কাজিৰঙা ভূমি আৰু মানৱ অধিকাৰ সুৰক্ষা সমিতিৰ মুখ্য আহ্বায়ক প্ৰণৱ দলেৰ মুক্তিৰ দাবীত বোকাখাতত অনুষ্ঠিত হ’বলগীয়া নাগৰিক সভাত গোলাঘাট জিলা প্ৰশাসনে বাধা দিয়াক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে। প্ৰশাসনৰ বাধা নেওচি পৰৱৰ্তী সময়ত বোকাখাতৰ ৰাজপথত বিশাল প্ৰতিবাদী সমদল উলিয়াই প্ৰতিবাদ সাব্যস্ত কৰে অসমৰ বিভিন্ন প্ৰান্তৰ পৰা অহা লোকসকলে।
প্ৰণৱ দলেৰ মুক্তিৰ দাবীত আয়োজন কৰা নাগৰিক সভাখনৰ বাবে প্ৰায় এসপ্তাহ পূৰ্বেই বোকাখাতস্থিত মিচিং ৰেষ্ট হাউছ কৰ্তৃপক্ষৰ পৰা অনুমতি লোৱা হৈছিল বুলি উদ্যোক্তাসকলে দাবী কৰে। কিন্তু শনিবাৰে সভাস্থলীত উপস্থিত হৈ মিচিং ৰেষ্ট হাউছত তলা ওলমি থকা দেখা যায়। ইয়াকে লৈ প্ৰতিবাদকাৰীসকলৰ মাজত ক্ষোভৰ সৃষ্টি হয়।
ইয়াৰ পিছতে প্ৰশাসনৰ বাধা অতিক্ৰম কৰি প্ৰতিবাদী ৰাইজে বোকাখাতৰ ৰাজপথত বিশাল সমদল উলিয়ায়। সমদলৰ অন্তত প্ৰনৱ দলেৰ বাসগৃহৰ চৌহদত অনুষ্ঠিত হয় প্ৰতিবাদী সভা।
সভাত গুৱাহাটী উচ্চ ন্যায়ালয়ৰ জ্যেষ্ঠ অধিবক্তা কৃষ্ণ গগৈ, নাজিৰা সমষ্টিৰ প্ৰাক্তন বিধায়ক দেৱব্ৰত শইকীয়া, অসম জাতীয় পৰিষদৰ সভাপতি লুৰিণ জ্যোতি গগৈ, কাৰ্বি আংলঙৰ সমাজকৰ্মী জন ইংতি কাথাৰ, জীপালৰ উপদেষ্টা সোনেশ্বৰ নৰহ, ভাৰতীয় কমিউনিষ্ট পাৰ্টিৰ নেতা জয়ন্ত গগৈ, ইংলে পথাৰৰ ভূমি অধিকাৰ নেত্ৰী গীতা গোৱালা, ৰাইজৰ দলৰ নেত্ৰী জ্ঞানশ্ৰী বৰাসহ উত্তৰ-পূৰ্বাঞ্চলৰ খিলঞ্জীয়া লোকৰ ভূমি অধিকাৰৰ দাবীত কাম কৰি অহা কেইবাটাও সংগঠনৰ প্ৰতিনিধি উপস্থিত থাকে।
সভাত জীপালৰ উপদেষ্টা সোণেশ্বৰ নৰহে প্ৰশাসনৰ ভূমিকাক তীব্ৰ সমালোচনা কৰে। তেওঁ কয়, প্ৰণৱ দলেৰ মুক্তিৰ দাবীত আয়োজিত নাগৰিক সভাত বাধা দিয়াটো এটা সংগ্ৰামী সত্তাক ‘অস্পৃশ্য’ জ্ঞান কৰাৰ নামান্তৰ। মিছিং জনগোষ্ঠীৰ লোক হোৱাৰ বাবেই প্ৰনৱ দলেৰ প্ৰতি এনে আচৰণ কৰা হৈছে নেকি বুলিও তেওঁ প্ৰশ্ন উত্থাপন কৰে।
নৰহে এয়া গণ আন্দোলন সংকুচিত কৰাৰ ষড়যন্ত্ৰ বুলি অভিযোগ কৰি এই সন্দৰ্ভত স্থানীয় বিধায়ক তথা মন্ত্ৰী অতুল বৰাই উত্তৰ দিব লাগিব বুলিও মন্তব্য কৰে।
আনহাতে, কাৰ্বি আংলঙৰ সমাজকৰ্মী জন ইংতি কাথাৰে প্ৰণৱ দলেৰ NSA-ত বন্দিত্বক লৈ ক্ষোভ প্ৰকাশ কৰে। তেওঁৰ অভিযোগ, প্ৰনৱ দলেক NSA-ত বন্দী কৰি ৰখাটো উত্তৰ-পূৰ্বাঞ্চলৰ খিলঞ্জীয়া লোকসকলক নিজ ভূমিৰ পৰা বিতাড়িত কৰাৰ বৃহত্তৰ ষড়যন্ত্ৰৰ অংশ। খিলঞ্জীয়া লোকৰ ভূমি অধিকাৰ সুৰক্ষাৰ বাবে এনে প্ৰচেষ্টাৰ বিৰুদ্ধে ঐক্যবদ্ধভাৱে প্ৰতিহত কৰিব লাগিব বুলিও তেওঁ মন্তব্য কৰে।
মিচিং ৰেষ্ট হাউছত প্ৰশাসনে তলা লগাই দিয়াক তীব্ৰ ভাষাৰে গৰিহণা দিয়ে অসম জাতীয় পৰিষদৰ সভাপতি লুৰিণ জ্যোতি গগৈয়ে। তেওঁৰ অভিযোগ, ইংলে পথাৰত হায়াত হোটেল নিৰ্মাণৰ কাম বাধাহীনভাৱে আগবঢ়াই নিয়াৰ বাবেই প্ৰণৱ দলেক কাৰাগাৰত বন্দী কৰি ৰখা হৈছে।
উল্লেখ্য যে কাজিৰঙাৰ ইংলে পথাৰৰ খিলঞ্জীয়া আদিবাসীসকলৰ ভূমি অধিগ্ৰহণ কৰি হায়াত কৰ্তৃপক্ষই পঞ্চতাৰকা হোটেল নিৰ্মাণ কৰাৰ প্ৰচেষ্টাৰ বিৰোধিতা কৰি আহিছে প্ৰণৱ দলেয়ে। খিলঞ্জীয়া লোকৰ ভূমি অধিকাৰ সুৰক্ষিত কৰাৰ দাবীত তেওঁ দীৰ্ঘদিন ধৰি আন্দোলন অব্যাহত ৰাখিছে।
প্ৰশাসনে নাগৰিক সভা অনুষ্ঠিত কৰাত বাধা আৰোপ কৰিলেও পৰৱৰ্তী সময়ত প্ৰনৱ দলেৰ বাসগৃহত অনুষ্ঠিত প্ৰতিবাদী সভাত বিপুলসংখ্যক লোকৰ উপস্থিতিয়ে তেওঁৰ মুক্তিৰ দাবীক অধিক শক্তিশালী কৰি তোলে। প্ৰতিবাদী সভাখন আঁত ধৰে মণিকংকনা বৰবৰাই।
