২০২৬ চনৰ এছিয়ান পেৰা গেমছত মঙলবাৰে ভাৰতীয় পেৰা টেবুল টেনিছ খেলুৱৈ ভাৱিনা পেটেলে ব্ৰঞ্জৰ পদক অৰ্জন কৰি দেশলৈ গৌৰৱ কঢ়িয়াই আনিছে। ২০২০ চনৰ পেৰালিম্পিকৰ ৰূপৰ পদক বিজয়ী ভাৰতীয় খেলুৱৈগৰাকীয়ে মহিলাৰ একক শাখাৰ (ক্লাছ ৪-৫) ছেমি ফাইনেলত চীনৰ ঝাং বিয়ানৰ বিৰুদ্ধে ৭-১১, ৫-১১ আৰু ৭-১১ পইণ্টৰ ব্যৱধানত (৩-০) পৰাজয় বৰণ কৰি ব্ৰঞ্জৰ পদক লাভ কৰে। প্ৰতিযোগিতাখনৰ প্ৰথম দিনা ভাৰতে ১১টা পদক লাভ কৰাৰ পাছত দ্বিতীয় দিনা ভাৱিনাই দেশৰ হকে এই প্ৰথমটো পদক অৰ্জন কৰে, যাৰ ফলত ভাৰতৰ মুঠ পদকৰ সংখ্যা ১২টালৈ বৃদ্ধি পাইছে।
ইফালে, পেৰা বেডমিণ্টনৰ মিশ্ৰিত SL3-SU5 শাখাত ভাৰতৰ প্ৰমোদ ভগত আৰু মনীষা ৰামদাসৰ যুটিটোৱে ছেমি ফাইনেলত প্ৰৱেশ কৰি দেশৰ বাবে আন এটা পদক নিশ্চিত কৰিছে। কোৱাৰ্টাৰ ফাইনেলত ভাৰতীয় যুটিটোৱে মাত্ৰ ২৫ মিনিটৰ ভিতৰতে থাইলেণ্ডৰ শ্ৰীনাভাকুল চানিদা আৰু টিমাৰম চিৰিপঙক পোনপটীয়া ছেটত ২১-১৫, ২১-১৪ ব্যৱধানত পৰাস্ত কৰে।
আনহাতে, ধনুৰ্বিদ্যাত ভাৰতৰ ছয়গৰাকীকৈ পেৰা খেলুৱৈয়ে নিজ নিজ একক শাখাৰ কোৱাৰ্টাৰ ফাইনেলত প্ৰৱেশ কৰি ভাৰতীয় দলটোৰ সবল স্থিতি প্ৰদৰ্শন কৰিছে। ইয়াৰে পুৰুষৰ ৰিকাৰ্ভ শাখাত হৰবিন্দৰ সিং আৰু মহিলাৰ ৰিকাৰ্ভ শাখাত ভাৱনাই অগ্ৰগতি লাভ কৰাৰ বিপৰীতে কম্পাউণ্ড শাখাত শীতল দেৱী, পায়েল নাগ, তোমন কুমাৰ আৰু শ্যাম সুন্দৰ স্বামীয়ে কোৱাৰ্টাৰ ফাইনেলত স্থান নিশ্চিত কৰিছে। অৱশ্যে ৰিকাৰ্ভ শাখাত ভাৰতে দুটাকৈ বিপৰ্যয়ৰ সন্মুখীন হ’বলগীয়া হয়। মহিলাৰ প্ৰি-কোৱাৰ্টাৰ ফাইনেলত পূজাই মালয়েছিয়াৰ চি হুই লহৰ হাতত ২-৬ ব্যৱধানত পৰাস্ত হোৱাৰ লগতে বিজয় সুণ্ডীয়ে চাইনিজ টাইপেইৰ বিৰুদ্ধে শ্বুট-অফত পৰাস্ত হৈ প্ৰতিযোগিতাৰ পৰা বাহিৰ হয়।
এথলেটিকছত ভাৰতীয় পেৰা খেলুৱৈ ৰাকেশভাই ভাটে পুৰুষৰ লং জাম্পৰ T37/T38 শাখাত কোনো বৈধ জাঁপ অবিহনেই নিজৰ অভিযান সমাপ্ত কৰে। প্ৰথম দুটা প্ৰচেষ্টাত বৈধ জাঁপ দিয়াত ব্যৰ্থ হোৱাৰ পাছত তেওঁ বাকী চাৰিটা প্ৰচেষ্টা ত্যাগ কৰে। সামগ্ৰিকভাৱে এছিয়ান পেৰা গেমছৰ দ্বিতীয় দিনাও ভাৰতীয় খেলুৱৈসকলৰ উন্নত প্ৰদৰ্শন অব্যাহত আছে।
