ইছৰোৱে ডাঙৰ সফলতা অৰ্জন কৰিছে। ভাৰতৰ মহাকাশ গৱেষণাৰ দিশত সংযোজন হৈছে আন এক ঐতিহাসিক কৃতিত্ব।
আজি (শুকুৰবাৰে) পুৱা প্ৰায় ২:৫৫ বজাত অন্ধ্ৰপ্ৰদেশৰ শ্ৰীহৰিকোটাৰ পৰা GSLV-F17 ৰকেট সফলতাৰে উৎক্ষেপণ কৰা হয়।
এই অভিযানৰ ফলত ইছৰ’ই অত্যাধুনিক পৃথিৱী পৰ্যবেক্ষণ উপগ্ৰহ-০৫(আৰ্থ অৱজাৰ্ভেশ্যন ছেটেলাইট) অৰ্থাৎ ইঅ’এছ-০৫ক এটা নিৰ্দিষ্ট কক্ষপথত স্থাপন কৰিলে।
ইছৰোৰ জৰিয়তে জানিব পৰা গৈছে যে প্ৰায় ২৩৬৭ কিলোগ্ৰাম ওজনৰ এই আধুনিক উপগ্ৰহটোৱে ভাৰতৰ পৃথিৱী পৰ্যবেক্ষণ ব্যৱস্থাক আৰু অধিক শক্তিশালী কৰিব।
প্ৰাকৃতিক দুৰ্যোগ, বতৰৰ পৰিৱৰ্তন, ধুমুহা আৰু বৰষুণ, কৃষিকে ধৰি বিভিন্ন গুৰুত্বপূৰ্ণ ক্ষেত্ৰৰ নিৰীক্ষণত ই অ’ এছ-০৫ বিশেষ ভূমিকা গ্ৰহণ কৰিব।
তদুপৰি এই উপগ্ৰহটোৱে দেশৰ সীমান্তৱৰ্তী অঞ্চলসমূহ নিৰীক্ষণ কৰিবলৈ সক্ষম।
এই উপগ্ৰহৰ আটাইতকৈ ডাঙৰ সুবিধাটো হ’ল ইয়াৰ পৰা পোৱা তথ্যসমূহ দ্ৰুতভাৱে বা প্ৰায় ৰিয়েল-টাইম ভিত্তিত ব্যৱহাৰ কৰিব পৰা যাব। ফলত কোনো প্ৰাকৃতিক দুৰ্যোগ বা জৰুৰীকালীন অৱস্থাত শীঘ্ৰে প্ৰয়োজনীয় পদক্ষেপ গ্ৰহণ কৰাটো সুবিধাজনক হ’ব।
বিশেষজ্ঞসকলৰ মতে, মহাকাশৰ পৰা দেশৰ এক বিশাল অঞ্চল নিয়মীয়াকৈ নিৰীক্ষণত এই উপগ্ৰহটোৱে বাস্তৱত তৃতীয় নয়নৰ দৰে কাম কৰিব। ভাৰতীয় বিজ্ঞানীসকলে বিগত পাঁচ-ছয় বছৰ ধৰি এনে উন্নত প্ৰযুক্তিৰ উপগ্ৰহ নিৰ্মাণৰ কাম কৰি আহিছে।
ইছৰোৰ অধ্যক্ষগৰাকীয়ে বিজ্ঞানীসকলক অভিনন্দন জ্ঞাপন কৰে। তেওঁ লগতে কয় যে এই সফলতাই ভাৰতৰ মহাকাশ গৱেষণাক আন্তঃৰাষ্ট্ৰীয় ক্ষেত্ৰখনত এক শক্তিশালী স্থানলৈ লৈ যাব।
জিএছএলভি-এফ১৭ ৰকেটে ইঅ’এছ-০৫ক নিজৰ নিৰ্দিষ্ট কক্ষপথত সফলতাৰে স্থাপন কৰিছে আৰু উপগ্ৰহটোৱে ইতিমধ্যে কাৰ্যক্ষমতা আৰম্ভ কৰিছে।
এই বছৰ আৰু ছটা উপগ্ৰহ উৎক্ষেপণৰ প্ৰস্তুতি পূৰ্ণগতিত চলি আছে। সেই তালিকাত ভাৰতৰ অভিলাষী গগণযান অভিযানো আছে।
Another giant leap for India in Space!
Kudos to Team @isro on the successful launch of GSLV-F17/EOS-05.
EOS-05 is a state-of-the-art Earth Observation satellite and India’s first imaging satellite from Geosynchronous Orbit, enabling advanced imaging across visible, infrared,… pic.twitter.com/1HHJrWM7ze
— Dr Jitendra Singh (@DrJitendraSingh) September 3, 2026
ফলত ই অ’ এছ-০৫ৰ সফল উৎক্ষেপণৰ পাছত ভাৰতৰ মহাকাশ অভিযানৰ গতি আৰু অধিক বৃদ্ধি পাবলৈ গৈ আছে। এই সফলতাই ইছৰোৰ বিজ্ঞানীসকলৰ মনোবল আৰু অধিক বৃদ্ধি কৰিব বুলি আশা কৰা হৈছে।
