্ৰখনত উল্লেখ কৰা হৈছে যে এই দুৰ্যোগৰ পৰিসৰ নেপালৰ নিজস্ব মোকাবিলা ক্ষমতাৰ বহু বাহিৰত। অহা ডিচেম্বৰৰ নিয়মীয়া বৈঠকলৈ অপেক্ষা নকৰি তাৎক্ষণিকভাৱে এই সাহায্য মোকলাই দিবলৈ নেপালে অনুৰোধ জনাইছে। বন মন্ত্ৰালয়ৰ যুটীয়া সচিব মহেশ্বৰ ঢাকালৰ মতে, নেপালে প্ৰথমবাৰৰ বাবে এই পুঁজিৰ পৰা এনেদৰে সাহায্যৰ বাবে আৱেদন জনাইছে। উদ্ধাৰ অভিযানৰ বাবে ভাৰত, চীন আৰু ছিংগাপুৰৰ পৰা বিশেষ ফৰেনছিক আৰু ডিএনএ চিনাক্তকৰণ দল নেপালত উপস্থিত হোৱাৰ লগতে আন্তঃৰাষ্ট্ৰীয় সংস্থাসমূহেও তাৎক্ষণিক সাহায্য প্ৰেৰণ অব্যাহত ৰাখিছে।
