নগাঁও লোকসভা সমষ্টিৰ শেহতীয়া উপ-নিৰ্বাচনক লৈ ৰাজ্যৰ ৰাজনৈতিক মহল বৰ্তমান উত্তপ্ত হৈ পৰিছে। সমগ্ৰ নিৰ্বাচনী প্ৰক্ৰিয়াত ব্যাপক খেলিমেলি, ৰিগিং, বিৰোধীৰ ওপৰত আক্ৰমণ আৰু প্ৰশাসনৰ পক্ষপাতিত্বৰ গুৰুতৰ অভিযোগ উত্থাপন কৰিছে ধুবুৰীৰ সাংসদ ৰকিবুল হুছেইনে।
নগাঁৱত অনুষ্ঠিত এখন জৰুৰী সংবাদমেলত কংগ্ৰেছ প্ৰাৰ্থী শিৱামণি বৰা আৰু জিলা কংগ্ৰেছৰ সভানেত্ৰী ৰুণুমনি বৰাৰ উপস্থিতিত সাংসদগৰাকীয়ে নিৰ্বাচন আয়োগৰ তৎকালীন হস্তক্ষেপ দাবী কৰে। গণতন্ত্ৰ আৰু সাধাৰণ ভোটাৰৰ অধিকাৰ ৰক্ষাৰ স্বাৰ্থত কংগ্ৰেছ দল সদায় সষ্টম বুলি উল্লেখ কৰি তেওঁ কয় যে এইবাৰৰ উপ-নিৰ্বাচনত নিকা নিৰ্বাচনৰ সকলো আশা সম্পূৰ্ণৰূপে ধূলিসাৎ কৰা হ’ল।
সাংসদগৰাকীয়ে নগাঁও জিলাৰ প্ৰাক্তন উপায়ুক্ত তথা বৰ্তমানৰ শাসকীয় দলৰ প্ৰাৰ্থী দেবাশীষ শৰ্মাক লক্ষ্য কৰি তীব্ৰ সমালোচনা কৰে। তেওঁ অভিযোগ কৰে যে উপায়ুক্ত হৈ থকা সময়তেই শৰ্মাই নিৰ্বাচনৰ এক গোপন ব্লুপ্ৰিণ্ট তৈয়াৰ কৰিছিল আৰু নিজৰ সুবিধা অনুসৰি আৰক্ষী তথা নিৰ্বাচনী বিষয়াসকলক নিযুক্তি দিছিল। নিৰ্বাচন ঘোষণাৰ মাত্ৰ কেইদিনমান আগতে পদত্যাগ কৰি তেওঁ প্ৰাৰ্থিত্ব গ্ৰহণ কৰে। হুছেইনে আক্ষেপ কৰি কয় যে আগতে কেৱল ভূতৰ ভোট বা বুথ দখলৰ কথাহে শুনা গৈছিল, কিন্তু এইবাৰ যেন সমগ্ৰ নিৰ্বাচনী ব্যৱস্থাটোকেই অপহৰণ কৰা হ’ল। নিৰ্বাচন আয়োগক এই বিষয়ে আগতেই জনোৱা হৈছিল যদিও প্ৰশাসনৰ একেই প্ৰক্ৰিয়াৰ মাজেৰেই নিৰ্বাচন অনুষ্ঠিত হোৱাত তেওঁ ক্ষোভ প্ৰকাশ কৰে।
নিৰ্বাচনী প্ৰচাৰ আৰু ভোটগ্ৰহণৰ সময়ত বিৰোধী দলৰ নেতাসকলৰ ওপৰত চলোৱা আক্ৰমণৰ কথাও সংবাদমেলত পোহৰলৈ আহে। ছত্তীশগড়ৰ প্ৰাক্তন মুখ্যমন্ত্ৰী ভূপেশ বাঘেল, সাংসদ গৌৰৱ গগৈ আৰু প্ৰাৰ্থী শিৱামণি বৰাৰ দৰে নেতাসকল নিৰ্বাচনী কামত গৈ থকা অৱস্থাত প্ৰশাসনৰ উপস্থিতিতেই আক্ৰমণৰ বলি হ’বলগীয়া হৈছিল বুলি হুছেইনে প্ৰকাশ কৰে। এই বিষয়ে আৰক্ষী অধীক্ষক আৰু ৰিটাৰ্ণিং বিষয়াক বাৰে বাৰে অৱগত কৰাৰ পাছতো কোনো সুৰক্ষা প্ৰদান কৰা নহ’ল বুলি তেওঁ জনায়। আনকি গান্ধীজীৰ প্ৰতিমূৰ্তিৰ সন্মুখত কৰিবলৈ লোৱা শান্তিপূৰ্ণ প্ৰতিবাদকো আৰক্ষী লগাই বলপূৰ্বকভাৱে আঁতৰাই দিয়া হৈছিল বুলি তেওঁ অভিযোগ কৰে।
ভোটগ্ৰহণৰ দিনা সংঘটিত হোৱা ব্যাপক অনিয়মৰ বিৱৰণ দি সাংসদগৰাকীয়ে কয় যে ভোটদানৰ আগনিশা আৰু নিৰ্বাচনৰ দিনা শাসকীয় দলৰ একাংশ নেতাই বুথ দখলৰ দৰে কাৰ্যত লিপ্ত হৈছিল। চামগুৰিৰ হাতীপুখুৰী, বৰঘাট আদি বিভিন্ন ভোটকেন্দ্ৰত বাহিৰৰ পৰা অহা লোকে প্ৰৱেশ কৰি আতংকময় পৰিৱেশৰ সৃষ্টি কৰিছিল। আনকি কংগ্ৰেছৰ পোলিং এজেণ্টজনক গাড়ীৰে অপহৰণ কৰি প্ৰাণে মৰাৰ ভাবুকি দিয়াৰ দৰে গুৰুতৰ অভিযোগো তেওঁ উত্থাপন কৰে। আৰক্ষী থানা ওচৰতে থকাৰ পাছতো আৰক্ষীয়ে কোনো ব্যৱস্থা গ্ৰহণ নকৰিলে আৰু কংগ্ৰেছৰ প্ৰতিনিধিক অভিযোগ দাখিল কৰিবলৈকো বাধা প্ৰদান কৰা হ’ল বুলি তেওঁ জনায়। সমগ্ৰ নিৰীক্ষণ ব্যৱস্থাটো এক প্ৰহসনত পৰিণত হোৱা বুলিও তেওঁ আক্ষেপ কৰে।
নিৰ্বাচনত অৱতীৰ্ণ হোৱা পোন্ধৰজন প্ৰাৰ্থীৰ ভিতৰত বেছিভাগেই দামী প্ৰাৰ্থী আছিল বুলি উল্লেখ কৰি তেওঁ কয় যে ভোটগণনাৰ সময়ত প্ৰতিটো টেবুলত অধিক এজেণ্ট বহুওৱাৰ উদ্দেশ্যেই এই অপৰাধমূলক কৌশল ৰচনা কৰা হৈছিল। ইয়াৰ উপৰিও ভোটদানৰ অস্বাভাৱিক হাৰক লৈ প্ৰশ্ন তুলি তেওঁ কয় যে চামগুৰিৰ প্ৰায় বিশৰ পৰা পঁচিশ শতাংশ লোক কৰ্মসূত্ৰে বহিঃৰাজ্যত থাকে। তেনে অৱস্থাত আশী শতাংশতকৈ অধিক ভোটদান হোৱাটোৱে ব্যাপক ভুৱা ভোটৰ প্ৰমাণ দিয়ে। এই সকলোবোৰ অনিয়মৰ উচিত তদন্তৰ লগতে সমগ্ৰ প্ৰক্ৰিয়াটোত জড়িত বৰ্তমানৰ জিলা আয়ুক্তৰ অপসাৰণ আৰু ৰিগিং হোৱা কেন্দ্ৰসমূহত তৎকালীনভাৱে পুনৰ ভোটগ্ৰহণৰ বাবে কংগ্ৰেছ দলে নিৰ্বাচন আয়োগৰ ওচৰত দাবী জনাইছে।
