দেওবাৰে যন্তৰ মন্তৰত দ্বিতীয় দিনৰ প্ৰতিবাদ অনুষ্ঠিত হোৱাৰ পূৰ্বে কঠোৰ ব্যৱস্থা গ্ৰহণ কৰিলে দিল্লী আৰক্ষী প্ৰশাসনে। সূত্ৰৰ পৰা জানিব পৰা মতে, যন্তৰ মন্তৰত সমাৱেশৰ আহ্বান জনোৱাৰ অভিযোগত তিনিজন প্ৰতিবাদকাৰীক আৰক্ষীয়ে সতৰ্কতামূলক (Preventive Arrest) গ্ৰেপ্তাৰ কৰিছে।
গ্ৰেপ্তাৰ হোৱাসকলৰ ভিতৰত আছে চিজেপিৰ অন্যতম মূল মুখ অভিজিৎ দীপকে আৰু দলটোৰ আন দুজন গুৰুত্বপূৰ্ণ নেতা সৌৰভ দাস আৰু আশুতোষ ৰাংকা। কোৱা হৈছে যে ৰাজধানীত যাতে কোনো নতুন উত্তেজনা বৃদ্ধি নহয় তাৰ বাবে এই গ্ৰেপ্তাৰ কৰা হৈছে।
শনিবাৰে দিল্লী বিমানবন্দৰত বিমানৰ ভিতৰৰ পৰা তেওঁলোকক গ্ৰেপ্তাৰ কৰে। তিনিওজনকে আজি অৰ্থাৎ দেওবাৰে দিল্লী কেন্টনমেন্টৰ কাৰ্যবাহী দণ্ডাধীশৰ সন্মুখত হাজিৰ কৰা হ’ব। অধিবক্তা বৃন্দা গ্ৰ’ভাৰৰ নেতৃত্বত গঠিত এটা দলে চিজেপি তিনিজন নেতাৰ হৈ আইনী যুঁজ যুঁজিব।
আনহাতে, নেতাসকল জিম্মাত থাকিলেও চিজেপিয়ে প্ৰতিবাদ বন্ধ কৰিবলৈ অনিচ্ছুক। আন এগৰাকী দলীয় নেতা অজিংকা শিণ্ডেয়ে কয় যে দেওবাৰেও প্ৰতিবাদকাৰীসকল যন্তৰ মন্তৰৰ দিশে আগবাঢ়িব।
নিৰ্বাচন আয়োগৰ বিশেষ ব্যাপক পুনৰীক্ষণ প্ৰক্ৰিয়াত বিসংগতি আৰু ভোটাৰ তালিকাৰ পৰা প্ৰায় ১৩ কোটি নাগৰিকৰ নাম বাদ পৰাৰ লগতে জালিয়াতিৰ অভিযোগ উত্থাপন কৰিছে চিজেপিয়ে। এই অনিয়মৰ বাবে মুখ্য নিৰ্বাচন আয়ুক্ত জ্ঞানেশ কুমাৰে পদত্যাগ নকৰালৈকে আন্দোলন বন্ধ নহ’ব বুলি চিজেপিয়ে সকীয়াই দিছে।
আন্দোলনৰ প্ৰথম দিনাই ৰাজধানীখন কাৰ্যতঃ অৱৰোধ কৰি ৰখা হৈছিল। প্ৰতিবাদ ৰোধৰ বাবে দিল্লীত কটকটীয়া নিৰাপত্তাৰক্ষীৰ বেৰিকেড স্থাপন কৰা হয়। ফলত মহানগৰীৰ বিভিন্ন প্ৰান্তত বৃহৎ সমাৱেশৰ পৰিৱৰ্তে সৰু সৰু গোটৰ প্ৰতিবাদ আৰম্ভ হয়।
শনিবাৰে আৰক্ষীয়ে ৰাজনৈতিক ব্যক্তিকে ধৰি হাজাৰৰো অধিক প্ৰতিবাদকাৰীক আটক কৰে। ইয়াৰ ভিতৰত আছিল চাৰিজন প্ৰাক্তন মুখ্যমন্ত্ৰী – আপৰ মুৰব্বী অৰবিন্দ কেজৰিৱাল, তৃণমূল নেত্ৰী মমতা বেনাৰ্জী আৰু বাওঁপন্থী নেতা পিনাৰায়ী বিজয়ন আৰু মাণিক সৰকাৰ।
অৱশ্যে বন্দী প্ৰতিবাদকাৰীৰ অধিকাংশকে নিশা মুকলি কৰি দিয়া হয়। আনকি আন্দোলন আৰু এন ডি এ চৰকাৰৰ তীব্ৰ সমালোচক ইউটিউবাৰ ধ্ৰুৱ ৰাথীকো শনিবাৰে নিশা নিজৰ বাসগৃহৰ পৰা আটক কৰি ৰখাৰ পিছত মুকলি কৰি দিয়া হয়।
ইফালে, প্ৰতিবাদ ৰোধ কৰিবলৈ শনিবাৰে একেলগে ৰে’ল বাতিল আৰু মেট্ৰ’ ষ্টেচন বন্ধ কৰি দিয়াটোৱে জটিলতাৰ সৃষ্টি কৰিছে। শুকুৰবাৰে ভাৰতৰ মুখ্য ন্যায়াধীশ সূৰ্য কান্ত, ন্যায়াধীশ জয়মল্য বাগচী আৰু ন্যায়াধীশ ভি মোহনাৰ বিচাৰপীঠে মেট্ৰ’ সেৱা সম্পূৰ্ণৰূপে বন্ধ কৰিব নোৱাৰিব বুলি নিৰ্দেশ দিছিল। আদালতৰ নিৰ্দেশ উলংঘা কৰি ৰাজহুৱা পৰিবহণ বন্ধ কৰাৰ বিৰুদ্ধে অৱমাননাৰ গোচৰ ৰুজু কৰা হৈছে। সেই গোচৰৰ পৰিপ্ৰেক্ষিতত আজি উচ্চতম ন্যায়ালয়ত বিশেষ শুনানিৰ দিন ধাৰ্য কৰা হৈছে।
দেওবাৰে পুৱাৰ পৰা মেট্ৰ’ সেৱা স্বাভাৱিক হৈ পৰিছে যদিও প্ৰতিটো ষ্টেচনৰ প্ৰৱেশ আৰু প্ৰস্থান পইণ্টত বৃহৎ আৰক্ষী বাহিনী মোতায়েন কৰা হৈছে। নতুনকৈ সমাৱেশৰ বাবে চিজেপিৰ আহ্বানৰ পৰিপ্ৰেক্ষিতত আজি সমগ্ৰ ৰাজধানীত প্ৰশাসনে কঠোৰ সতৰ্কতা অব্যাহত ৰাখিছে।
