অসমৰ কাছাৰ জিলাৰ আমৰাঘাটত গেছৰ সন্ধান পোৱাৰ পিছতে অইল এণ্ড নেচাৰেল গেছ কৰ্প’ৰেশ্যনে (অ’এনজিচি) উক্ত স্থানত অন্বেষণ আৰু উন্নয়নমূলক কাৰ্যকলাপ অধিক ক্ষিপ্ৰতৰ কৰি তুলিছে। অ’এনজিচিৰ সঞ্চালক (অনুসন্ধান) ওম প্ৰকাশ সিনহাই শেহতীয়াকৈ এই কথা প্ৰকাশ কৰিছে। অ’এনজিচিৰ কাছাৰ ফৰৱাৰ্ড বেছৰ অধীনস্থ আমৰাঘাট গেছ নিষ্কাসন প্ৰকল্প পৰিদৰ্শনৰ সময়ত তেওঁ অঞ্চলটোৰ হাইড্ৰ’কাৰ্বনৰ সম্ভাৱনীয়তা, অন্বেষণ কাৰ্যৰ অগ্ৰগতি আৰু প্ৰকল্পটোৰ কাৰিকৰী দিশসমূহৰ পৰ্যালোচনা কৰে।
সংবাদ মাধ্যমৰ আগত প্ৰতিক্ৰিয়া প্ৰকাশ কৰি সিনহাই কয় যে আমৰাঘাটত ইতিমধ্যে গেছৰ সন্ধান পোৱা গৈছে আৰু প্ৰকল্পটোৰ কাম দ্ৰুতগতিত আগবাঢ়িছে। তেওঁ জানিবলৈ দিয়া মতে, বৰ্তমান এই প্ৰকল্পটোৰ পৰা প্ৰতিদিনে এক লাখ ইউনিটতকৈ অধিক গেছ নিষ্কাসন কৰা হৈছে। অ’এনজিচিৰ ভূ-বিজ্ঞানীসকলে অঞ্চলটোৰ সম্ভাৱনীয়তাৰ মূল্যায়ন কৰিছে আৰু উৎপাদিত গেছ পৰিবহণৰ বাবে পাইপলাইন স্থাপনৰ প্ৰয়োজনীয়তাৰ কথা উল্লেখ কৰিছে। ইয়াৰ বাবে প্ৰকল্পটোৰ কাম দিনে-ৰাতিয়ে অব্যাহত আছে বুলিও তেওঁ সদৰী কৰে।
উল্লেখ্য যে, আমৰাঘাট প্ৰকল্পটো বিগত কেইবাবছৰ ধৰি নিৰ্মাণাধীন অৱস্থাত আছে। এই অঞ্চলত তেল আৰু গেছৰ অন্বেষণ, উন্নয়ন তথা উৎপাদনৰ বাবে প্ৰয়োজনীয় পৰিৱেশগত অনুমোদন ইতিমধ্যে লাভ কৰা হৈছে। সিনহাই লগতে কয় যে বৰাক উপত্যকা বিগত প্ৰায় পাঁচ দশক ধৰি গেছ উৎপাদনৰ সৈতে জড়িত হৈ আছে আৰু আমৰাঘাট প্ৰকল্পই এই অঞ্চলত অন্বেষণৰ বাবে নতুন পথ মুকলি কৰিব পাৰে।
প্ৰকল্পটোৰ জৰিয়তে স্থানীয় নিয়োগ আৰু বিনিয়োগৰ সম্ভাৱনাৰ বিষয়েও সঞ্চালকগৰাকীয়ে আলোকপাত কৰে। তেওঁ কয় যে অ’এনজিচিয়ে অঞ্চলটোৰ জনসাধাৰণৰ সৈতে মিলি কাম কৰি আছে আৰু কৰ্প’ৰেট সামাজিক দায়বদ্ধতা (চিএছআৰ) কাৰ্যসূচীৰ অধীনত স্বাস্থ্য আৰু শিক্ষা খণ্ডতো বিভিন্ন পদক্ষেপ গ্ৰহণ কৰিছে।
প্ৰকল্পস্থলী পৰিদৰ্শনৰ সময়ত সঞ্চালক ওম প্ৰকাশ সিনহাৰ সৈতে অ’এনজিচিৰ বেচিন মেনেজাৰ কে. কাৰভানন, শিলচৰ ফৰৱাৰ্ড বেছৰ মুৰব্বী তথা সাধাৰণ প্ৰবন্ধক এ কে ৱালিয়া আৰু জিএম-এলএমডিএছ এছ কে ছ’ উপস্থিত থাকে। পৰৱৰ্তী সময়ত এই প্ৰকল্পটোৱে পাইপলাইন সংযোগৰ জৰিয়তে পূৰ্ণ পৰ্যায়ত গেছ সৰবৰাহ আৰম্ভ কৰিলে সমগ্ৰ বৰাক উপত্যকাৰ অৰ্থনৈতিক আৰু ঔদ্যোগিক দৃশ্যপটত ই কেনেধৰণৰ যোগাত্মক প্ৰভাৱ পেলায়, সেয়া পৰ্যবেক্ষণৰ বিষয় হ’ব।
