মুখ্য নিৰ্বাচন আয়ুক্ত জ্ঞানেশ কুমাৰক লৈ এক নতুন দাবী উত্থাপন কৰিছে কংগ্ৰেছ নেতা তথা লোকসভাৰ বিৰোধী দলপতি ৰাহুল গান্ধীয়ে। জ্ঞানেশ কুমাৰৰ পৰা তেওঁ নিয়মীয়াকৈ বাৰ্তা লাভ কৰে বুলি দাবী কৰি ৰাহুলে কয় যে তেওঁ জ্ঞানেশ কুমাৰক ৰাজসাক্ষী হ’বলৈ পৰামৰ্শ দিছে। সোমবাৰে নতুন দিল্লীত এখন সংবাদমেল সম্বোধন কৰি এই কথা প্ৰকাশ কৰে কংগ্ৰেছ নেতাগৰাকীয়ে।
ইয়াৰ লগতে কেন্দ্ৰীয় চৰকাৰৰ ভিতৰৰ বহু তথ্য তেওঁৰ হাতত পৰিছে বুলিও দাবী কৰে ৰাহুল গান্ধীয়ে। তেওঁৰ দাবী, প্ৰৱৰ্তন সঞ্চালকালয় (ইডি), কেন্দ্ৰীয় অনুসন্ধান ব্যুৰো (চিবিআই) আৰু বৈদেশিক পৰিক্ৰমা মন্ত্ৰালয়কে ধৰি কেন্দ্ৰীয় চৰকাৰৰ বিভিন্ন বিভাগৰ প্ৰায় ২০০ বিষয়া তেওঁৰ সৈতে নিয়মীয়াকৈ যোগাযোগত আছে। এই বিষয়াসকলৰ পৰাই তেওঁ চৰকাৰৰ ভিতৰৰ বহু খবৰ লাভ কৰে বুলি ৰাহুলে প্ৰকাশ কৰে।
প্ৰধানমন্ত্ৰী নৰেন্দ্ৰ মোদীক লক্ষ্য কৰি ৰাহুলে কয় যে চৰকাৰৰ ভিতৰৰ পৰাই তেওঁ বিভিন্ন তথ্য লাভ কৰি আহিছে। তেওঁৰ এই মন্তব্যৰ জৰিয়তে কেন্দ্ৰীয় চৰকাৰৰ ভিতৰতো অসন্তুষ্টি আৰু সন্দেহৰ পৰিৱেশ থকা বুলি ইংগিত দিবলৈ চেষ্টা কৰা দেখা গৈছে। অৱশ্যে ৰাহুল গান্ধীৰ এই দাবী সন্দৰ্ভত কেন্দ্ৰীয় চৰকাৰৰ আনুষ্ঠানিক প্ৰতিক্ৰিয়া কি হয়, সেয়া এতিয়াও স্পষ্ট হোৱা নাই।
কংগ্ৰেছৰ কাৰ্যালয়ত সংবাদমেল সম্বোধন কৰি ৰাহুলে স্পষ্ট কৰি দিয়ে যে নিৰ্বাচনত ভোট চুৰিৰ অভিযোগক লৈ বিৰোধীয়ে আৰম্ভ কৰা আন্দোলন এতিয়াই বন্ধ নহয়। সকলো বাধা আৰু আক্ৰমণৰ সন্মুখীন হৈও প্ৰতিবাদ অব্যাহত ৰখাৰ কথা উল্লেখ কৰে তেওঁ। সংবাদমেলৰ পাছতে বিৰোধী ঐক্যমঞ্চ ‘ইণ্ডিয়া’ৰ নেতাসকল নতুন দিল্লীৰ কনষ্টিটিউশ্যন ক্লাবত মিলিত হোৱাৰ কথা। তাৰ পাছত তেওঁলোকে উচ্চতম ন্যায়ালয়ৰ দিশে সমদল উলিওৱাৰ পৰিকল্পনা কৰিছে।
জ্ঞানেশ কুমাৰক মুখ্য নিৰ্বাচন আয়ুক্তৰ পদৰ পৰা আঁতৰোৱাৰ দাবীত বিৰোধীয়ে প্ৰতিবাদ অব্যাহত ৰাখিছে। এই দাবীক লৈ ককৰোচ জনতা পাৰ্টীয়েও পৃথকে সৰৱ ভূমিকা গ্ৰহণ কৰিছে। এনে সময়তে জ্ঞানেশ কুমাৰৰ পৰা বাৰ্তা লাভ কৰা বুলি ৰাহুল গান্ধীৰ দাবীয়ে ৰাজনৈতিক মহলত নতুন চৰ্চাৰ সৃষ্টি কৰিছে। ৰাহুলে আনকি জ্ঞানেশ কুমাৰে তেওঁৰ সংবাদমেলখনো চাই আছে বুলি মন্তব্য কৰে।
জ্ঞানেশ কুমাৰক ৰাজনৈতিকভাৱে ব্যৱহাৰ কৰা হৈছে বুলিও ইংগিত দিয়ে ৰাহুলে। তেওঁৰ বক্তব্যৰ পৰা বুজাব বিচৰা হৈছে যে প্ৰধানমন্ত্ৰী নৰেন্দ্ৰ মোদী আৰু কেন্দ্ৰীয় গৃহমন্ত্ৰী অমিত শ্বাহে মুখ্য নিৰ্বাচন আয়ুক্তক নিজৰ ৰাজনৈতিক স্বাৰ্থত ব্যৱহাৰ কৰিছে। অৱশ্যে এই অভিযোগৰ সমৰ্থনত ৰাহুলে কি তথ্য দাঙি ধৰিছে আৰু সংশ্লিষ্ট পক্ষসমূহে ইয়াৰ প্ৰত্যুত্তৰ কি দিয়ে, সেয়া লক্ষণীয় হ’ব।
ৰাজনীতিত প্ৰতিপক্ষৰ শিবিৰৰ ভিতৰৰ পৰা তথ্য লাভ কৰাৰ দাবী নতুন কথা নহয়। পশ্চিমবংগৰ বিৰোধী দলপতি হৈ থকাৰ সময়ত শুভেন্দু অধিকাৰীয়েও মুখ্যমন্ত্ৰী মমতা বেনাৰ্জীৰ ঘনিষ্ঠ লোক, উচ্চপদস্থ বিষয়া আনকি তেওঁৰ পৰিয়ালৰ লোকৰ পৰাও বিভিন্ন তথ্য লাভ কৰা বুলি প্ৰায়ে দাবী কৰিছিল। একেদৰে, বাওঁপন্থী নেতা গৌতম দেৱেও তৃণমূল কংগ্ৰেছৰ ভিতৰৰ লোকেই সাৰদা কেলেংকাৰী আৰু নথি-পত্ৰ জ্বলাই দিয়াৰ দৰে বিষয়ৰ তথ্য তেওঁক যোগান ধৰিছিল বুলি দাবী কৰিছিল।
এইবাৰ প্ৰায় ২০০ চৰকাৰী বিষয়াই তেওঁৰ সৈতে যোগাযোগ ৰক্ষা কৰি আছে বুলি ৰাহুল গান্ধীয়ে কৰা দাবীয়ে কেন্দ্ৰীয় ৰাজনীতিত নতুন বিতৰ্কৰ সৃষ্টি কৰাৰ সম্ভাৱনা আছে। নিৰ্বাচন আয়োগৰ নিৰপেক্ষতা, ভোট চুৰিৰ অভিযোগ আৰু কেন্দ্ৰীয় চৰকাৰৰ ভূমিকা-এই সকলো বিষয়ক লৈ বিৰোধীৰ প্ৰতিবাদে কোন দিশলৈ গতি কৰে, এতিয়া সেয়াই হ’ব লক্ষ্যণীয়।
