চকলেট বা মিঠাই দেখিলেই বহুতো লোকৰ খাবলৈ মন যায় যদিও শৰীৰৰ ওজন বৃদ্ধি পোৱাৰ আশংকাত ইয়াৰ পৰা বিৰত থাকিবলগীয়া হয়। ইয়াৰ উপৰিও বৰ্তমান সময়ত মধুমেহ আৰু কলেষ্টেৰলৰ সমস্যাও এক ডাঙৰ উদ্বেগৰ কাৰণ হৈ পৰিছে। এনে পৰিস্থিতিত স্বাস্থ্য সচেতন লোকসকলে নিজৰ খাদ্য তালিকাৰ পৰা ইতিমধ্যে ময়দা আৰু চেনি বাদ দিছে, আনকি চকলেটৰ পৰাও আঁতৰি থাকিবলৈ লৈছে। বজাৰত উপলব্ধ চেনি বা অতিরিক্ত কৃত্ৰিম মিঠাযুক্ত চকলেট গ্ৰহণ কৰিলে শৰীৰত কেলৰি বৃদ্ধি পোৱাটো নিশ্চিত। কিন্তু উৎসৱ বা পূজাৰ বতৰত ওজন বৃদ্ধিৰ ভয় নকৰাকৈ ঘৰতে চকলেটৰ সহায়ত বিভিন্ন পুষ্টিকৰ তথা সুস্বাদু মিঠাই প্ৰস্তুত কৰি মুখ মিঠা কৰিব পাৰি।
এনে এক অন্যতম স্বাস্থ্যসন্মত মিঠাই হৈছে দৈ-চকলেট বাৰ্ক। এই মিঠাইবিধ প্ৰস্তুত কৰিবলৈ পানী নিগৰাই লোৱা দুকাপ টেঙা দৈ, এচামুচ মৌ, সামান্য ভেনিলা এছেন্স আৰু গলাই লোৱা ডাৰ্ক চকলেটৰ প্ৰয়োজন হয়। প্ৰথমে দৈখিনিৰ সৈতে মৌ আৰু ভেনিলা এছেন্স মিহলাই এখন ট্ৰেৰ ওপৰত সমানকৈ মেলি দিব লাগে। ইয়াৰ পাছত সেই মিশ্ৰণটোৰ ওপৰত গলাই লোৱা ডাৰ্ক চকলেটেৰে পছন্দ অনুসৰি নক্সা আঁকি দিব পাৰি। এই ট্ৰেখন চাৰিৰ পৰা পাঁচ ঘণ্টা সময় ফ্ৰীজত থৈ গোট মাৰিবলৈ দিব লাগে আৰু শেষত সৰু সৰু টুকুৰাকৈ ভাঙি পৰিৱেশন কৰিব পাৰি।
মিঠাই প্ৰিয় লোকসকলে ঘৰতে স্বাস্থ্যসন্মত চকলেট ব্ৰাউনিও তৈয়াৰ কৰি ল’ব পাৰে। ইয়াৰ বাবে প্ৰথমে কুহুমীয়া গৰম গাখীৰত অ’টছখিনি দহ মিনিট সময় তিয়াই ৰাখিব লাগে। তাৰ পাছত তাত এক টেবুল চামুচ কোকো পাউদাৰ, আধা চাহ চামুচ বেকিং পাউদাৰ, কল, স্বাদ অনুসৰি সামান্য নিমখ, মৌ আৰু খেজুৰ যোগ কৰিব লাগে। এই সমগ্ৰ উপাদানসমূহ এটা হেণ্ড হুইস্কাৰৰ সহায়ত এনেদৰে মিহলাই ল’ব লাগে যাতে কোনো ধৰণৰ গোট মাৰি নাথাকে। মিশ্ৰণটো ভালদৰে তৈয়াৰ হোৱাৰ পাছত এটা বেকিং পাত্ৰত ঢালি তাৰ ওপৰত চকলেটৰ সৰু টুকুৰা আৰু বাদাম ছটিয়াই বেক কৰি ল’লেই সুস্বাদু তথা স্বাস্থ্যসন্মত ব্ৰাউনি প্ৰস্তুত হৈ উঠে।
ইয়াৰ উপৰিও অতি কম সময়ৰ ভিতৰতে চকলেট ৰোল মিঠাই প্ৰস্তুত কৰিব পাৰি। এই ব্যঞ্জনবিধৰ বাবে এটা পকা কল, এচামুচ কোকো পাউদাৰ, একাপ সাধাৰণ গাখীৰ বা কাঠবাদামৰ গাখীৰ আৰু কিছু পৰিমাণৰ চিয়া বীজৰ প্ৰয়োজন হয়। প্ৰথমে পকা কল, গাখীৰ আৰু কোকো পাউদাৰখিনি একেলগে ব্লেণ্ডাৰত ভালদৰে মিহলাই এটা বাটিত ঢালি ল’ব লাগে। শেষত ইয়াৰ ওপৰত চিয়া বীজ, তিল, কিছু কটা ফলৰ টুকুৰা আৰু বাদাম ছটিয়াই দিলেই স্বাস্থ্যসন্মত মিঠাইবিধ পৰিৱেশনৰ বাবে সাজু হৈ উঠে। এই ঘৰুৱা পদ্ধতিসমূহ অৱলম্বন কৰি স্বাস্থ্য সচেতন লোকসকলেও পূজাৰ বতৰত নিৰ্ভয়ে চকলেটৰ মিঠাইৰ জুতি ল’ব পাৰে।
