দিল্লী উচ্চ ন্যায়ালয়ে সোমবাৰে প্ৰাক্তন ন্যায়াধীশ যশোৱন্ত বাৰ্মাৰ বাসগৃহত সংঘটিত অগ্নিকাণ্ডৰ পাছত বৃহৎ পৰিমাণৰ নগদ ধন উদ্ধাৰ হোৱা ঘটনাৰ সন্দৰ্ভত এজাহাৰ পঞ্জীয়ন আৰু চিবিআই বা বিশেষ তদন্তকাৰী গোটৰ দ্বাৰা তদন্ত বিচাৰি দাখিল কৰা এখন আৱেদন গ্ৰহণ কৰিবলৈ অস্বীকাৰ কৰে। ন্যায়াধীশ অমিত বঞ্চলৰ বিচাৰপীঠে এই আৱেদনখনক এক ‘উদ্দেশ্যপ্ৰণোদিত হাৰাশাস্তি’ বুলি অভিহিত কৰি প্ৰত্যাখ্যান কৰি কয় যে আৱেদনকাৰীৰ ওচৰত আইনত আন বিকল্প ব্যৱস্থা উপলব্ধ আছে।
শুনানিৰ সময়ত বিচাৰপীঠে আৱেদনকাৰী অধিবক্তা ঘনশ্যাম উপাধ্যায়ক ভৰ্ৎসনা কৰি প্ৰশ্ন কৰে যে তেওঁৰ আন কোনো কাম নাই নেকি। আদালতত আৱেদনকাৰীৰ অধিকাৰক লৈ প্ৰশ্ন উত্থাপন কৰি ন্যায়াধীশ বঞ্চলে জানিবলৈ বিচাৰে যে এজাহাৰ দাখিলৰ বাবে আৱেদনকাৰীয়ে কিয় নিম্ন আদালতৰ কাষ চপা নাছিল। ইয়াৰ উত্তৰত আৱেদনকাৰীয়ে যুক্তি দৰ্শাইছিল যে এইটো এটা অস্বাভাৱিক প্ৰকৃতিৰ ঘটনা আৰু নিম্ন আদালতে এই গোচৰত ন্যায় প্ৰদান কৰিব নোৱাৰে। তেওঁ লগতে উল্লেখ কৰে যে যিকোনো ব্যক্তিয়েই ফৌজদাৰী আইনৰ অধীনত গোচৰ ৰুজু কৰিব পাৰে আৰু ইয়াত কোনো বাধা থাকিব নালাগে।
আদালতে আৱেদনখন খাৰিজ কৰাৰ ইংগিত দিয়াৰ পাছত আৱেদনকাৰীয়ে আইনৰ আন বিকল্প ব্যৱস্থাসমূহ গ্ৰহণ কৰাৰ উদ্দেশ্যেৰে আৱেদনখন প্ৰত্যাহাৰ কৰে। উল্লেখযোগ্য যে, যোৱা আগষ্ট মাহত উচ্চতম ন্যায়ালয়েও তেওঁৰ একেখন আৱেদন নাকচ কৰিছিল।
প্ৰাপ্ত তথ্য অনুসৰি, ২০২৫ চনৰ ১৪ মাৰ্চৰ হোলীৰ নিশা প্ৰায় ১১.৩৫ বজাত সেই সময়ৰ দিল্লী উচ্চ ন্যায়ালয়ৰ ন্যায়াধীশ যশোৱন্ত বাৰ্মাৰ লুটিয়েনছ দিল্লীস্থিত বাসগৃহত এক অগ্নিকাণ্ডৰ ঘটনা সংঘটিত হৈছিল। অগ্নিনিৰ্বাপক বাহিনীয়ে জুই নিৰ্বাপন কৰিবলৈ যোৱাৰ সময়তেই বাসগৃহটোত বৃহৎ পৰিমাণৰ নগদ ধন উদ্ধাৰ হোৱা বুলি দাবী কৰা হৈছিল।
ধন উদ্ধাৰৰ এই ঘটনাই তীব্ৰ বিতৰ্কৰ সৃষ্টি কৰাৰ পাছত ন্যায়াধীশ বাৰ্মাক তেওঁৰ মাতৃ ন্যায়ালয় এলাহাবাদ উচ্চ ন্যায়ালয়লৈ বদলি কৰা হৈছিল। পৰৱৰ্তী সময়ত লোকসভাত তেওঁৰ বিৰুদ্ধে বিচাৰ প্ৰক্ৰিয়া আৰম্ভ কৰা হৈছিল যদিও চলিত বৰ্ষৰ ৯ এপ্ৰিলত তেওঁ ৰাষ্ট্ৰপতি দ্ৰৌপদী মুৰ্মুলৈ পত্ৰযোগে নিজৰ পদত্যাগ পত্ৰ প্ৰেৰণ কৰে। ২০৩১ চনৰ ৫ জানুৱাৰীত অৱসৰ গ্ৰহণ কৰিবলগীয়া প্ৰাক্তন ন্যায়াধীশগৰাকীয়ে পদত্যাগ কৰাৰ লগে লগে লোকসভাই গ্ৰহণ কৰা এই বিৰল বিচাৰ প্ৰক্ৰিয়াটো অপ্ৰাসংগিক হৈ পৰে।
