পাকিস্তানলৈ ভাৰতীয় নৌসেনা আৰু নিৰাপত্তা সম্পৰ্কীয় গোপন তথ্য সৰবৰাহ কৰাৰ গুৰুতৰ অভিযোগত অন্ধ্ৰপ্ৰদেশৰ কাউণ্টাৰ ইণ্টেলিজেন্স চেলে সমগ্ৰ দেশজুৰি এক ব্যাপক অভিযান আৰম্ভ কৰিছে। ‘অপাৰেচন ফায়াৰৱাল ২০২৬’ নামৰ এই অভিযানৰ অধীনত ১৩ গৰাকী নৌসেনা কৰ্মীসহ মুঠ ১৮ জন সন্দেহযুক্ত লোকৰ বিৰুদ্ধে দেশৰ ১০ খন ৰাজ্য আৰু কেন্দ্ৰীয় শাসিত অঞ্চলত তল্লাচী চলোৱা হৈছে। শেহতীয়াকৈ তামিলনাডুৰ কইম্বাটুৰৰ পৰা প্ৰদীপ মুখাৰ্জী নামৰ পশ্চিমবংগৰ বাসিন্দা এগৰাকী নৌসেনা কৰ্মীক আৰু অন্ধ্ৰপ্ৰদেশৰ পৰা আন্নাম ছাই ভাৰা প্ৰসাদ নামৰ আন এজনক গ্ৰেপ্তাৰ কৰাৰ পাছতেই এই সমগ্ৰ গুপ্তচৰ চক্ৰটো পোহৰলৈ আহে।
সূত্ৰই প্ৰকাশ কৰা অনুসৰি, ১২ টা সুকীয়া দলত বিভক্ত হৈ কাউণ্টাৰ ইণ্টেলিজেন্সৰ বিষয়াসকলে অন্ধ্ৰপ্ৰদেশ, কেৰালা, কৰ্ণাটক, মহাৰাষ্ট্ৰ, গোৱা, দিল্লী, গুজৰাট, তামিলনাডু, বিহাৰ আৰু ছত্তীশগড়ত এই অভিযান চলাই আছে। প্ৰধানকৈ অন্ধ্ৰপ্ৰদেশৰ বিশাখাপট্টনম নৌসেনা ঘাটিৰ পৰা গুপ্তচৰাগিৰিৰ অভিযোগত প্ৰথমজন নৌসেনা কৰ্মী গ্ৰেপ্তাৰ হোৱাৰ পাছতেই এই তল্লাচী অভিযান তীব্ৰতৰ কৰি তোলা হৈছিল। তদন্তকাৰী বিষয়াসকলে দাবী কৰিছে যে অভিযুক্তসকলে মূলতঃ ‘এনক্ৰিপ্টেড’ প্লেটফৰ্মৰ জৰিয়তে পাকিস্তানৰ হেণ্ডলাৰ বা গোৱেন্দাসকলৰ সৈতে যোগাযোগ ৰক্ষা কৰিছিল আৰু বিশাখাপট্টনম নৌসেনা ঘাটিসহ দেশৰ আন কেইবাটাও প্ৰান্তৰ সামৰিক তথা নিৰাপত্তাজনিত গোপন খবৰ ফাদিল কৰিছিল। নৌসেনাৰ বিষয়া, সন্ত্ৰাসবাদ বিৰোধী শাখা আৰু স্থানীয় আৰক্ষী প্ৰশাসনৰ সহযোগত এই ১৮ জন সন্দেহযুক্ত লোকৰ ঠিকনাত চলোৱা তল্লাচীত ইতিমধ্যে কেইবাখনো গুৰুত্বপূৰ্ণ নথিপত্ৰ, ইলেক্ট্ৰনিক সামগ্ৰী আৰু মোবাইল ফোন জব্দ কৰা হৈছে।
ইতিমধ্যে গ্ৰেপ্তাৰ হোৱা প্ৰদীপ মুখাৰ্জী আৰু নৌসেনা বিষয়াৰ বাহনৰ চালক হিচাপে কৰ্মৰত আন্নাম ছাই ভাৰা প্ৰসাদে বৃহৎ পৰিমাণৰ ধনৰ বিনিময়ত পাকিস্তানলৈ এই তথ্যসমূহ সৰবৰাহ কৰা বুলি অভিযোগ উত্থাপন হৈছে। আদালতত হাজিৰ কৰোৱাৰ পাছত প্ৰদীপ মুখাৰ্জীক অহা ১৪ অক্টোবৰলৈকে ন্যায়িক জিম্মালৈ প্ৰেৰণ কৰা হৈছে। বৰ্তমান কাউণ্টাৰ ইণ্টেলিজেন্স চেলে বাকী ১৬ জন সন্দেহযুক্ত লোকৰ বিৰুদ্ধে জেৰা আৰু অনুসন্ধান প্ৰক্ৰিয়া অব্যাহত ৰাখিছে, যাৰ জৰিয়তে এই সমগ্ৰ চক্ৰটোৰ লগত জড়িত আন তথ্য পোহৰলৈ অহাৰ সম্ভাৱনা আছে।
