চেন্নাইৰ এখন চৰকাৰী বাছত শুকুৰবাৰে পুৱা সদায় দেখা পোৱা কণ্ডাক্টৰজনৰ সলনি স্বয়ং মুখ্যমন্ত্ৰীক টিকট বিতৰণ কৰি থকা দেখি আচৰিত হৈ পৰে যাত্ৰীসকল। তামিলনাড়ুৰ মুখ্যমন্ত্ৰী চি. জোছেফ বিজয়ে চহৰৰ বাছখনত উঠি মহিলাসকলৰ হাতত বিনামূলীয়া যাত্ৰাৰ টিকট তুলি দিয়ে। ৰাজ্য চৰকাৰৰ গুৰুত্বপূৰ্ণ ‘ভেট্ৰি পয়নম’ (বিজয়ৰ যাত্ৰা) প্ৰকল্পৰ পৰিসৰ বৃদ্ধিৰ শুভাৰম্ভ কৰিবলৈ গৈয়েই তেওঁ এই ব্যতিক্ৰমী ৰূপত অৱতীৰ্ণ হয়। বাছখনৰ ভিতৰত সাধাৰণ যাত্ৰীসকলৰ সৈতে হাঁহিমুখে মত-বিনিময় কৰাৰ লগতে তেওঁ নিজে টিকট বিতৰণ কৰে। বাছত থকা কলেজীয়া ছাত্ৰ-ছাত্ৰীসকলে আনন্দ মনেৰে মুখ্যমন্ত্ৰীৰ সৈতে চকলেট ভাগ-বাটোৱাৰা কৰি খায়, যিয়ে মুহূৰ্ততে বাছখনৰ পৰিৱেশ অধিক উমাল কৰি তোলে।
মহিলা, পিছপৰা শ্ৰেণী আৰু তৃতীয় লিংগৰ লোকসকলৰ বাবে প্ৰযোজ্য এই ‘ভেট্ৰি পয়নম’ প্ৰকল্পৰ পৰিসৰ এইবাৰ তামিলনাড়ু চৰকাৰে যথেষ্ট সম্প্ৰসাৰণ কৰিছে। এতিয়াৰ পৰা ৰাজ্যখনৰ সাতটা পৰিবহণ নিগমৰ অধীনৰ মুঠ ১২,৬৯৫ খন বাছত হিতাধিকাৰীসকলে সম্পূৰ্ণ বিনামূলীয়াকৈ যাত্ৰা কৰিব পাৰিব। পূৰ্বতে কেৱল নিৰ্বাচিত সাধাৰণ বাছতহে এই সুবিধা আছিল যদিও বৰ্তমান এক্সপ্ৰেছ, ডিলাক্স, মফচলীয় আৰু পাহাৰীয়া অঞ্চলৰ নিৰ্দিষ্ট বাছতো এই ৰেহাই লাভ কৰা যাব। এই সুবিধা লাভ কৰাৰ বাবে কোনো আয়ৰ সীমা বান্ধি দিয়া হোৱা নাই আৰু দিনটোত যিমানবাৰ ইচ্ছা সিমানবাৰ বিনামূলীয়াকৈ যাত্ৰা কৰিব পাৰিব। চৰকাৰী হিচাপ মতে, এই প্ৰকল্প সম্প্ৰসাৰণৰ ফলত প্ৰতিদিনে ৰাজ্যখনৰ প্ৰায় ৮৪ লাখ ৩২ হাজাৰ মহিলা উপকৃত হ’ব।
সাধাৰণ মানুহৰ সৈতে সহজে মিলি যোৱাৰ বাবে পৰিচিত বিজয়ে এইদৰে জনসাধাৰণৰ কাষ চপা কাৰ্য এইটোৱেই প্ৰথমবাৰ নহয়। ইয়াৰ পূৰ্বেও সচিবালয়ৰ পৰা পেৰাম্বুৰলৈ বাছৰ সাধাৰণ আসনত বহি নিজে পইচা দি টিকট কাটি যাতায়াত কৰি তেওঁ নিজৰ সৰলতাৰ পৰিচয় দিছিল। ইয়াৰ উপৰি মেত্তুৰ ভ্ৰমণৰ সময়ত বাটৰ কাষৰ ফাৰ্ম হাউছত হঠাৎ গাড়ী ৰখাই বয়োজ্যেষ্ঠ লোকসকলৰ সৈতে কথা পতা অথবা হাঁহিমুখে নিজৰ বহুমূলীয়া চশমাযোৰ এগৰাকী বৃদ্ধা মহিলাক পিন্ধাই দিয়াৰ দৃশ্য ছচিয়েল মিডিয়াত বহুলভাৱে চৰ্চিত হৈছিল। শুকুৰবাৰে বাছৰ কণ্ডাক্টৰৰ ভূমিকাত অৱতীৰ্ণ হৈ টিকট বিতৰণ কৰা এই দৃশ্যই আকৌ এবাৰ তেওঁৰ সাধাৰণ আৰু সৰল স্বভাৱটোকে সকলোৰে মাজত তুলি ধৰিলে।
