ভাৰতীয় ডিজাইন শিক্ষাৰ অন্যতম বাটকটীয়া তথা ভাৰতীয় প্ৰযুক্তিবিদ্যা প্ৰতিষ্ঠান গুৱাহাটীৰ ডিজাইন বিভাগৰ প্ৰতিষ্ঠাপক অধ্যাপক সুধাকৰ নাদকৰ্ণীৰ সোমবাৰে মুম্বাইত দেহাৱসান ঘটে। মৃত্যুৰ সময়ত তেওঁৰ বয়স আছিল ৮৮ বছৰ। বাস্তৱ জীৱনৰ সমস্যা সমাধানৰ এক বিশেষ মাধ্যম হিচাপে ভাৰতত ‘ডিজাইন থিংকিং’ ধাৰণাটোৰ প্ৰৱৰ্তন আৰু ইয়াক প্ৰতিষ্ঠানিক ৰূপ দিয়াৰ ক্ষেত্ৰত নাদকৰ্ণীয়ে অগ্ৰণী ভূমিকা পালন কৰিছিল।
ছটা দশকৰো অধিক কালজোৰা বৰ্ণাঢ্য কৰ্মজীৱনত তেওঁ দেশৰ কেইবাখনো আগশাৰীৰ শিক্ষানুষ্ঠানত ডিজাইন শিক্ষাৰ ভেটি গঢ়ি তুলিছিল। গতানুগতিক ব্যৱহাৰিক কলাৰ পৰিৱৰ্তে সামাজিক আৰু উন্নয়নমূলক প্ৰত্যাহ্বানসমূহ সমাধানৰ এক পদ্ধতিগত মাধ্যম হিচাপে ডিজাইন শিক্ষাক ৰূপান্তৰিত কৰাত তেওঁ বিশেষ অৰিহণা যোগাইছিল। ১৯৯৭ চনত আই আই টি গুৱাহাটীত ডিজাইন বিভাগটো প্ৰতিষ্ঠা কৰাত মুখ্য ভূমিকা লোৱা অধ্যাপক নাদকৰ্ণীয়ে ইয়াৰ প্ৰথমটো স্নাতক পাঠ্যক্ৰম প্ৰস্তুত কৰিছিল। বিশেষকৈ স্থানীয় সম্পদৰ ব্যৱহাৰ আৰু বহনক্ষম উন্নয়নৰ ওপৰত গুৰুত্ব আৰোপ কৰি তেওঁ এই অঞ্চলৰ থলুৱা বাঁহ আৰু বেতেৰে বিদ্যালয় তথা চিকিৎসালয়ৰ বাবে আচবাব ডিজাইন কৰাত বিশেষ প্ৰাধান্য দিছিল।
ইয়াৰ পূৰ্বে ১৯৬৯ চনত আই আই টি বম্বেত ‘ইণ্ডাষ্ট্ৰিয়েল ডিজাইন চেণ্টাৰ’ স্থাপনৰ ক্ষেত্ৰতো তেওঁ অন্যতম মূল ব্যক্তি আছিল। তাত তেওঁ ভাৰতৰ প্ৰথমটো প্ৰডাক্ট ডিজাইন আৰু কমিউনিকেশ্যন ডিজাইনৰ স্নাতকোত্তৰ পাঠ্যক্ৰম আৰম্ভ কৰাত সহায় কৰিছিল আৰু পৰৱৰ্তী ১৮ বছৰ ধৰি কেন্দ্ৰটোৰ মুৰব্বী হিচাপে কাৰ্যনিৰ্বাহ কৰি দেশত পেছাদাৰী ডিজাইন শিক্ষাৰ বিকাশত গুৰুত্বপূৰ্ণ অবদান আগবঢ়াইছিল। পাছলৈ মুম্বাইৰ ‘উইস্কুল’ত বিজনেছ ডিজাইনৰ দুবছৰীয়া এম বি এ পাঠ্যক্ৰমৰ জৰিয়তে তেওঁ ডিজাইন আৰু ব্যৱস্থাপনা শিক্ষাক একত্ৰিত কৰি কৰ্প’ৰেট কৌশলৰ সৈতে ইয়াৰ সমন্বয় ঘটায়। ইয়াৰ উপৰি ইউৰোপৰ পৰা উভতি অহাৰ পাছত ১৯৬৬ চনৰ পৰা ১৯৬৯ চনলৈকে তেওঁ আহমেদাবাদৰ নেশ্যনেল ইনষ্টিটিউট অৱ ডিজাইনত সহযোগী অধ্যাপক হিচাপেও সেৱা আগবঢ়াইছিল।
১৯৩৮ চনত জন্মগ্ৰহণ কৰা সুধাকৰ নাদকৰ্ণীয়ে মুম্বাইৰ ছাৰ জে জে স্কুল অৱ আৰ্টত গ্ৰাফিক ডিজাইন অধ্যয়ন কৰিছিল। ইয়াৰ পাছত ১৯৬২ চনত তেওঁ ঔদ্যোগিক প্ৰডাক্ট ডিজাইন অধ্যয়নৰ বাবে জাৰ্মানীৰ উলম চহৰৰ প্ৰখ্যাত শিক্ষানুষ্ঠান ‘হচশুলে ফুৰ গেষ্টাল্টুং’লৈ যায়। এই শিক্ষানুষ্ঠানখনে তেওঁৰ চিন্তাধাৰাত গভীৰ প্ৰভাৱ পেলাইছিল আৰু ডিজাইন মানুহৰ প্ৰয়োজনীয়তা পূৰণ তথা সামাজিক আৰু ৰাষ্ট্ৰীয় বিকাশৰ বাবে হ’ব লাগে বুলি তেওঁৰ বিশ্বাস দৃঢ় কৰিছিল। দেশত কেইবাটাও প্ৰজন্মৰ ডিজাইনাৰ গঢ়ি তোলা এইগৰাকী মহান শিক্ষাবিদৰ শেষকৃত্য সোমবাৰে বিয়লি ৩.৩০ বজাত মুম্বাইৰ ছত্ৰপতি শিৱাজী মহাৰাজ পাৰ্কস্থিত বৈদ্যুতিক শ্মশানত সম্পন্ন কৰাৰ ব্যৱস্থা কৰা হয়।
