গুৱাহাটীৰ ব্যস্ত ৰাজপথত আজি প্ৰশাসনিক ব্যৱস্থাৰ এক দ্বি-মুখী তথা স্বৈৰাচাৰী ৰূপ অতি স্পষ্টভাৱে প্ৰকাশ পালে। এদিনতে মহানগৰীৰ বুকুত ঘটিল দুটা বিপৰীতধৰ্মী ঘটনা, যিয়ে ৰাজ্যৰ শাসন ব্যৱস্থাত সাধাৰণ নাগৰিক আৰু বিৰোধীৰ প্ৰতি থকা চৰকাৰী দৃষ্টিভংগী উদঙাই দিলে। শাসকীয় দলৰ কাৰ্যসূচীৰ বাবে মহানগৰীৰ পথ মুকলি হৈ থাকিল যদিও বানাক্ৰান্তৰ ন্যায় বিচাৰি ওলোৱা বিৰোধী দলৰ সমদলক আৰক্ষীৰ শক্তিৰে আধাপথতেই ৰুদ্ধ কৰা হ’ল।
আজি বিজেপি দলৰ তৰফৰ পৰা গুৱাহাটীত উলিওৱা হৈছিল সেৱা জ্যোতি কলহ যাত্ৰা। দিনৰ ব্যস্ত সময়ত ৰাজপথত এই দলীয় সমদলৰ বাবে তীব্ৰ যান-জঁটৰ সৃষ্টি হয় আৰু সাধাৰণ জনজীৱন ব্যাহত হৈ পৰে। কিন্তু আশ্চৰ্যজনকভাৱে এই দলীয় কাৰ্যসূচীক প্ৰশাসনে সম্পূৰ্ণ সহযোগিতা আগবঢ়ায়, যাৰ ফলত ৰাজপথ যেন শাসকীয় দলৰ এক পৈতৃক সম্পত্তি বুলিহে সাধাৰণ ৰাইজে অনুভৱ কৰিবলগীয়া হ’ল।
ইফালে, ইয়াৰ ঠিক বিপৰীত ছবিখন দেখা গ’ল উলুবাৰীত। উজনি অসমৰ বানত সৰ্বস্বান্ত হোৱা লাখ লাখ দুৰ্ভগীয়া জনতাৰ উচিত ক্ষতিপূৰণ আৰু সাহাৰ্যৰ দাবীত চিপিআই (এম)-ৰ নেতৃত্বত এক শান্তিপূৰ্ণ প্ৰতিবাদী সমদল উলিওৱা হৈছিল। মুখ্যমন্ত্ৰীক স্মাৰকপত্ৰ প্ৰদান কৰাৰ উদ্দেশ্যে আগবাঢ়ি যোৱা এই গণতান্ত্ৰিক সমদলটোক হিমন্ত বিশ্ব শৰ্মা চৰকাৰৰ আৰক্ষী বাহিনীয়ে বাটতেই বাধা প্ৰদান কৰে।
স্মাৰকপত্ৰ গ্ৰহণ কৰাটো দূৰৰ কথা, প্ৰতিবাদকাৰীসকলক ৰাজপথতে বলপূৰ্বকভাৱে আটক কৰি চচলৰ নিৰ্ধাৰিত প্ৰতিবাদস্থলী চৌহদত আবদ্ধ কৰি ৰখা হয়। বালি আৰু কয়লা মাফিয়াৰ দালাল বুলি চৰকাৰক কটাক্ষ কৰি প্ৰতিবাদকাৰীসকলে কয় যে বানাক্ৰান্তৰ ন্যায় বিচাৰি মাত মাতিলেই আৰক্ষীৰ দমনমূলক নীতিৰ সন্মুখীন হ’ব লাগে।
এতিয়া প্ৰশ্ন উঠিছে যে চৰকাৰী পৃষ্ঠপোষকতাত চলা দলীয় প্ৰচাৰ আৰু চমকবাজীৰ বাবে ৰাজপথ বন্ধ কৰাটো যদি প্ৰশাসনৰ দৃষ্টিত বৈধ, তেন্তে বানাক্ৰান্ত মেহনতী জনতাৰ ন্যায্য দাবী উত্থাপন কৰাটো কিয় অপৰাধ হ’ব? বিৰোধীৰ সাংবিধানিক কণ্ঠক আৰক্ষীৰ লাঠীৰে স্তব্ধ কৰি শাসকীয় দলক অবাধ ৰেহাই দিয়া এই ঘটনাই অসমত চলি থকা একনায়কত্ববাদী শাসন ব্যৱস্থাকে অতি স্পষ্টভাৱে প্ৰতিফলিত কৰিছে।
