বানপীড়িত ৰাইজক জৰুৰী বান সাহায্যৰ ধন বিতৰণ কৰাৰ বাবে অসম চৰকাৰক দিয়া ১ অক্টোবৰৰ সময়সীমা উকলি যোৱাৰ পাছতো ধন অবমুক্ত নকৰাৰ প্ৰতিবাদত অহা ২ অক্টোবৰ, ২০২৬-ৰ পৰা সমগ্ৰ ৰাজ্যজুৰি অনিশ্চিতকালীন প্ৰতিবাদী আন্দোলন আৰম্ভ কৰাৰ ঘোষণা কৰিছে শিৱসাগৰ বিধানসভা সমষ্টিৰ বিধায়ক তথা ৰাইজৰ দলৰ সভাপতি অখিল গগৈয়ে।
যোৱা ২৩ ছেপ্টেম্বৰত গুৱাহাটীৰ চচল ধৰ্ণা স্থলীত অনুষ্ঠিত এক বৃহৎ ৰাজহুৱা সমাৱেশত বানপীড়িত ৰাইজক জৰুৰী বিত্তীয় সাহায্য আৰু ক্ষতিপূৰণ প্ৰদানৰ দাবীত চৰকাৰক এই সময়সীমা বান্ধি দিয়া হৈছিল।
মূল দাবী আৰু বৰ্তমানৰ সাহায্যৰ স্থিতি
১৫,০০০ টকাৰ অন্তৱৰ্তীকালীন বিত্তীয় সাহায্য: চাৰিখন প্ৰধান জিলা— শিৱসাগৰ, চৰাইদেউ, যোৰহাট আৰু গোলাঘাটৰ প্ৰায় ৩০% ৰ পৰা ৪০% বানপীড়িত পৰিয়ালে এতিয়ালৈকে কোনো সাহায্য লাভ কৰা নাই।
অতিৰিক্ত ১০,০০০ টকাৰ বিশেষ সাহায্য: আটাইতকৈ বেছি ক্ষতিগ্ৰস্ত দুখন জিলা— শিৱসাগৰ আৰু চৰাইদেউৰ এজনো বানপীড়িত মানুহক এই প্ৰতিশ্ৰুত অতিৰিক্ত সাহায্য প্ৰদান কৰা হোৱা নাই।
পূৰ্ণাংগ ক্ষতিপূৰণ: চাৰিওখন জিলাৰ ভয়াৱহভাৱে ক্ষতিগ্ৰস্ত প্ৰতিটো পৰিয়ালক ১০ লাখ টকাকৈ ক্ষতিপূৰণ প্ৰদানৰ দাবী এতিয়াও বাহাল আছে।
মুখ্যমন্ত্ৰী ড° হিমন্ত বিশ্ব শৰ্মালৈ প্ৰেৰণ কৰা এক আনুষ্ঠানিক পত্ৰত বিধায়ক গগৈয়ে হাজাৰ হাজাৰ বাস্তুহাৰা পৰিয়ালৰ দুৰৱস্থাৰ কথা আঙুলিয়াই দিয়ে। তেওঁ স্পষ্ট কৰি দিয়ে যে প্ৰতিটো ক্ষতিগ্ৰস্ত পৰিয়ালে তেওঁলোকৰ সম্পূৰ্ণ বিত্তীয় সাহায্য নোপোৱালৈকে এই আন্দোলন অব্যাহত থাকিব।
অখিল গগৈয়ে কয়, “চৰকাৰৰ সময়সীমা পাৰ হ’ল, কিন্তু আধা অংশ বানপীড়িত ৰাইজ আজিলৈকে খালী হাতেৰে ৰ’ল। আমি আমাৰ ৰাইজৰ অধিকাৰ আৰু অস্তিত্ব ৰক্ষাৰ বাবে গান্ধী জয়ন্তীৰ দিনটোৰ পৰাই গণতান্ত্ৰিকভাৱে এই আন্দোলন আৰম্ভ কৰিম।”
