ভাৰতীয় ক্ৰিকেট দলৰ (টিম ইণ্ডিয়া)ৰ প্ৰাক্তন বেটছমেন বিনোদ কাম্বলিয়ে জীৱনৰ আটাইতকৈ কঠিন সময় পাৰ কৰিছে। ভাৰতীয় তাৰকাগৰাকীৰ আৰ্থিক দুৰ্দশাৰ খবৰ বহু আগতেই পোহৰলৈ আহিছিল। কিন্তু এইবাৰ অধিক হৃদয়বিদাৰক কাৰণত শিৰোনাম দখল কৰিছে প্ৰাক্তন ক্ৰিকেটাৰগৰাকীয়ে।
শেহতীয়াকৈ ছ’চিয়েল মিডিয়াত ভাইৰেল হোৱা এটা ভিডিঅ’ই অনুৰাগীক ব্যথিত কৰি তুলিছে। ভিডিঅ’টোত শচীন তেণ্ডুলকাৰৰ বন্ধু বিনোদক বৃদ্ধাশ্ৰমত বহি থকা দেখা গৈছে।
কেৱল সেয়াই নহয়, ভাইৰেল ভিডিঅ’টোত নব্বৈৰ দশকৰ আক্ৰমণাত্মক ক্ৰিকেটাৰগৰাকীয়ে নিজেই কেয়াৰ চেণ্টাৰৰ পৰিসেৱা আৰু অন্যান্য বিষয়ৰ প্ৰশংসা কৰিছে।
ছ’চিয়েল মিডিয়াত ভাইৰেল হোৱা ভিডিঅ’টোত বৃদ্ধাশ্ৰমৰ বিচনাত বহি গোলাপী ৰঙৰ চাৰ্ট আৰু ক’লা পেণ্ট পিন্ধি কাম্বলিয়ে কৈছে, “মই বৰ্তমান নিদানত আছো। ইয়াৰ সেৱাই মোক সঁচাকৈয়ে আপ্লুত কৰিছে। এই কেয়াৰ চেণ্টাৰৰ পৰিষ্কাৰ-পৰিচ্ছন্নতাৰ পৰা আৰম্ভ কৰি আন সকলো সেৱালৈকে বৰ ভাল। ইয়াত থাকোঁতে মই অনুভৱ নকৰো যে মই ঘৰত নাই। ইয়াৰ মানুহখিনিয়ে মোক নিজৰ কৰি লৈছে। মোক বহুত সন্মান কৰে আৰু ভাল পায়।”
ভাৰতীয় প্ৰাক্তন ক্ৰিকেটাৰগৰাকীৰ বৃদ্ধাশ্ৰমৰ পৰা নিৰ্মাণ কৰা ভিডিঅ’টো চাই অনুৰাগীসকল একপ্ৰকাৰ হতভম্ব হৈ পৰে। ভাৰতীয় তাৰকাগৰাকীৰ দুৰ্দশাক লৈ বহুতে দুখ প্ৰকাশ কৰিছে। বিনোদৰ শাৰীৰিক অৱস্থাক লৈ তেওঁলোক যথেষ্ট চিন্তিত। ইতিমধ্যে একাংশই ছচিয়েল মিডিয়াত প্ৰাক্তন ক্ৰিকেটাৰগৰাকীৰ বাবে চকুলো টুকিছে। ইয়াৰ পূৰ্বেও ভাৰতীয় ক্ৰিকেট অনুৰাগীসকলে কাম্বলীৰ আৰ্থিক দুৰ্দশা আৰু শাৰীৰিক অসুস্থতাক লৈ উদ্বেগ প্ৰকাশ কৰা দেখা গৈছে।
উল্লেখ্য যে বিনোদ ভাৰতীয় ক্ৰিকেট দলৰ এজন দক্ষ সদস্য আছিল। ১৯৯১ চনৰ অক্টোবৰ মাহত ভাৰতীয় দলৰ জাৰ্চি পিন্ধি আন্তঃৰাষ্ট্ৰীয় এদিনীয়া ক্ৰিকেটত অভিষেক ঘটায়। পিছলৈ এই কেৰিয়াৰত শতক অৰ্জন কৰি তেওঁ নিজৰ শক্তি প্ৰমাণ কৰিছিল।
Vinod Kambli’s latest video, he is presently at an elderly care centre in Thane.
Praying for his recovery soon. pic.twitter.com/6k1plg1aCl
— Abhishek ✨ (@ImAbhishek7_) September 25, 2026
বিনোদে টেষ্ট ক্ৰিকেটো খেলিছিল। অৱশ্যে টেষ্টত বিনোদৰ কেৰিয়াৰ বেছি দিন নিটিকিল। মাত্ৰ ২৪ বছৰ বয়সতে তেওঁৰ টেষ্ট ক্ৰিকেট যাত্ৰাৰ অন্ত পৰে। অৱশেষত ২০০০ চনত আন্তঃৰাষ্ট্ৰীয় ক্ৰিকেটৰ পৰা অৱসৰ লয় কাম্বলিয়ে। উল্লেখ্য যে প্ৰাক্তন ক্ৰিকেটাৰ বিনোদে ১৯৯২ আৰু ১৯৯৬ ক্ৰিকেট বিশ্বকাপত ভাৰতৰ হৈ খেলিছিল।
