দিল্লীত মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত ককৰোচ জনতা পাৰ্টিৰ প্ৰতিবাদৰ বিৰুদ্ধে আৰক্ষীৰ ব্যাপক দমন অভিযান চলে। এই ঘটনাক লৈ উদ্বিগ্ন হৈ পৰিছে ৰাষ্ট্ৰসংঘৰ মানৱ অধিকাৰ আয়োগ।
শনিবাৰে ৰাষ্ট্ৰসংঘই এক বিবৃতি প্ৰকাশ কৰি দিল্লী আৰক্ষীৰ কাৰ্যকলাপ আৰু গণ আটকক লৈ উদ্বেগ প্ৰকাশ কৰে। ইয়াত কোৱা হৈছে যে এই প্ৰতিবাদৰ সময়ত আৰক্ষীয়ে আটক কৰি ৰখাসকলক শীঘ্ৰে আৰু নিঃচৰ্তভাৱে মুকলি কৰি দিব লাগে।
শনিবাৰে নিশা ৰাষ্ট্ৰসংঘৰ মানৱ অধিকাৰ আয়োগৰ মুখপাত্ৰ থামিন আল-খিতানে দিল্লীৰ ঘটনা সন্দৰ্ভত এক বিবৃতি প্ৰকাশ কৰে। ইয়াত লিখা হৈছে, ‘আজি দিল্লীত হোৱা ব্যাপক প্ৰতিবাদৰ সময়ত আৰু ইয়াৰ পূৰ্বে বৃহৎ সংখ্যক প্ৰতিবাদকাৰী, প্ৰতিবাদী নেতা, নাগৰিক অধিবক্তা আৰু সাংবাদিকক আটক কৰি ৰখা হৈছে। এই ঘটনাক লৈ আমি গভীৰভাৱে চিন্তিত।’
এই সন্দৰ্ভত ৰাষ্ট্ৰসংঘই ৩টা বিষয়ৰ ওপৰত আলোকপাত কৰিছে-
১.শান্তিপূৰ্ণভাৱে সমাৱেশৰ অধিকাৰ সম্পূৰ্ণৰূপে সন্মান কৰিব লাগিব। যদি প্ৰতিবাদত কোনো ধৰণৰ নিষেধাজ্ঞা আৰোপ কৰা হয়, তেন্তে সেই ব্যৱস্থা গ্ৰহণৰ সিদ্ধান্ত কঠোৰ পৰীক্ষাৰে পাৰ হ’ব লাগিব।
২) ভাৰতৰ গণতান্ত্ৰিক পৰম্পৰা আৰু মানৱ অধিকাৰৰ বাধ্যবাধকতাৰ সৈতে সামঞ্জস্যপূৰ্ণভাৱে আইন প্ৰয়োগকাৰী সংস্থাসমূহে চৰম সংযম পালন কৰিব লাগে।
৩) যিসকলক নিৰ্বিচাৰে আটক কৰা হৈছে তেওঁলোকক তৎক্ষণাত আৰু নিঃচৰ্তভাৱে মুকলি কৰি দিব লাগে।
ৰাষ্ট্ৰসংঘই লগতে কয় যে প্ৰতিবাদকাৰীসকলৰ যি কাৰণত উদ্বেগ প্ৰকাশ কৰিছে তেওঁলোকৰ সেই উদ্বেগসমূহ সমাধানৰ বাবে কৰ্তৃপক্ষই আলোচনাত বহিব লাগে আৰু উদ্বেগসমূহ দূৰ কৰিব লাগে।
উল্লেখ্য যে যন্তৰ মন্তৰত ককৰোচ জনতা পাৰ্টিয়ে আহ্বান জনোৱা প্ৰতিবাদৰ পূৰ্বে শনিবাৰে দিল্লী আৰক্ষীয়ে অভিযানত নামিছিল। চিজেপি নেতা অভিজিৎ দীপকে, সৌৰভ দাস আৰু আশুতোষ ৰাংকাক একেদিনাই বিমানবন্দৰত আটক কৰা হয়।
জানিব পৰা মতে, ইয়াৰ পিছতে চাৰিজন প্ৰাক্তন মুখ্যমন্ত্ৰী অৰবিন্দ কেজৰিৱাল, মমতা বেনাৰ্জী, পিনাৰায়ী বিজয়ন আৰু মাণিক সৰকাৰ, বিৰোধী নেতা, অধিবক্তা আৰু সাংবাদিককে ধৰি ৩০০০ৰ পৰা ৭০০০ লোকক আটক কৰা হৈছে।
এই ব্যাপক দমন কাৰ্যক লৈ ৰাষ্ট্ৰসংঘই উদ্বেগ প্ৰকাশ কৰি তেওঁলোকক মুক্তিৰ দাবী জনাইছে।
