আজি বৃহস্পতিবাৰে লাডাখত জলবায়ু কৰ্মী ছোনম ৱাংচুকৰ নেতৃত্বত লেহ এপেক্স বডীয়ে শ্বহীদ দিৱস পালন কৰিছে। ইয়াৰ পূৰ্বে বুধবাৰে তেওঁলোকে লেহ চহৰত এক পদযাত্ৰা উলিয়ায়। কাশ্মীৰতো অনুৰূপ এক পদযাত্ৰা বাহিৰ কৰা হয়। দুয়োখন ঠাইতে দিনটো শান্তিপূৰ্ণভাৱে পাৰ হয়। বৃহস্পতিবাৰে লেহকে ধৰি লাডাখৰ সকলো প্ৰান্ততে শ্বহীদ দিৱস পালনৰ বিস্তৃত কাৰ্যসূচী গ্ৰহণ কৰা হৈছে।
পূৰ্ণাংগ ৰাজ্যৰ মৰ্যাদা দাবী কৰি যোৱা বছৰ লেহ চহৰ উত্তাল হৈ পৰিছিল। প্ৰতিবাদকাৰীক নিয়ন্ত্ৰণ কৰিবলৈ আৰক্ষীয়ে গুলী চালনা কৰাত চাৰিজন লোকৰ মৃত্যু হৈছিল। সেই ঘটনাৰ পৰিপ্ৰেক্ষিতত অনশনৰত ছোনম ৱাংচুককে ধৰি ২০ জন লোকৰ বিৰুদ্ধে গুৰুতৰ ধাৰাত ৰুজু হোৱা গোচৰ বুধবাৰে লাডাখৰ লেফটেনেণ্ট গভৰ্ণৰ বিনয় কুমাৰ ছাক্সেনাই প্ৰত্যাহাৰ কৰিছে।
সামাজিক মাধ্যমত এক পোষ্টযোগে লেফটেনেণ্ট গভৰ্ণৰগৰাকীয়ে প্ৰকাশ কৰে যে লাডাখৰ শান্তি, জননিৰাপত্তা আৰু সামাজিক সম্প্ৰীতিৰ স্বাৰ্থত যোৱা বছৰ ২৪ ছেপ্টেম্বৰত লেহত সংঘটিত হোৱা দুৰ্ভাগ্যজনক হিংসাত্মক ঘটনাৰ সৈতে জড়িত ২০ জন ব্যক্তিৰ ওপৰত থকা অপৰাধমূলক গোচৰ প্ৰত্যাহাৰৰ অনুমোদন জনোৱা হৈছে। তেওঁ লগতে উল্লেখ কৰে যে এক বিতং পৰ্যালোচনাৰ অন্তত লাডাখ আৰক্ষীয়ে ভাৰতীয় নাগৰিক সুৰক্ষা সংহিতাৰ ৩৬০ ধাৰাৰ অধীনত লেহ আৰক্ষী থানাত পঞ্জীয়ন হোৱা ১৪৪/২০০৫ নম্বৰৰ এফআইআৰৰ ভিত্তিত এই ২০ জন ব্যক্তিৰ বিৰুদ্ধে এক ক্লজাৰ ৰিপৰ্টৰ পৰামৰ্শ দিছিল।
ছাক্সেনাৰ মতে, এই সিদ্ধান্তৰ ফলত উক্ত ২০ জন ব্যক্তিয়ে নিজৰ জীৱন আৰু কৰ্মক্ষেত্ৰত ইতিবাচকভাৱে আগবাঢ়ি যাব পাৰিব। দীঘলীয়া আইনী প্ৰক্ৰিয়াৰ পৰিৱৰ্তে ন্যায় আৰু আৰোগ্যক অগ্ৰাধিকাৰ দি লোৱা এই সিদ্ধান্তৰ মূল লক্ষ্য হৈছে লাডাখত এখন শান্তিপূৰ্ণ, ঐক্যবদ্ধ আৰু সম্প্ৰীতিপূৰ্ণ সমাজ গঢ়ি তোলা। যোৱা বছৰ লাডাখৰ আন্দোলনৰ আন এক প্ৰধান দাবী আছিল সংবিধানৰ ষষ্ঠ অনুসূচীৰ সুৰক্ষা প্ৰদান কৰা। লেহ এপেক্স বডীৰ অধ্যক্ষ চেৰিং দৰ্জে লাক্ৰুকে জানিবলৈ দিয়ে যে তেওঁলোকে বৃহস্পতিবাৰে শ্বহীদ দিৱস পালন কৰিব। যোৱা কেইবামাহ ধৰি লাডাখৰ পৰিস্থিতি স্বাভাৱিক হৈ আছিল যদিও বৃহস্পতিবাৰে শ্বহীদ দিৱস পালনৰ সিদ্ধান্তৰ পাছত তাত নিৰাপত্তা ব্যৱস্থা অধিক কটকটীয়া কৰা হৈছে।
লাডাখৰ জনসাধাৰণৰ সুকীয়া ৰাজ্যৰ দাবী নতুন নহয়। ২০১৯ চনত কেন্দ্ৰীয় চৰকাৰে কাশ্মীৰৰ বিশেষ মৰ্যাদা প্ৰদান কৰা সংবিধানৰ ৩৭০ অনুচ্ছেদ বাতিল কৰাৰ পাছত এই দাবী আংশিকভাৱে পূৰণ হৈছিল। সেই সময়ত জম্মু-কাশ্মীৰক এখন কেন্দ্ৰীয়শাসিত প্ৰদেশলৈ ৰূপান্তৰিত কৰা হৈছিল আৰু লগতে লেহ আৰু লাডাখক জম্মু-কাশ্মীৰৰ পৰা পৃথক কৰা হৈছিল। জম্মু-কাশ্মীৰৰ পৰা পৃথক হোৱাৰ পাছত লাডাখত সুকীয়া ৰাজ্যৰ দাবীত পুনৰ নতুনকৈ আন্দোলন আৰম্ভ হয়। এই আন্দোলনৰ পুৰোধা ব্যক্তি আছিল জলবায়ু কৰ্মী ছোনম ৱাংচুক। তেওঁক গ্ৰেপ্তাৰ কৰি লাডাখৰ বাহিৰলৈ লৈ যোৱা হৈছিল যদিও মুকলি আকাশৰ তললৈ আহি তেওঁ পুনৰ নিজৰ ঠাইলৈ উভতি আহে। বুধবাৰে লেহত অনুষ্ঠিত হোৱা কুৰি কিলোমিটাৰ জোৰা এক বিশাল পদযাত্ৰাতো ৱাংচুকেই সক্ৰিয়ভাৱে অংশগ্ৰহণ কৰি সমগ্ৰ প্ৰক্ৰিয়াটোত এক নতুন মাত্ৰা প্ৰদান কৰে।
