বিশ্বজুৰি ‘এণ্টিবায়টিক ৰেজিষ্টেন্স’ বা এণ্টিবায়টিক প্ৰতিৰোধ ক্ষমতা এক নতুন আৰু ভয়ংকৰ সমস্যা হিচাপে থিয় দিছে। অনিয়ন্ত্ৰিতভাৱে এণ্টিবায়টিক গ্ৰহণ কৰাৰ ফলত বেছিভাগ বীজাণুৱেই ‘মাল্টি ড্ৰাগ ৰেজিষ্টেণ্ট’ অৰ্থাৎ একাধিক ঔষধ প্ৰতিৰোধী হৈ পৰিছে, যাৰ ফলত পৰিচিত ঔষধসমূহৰ প্ৰভাৱ নাইকিয়া হৈছে। জ্বৰ, পেটৰ অসুখ বা এলাৰ্জিৰ দৰে ৰোগৰ বাবে এণ্টিবায়টিক গ্ৰহণ কৰিলেও ৰোগ সম্পূৰ্ণৰূপে নিৰ্মূল নোহোৱা এক পৰিস্থিতিৰ সৃষ্টি হৈছে। এনে এক জটিল সময়ত চিকিৎসাবিজ্ঞানত এবিধ নতুন এণ্টিবায়টিকক লৈ ব্যাপক চৰ্চা আৰম্ভ হৈছে, যিটো কোনো খোৱা ঔষধ নহয় বৰঞ্চ এটা বেজী। দাবী কৰা হৈছে যে এই বেজীৰ মাত্ৰ এটা পালিৰ জৰিয়তেই শৰীৰৰ যিকোনো স্থানত বাহ লৰা সংক্ৰামক ৰোগ নিৰ্মূল কৰিব পৰা যাব।
ভাৰতৰ এৰিষ্ট’ ফাৰ্মাচিউটিকেলছে প্ৰস্তুত কৰা এই বিশেষ বেজীবিধৰ নাম হৈছে ‘ম’ন’চেফ’ । সাধাৰণ এণ্টিবায়টিক টেবলেটতকৈ এই বেজীবিধ বহু পৰিমাণে পৃথক। প্ৰতিবেদন অনুসৰি, এই বেজীত ‘চেফট্ৰিয়াক্সন’ নামৰ এবিধ উপাদান থাকে, যিয়ে বেক্টেৰিয়াজনিত সংক্ৰমণ সফলতাৰে প্ৰতিৰোধ কৰিব পাৰে। এই উপাদানে কেৱল বেক্টেৰিয়া ধ্বংস কৰাই নহয়, বীজাণুৰ বংশবিস্তাৰ প্ৰক্ৰিয়াটোকো সম্পূৰ্ণৰূপে স্তব্ধ কৰি দিয়ে। ইয়াৰ ফলত এবাৰ ৰোগ নিৰাময় হোৱাৰ পাছত পুনৰ সেই ৰোগ ঘূৰি অহাৰ সম্ভাৱনা বহুলাংশে হ্ৰাস পায়। শৰীৰত মাৰাত্মক সংক্ৰমণ থকা অৱস্থাত যিসকল ৰোগীয়ে টেবলেট বা খোৱা ঔষধ গ্ৰহণ কৰিব নোৱাৰে, তেওঁলোকক এই বেজী প্ৰদান কৰা হয়।
গৱেষকসকলে দাবী কৰা মতে, ম’ন’চেফ বেজীয়ে যিকোনো ধৰণৰ বেক্টেৰিয়াজনিত সংক্ৰমণ প্ৰতিৰোধ কৰাৰ ক্ষমতা ৰাখে। বিশেষকৈ হাওঁফাওঁৰ সংক্ৰমণ, শ্বাসকষ্ট আৰু নিউম’নিয়া ৰোধ কৰিবলৈ এই বেজী ব্যৱহাৰ কৰিব পাৰি। ইয়াৰ উপৰি মগজুৰ সংক্ৰমণ বা মেনিনজাইটিছ, তেজৰ সংক্ৰমণ বা চেপ্টিচেমিয়া, মূত্ৰনলীৰ সংক্ৰমণ, পেট আৰু অন্ত্ৰৰ সংক্ৰমণ, ছালৰ বিভিন্ন সংক্ৰমণ লগতে টাইফয়েড ৰোগ নিৰাময়ৰ ক্ষেত্ৰতো ই ফলপ্ৰসূ বুলি কোৱা হৈছে। যিকোনো জটিল অস্ত্ৰোপচাৰৰ পাছত ৰোগীক সংক্ৰমণৰ পৰা বচাই ৰাখিবলৈকো চিকিৎসকে এই বেজীৰ প্ৰয়োগ কাৰ্যকৰী বুলি গণ্য কৰে। ডায়েবেটিছৰ ফলত হোৱা সংক্ৰমণ বা তেজৰ সংক্ৰমণত ভোগা ৰোগীসকলৰ বাবেও ই বিশেষভাৱে উপকাৰী।
যদিও ম’ন’চেফ বেজীয়ে এণ্টিবায়টিক প্ৰতিৰোধৰ ক্ষেত্ৰত এক নতুন বিকল্পৰ সন্ধান দিছে, তথাপিও ইয়াৰ ব্যৱহাৰৰ ক্ষেত্ৰত কঠোৰ সাৱধানতা অৱলম্বন কৰাটো প্ৰয়োজনীয়। চিকিৎসাবিজ্ঞানৰ তথ্য অনুসৰি, যকৃত (লিভাৰ) বা বৃক্কৰ (কিডনী) জটিল ৰোগত আক্ৰান্ত লোক, গৰ্ভৱতী মহিলা আৰু নৱজাতকৰ বাবে এই এণ্টিবায়টিক বেজী সুৰক্ষিত নহয়। বৰ্তমান সময়ত বিশেষজ্ঞসকলে এই সকীয়নি প্ৰদান কৰিছে যে পঞ্জীয়নভুক্ত চিকিৎসকৰ সঠিক পৰামৰ্শ অবিহনে এই বেজী গ্ৰহণ কৰিলে ৰোগীৰ জীৱনলৈ গুৰুতৰ বিপদ নামি আহিব পাৰে।
