বৃহস্পতিবাৰে নিশা তিব্বতত দুটাকৈ শক্তিশালী ভূমিকম্পই আতংকৰ সৃষ্টি কৰে। ৰাষ্ট্ৰীয় ভূমিকম্পবিজ্ঞান কেন্দ্ৰৰ তথ্য মতে ভাৰতীয় সময় অনুসৰি নিশা ৮:০৩ বজাত প্ৰথমটো বৃহৎ ভূমিকম্প অনুভুত হয়। ইয়াৰ মাত্ৰা আছিল ৰিখটাৰ স্কেলত ৭.০। অৰুণাচল প্ৰদেশৰ পাণ্ডিনৰ পৰা প্ৰায় ৪৮.৯ কিলোমিটাৰ উত্তৰ-উত্তৰ-পশ্চিমে আছিল ভূমিকম্পৰ কেন্দ্ৰবিন্দু।
চীন ভূমিকম্প নেটৱৰ্ক চেণ্টাৰে জনোৱা মতে, প্ৰথমটো ভূমিকম্পৰ মূল কেন্দ্ৰবিন্দু উত্তৰ তিব্বতৰ নাগকু অঞ্চলত, যিটো তিব্বতৰ ৰাজধানী লাছাৰ পৰা ৪০০ কিলোমিটাৰ আৰু ভূগৰ্ভৰ মাত্ৰ ১০ কিলোমিটাৰ গভীৰত আছিল।
প্ৰথম জোকাৰণি আতংক মাৰ নৌযাওতেই ৫.০ মাত্ৰাৰ দ্বিতীয়টো ভূমিকম্পই নিশা ৮:৪২ বজাত সমগ্ৰ অঞ্চলটো কঁপাই তুলিছিল। দ্বিতীয়টো ভূমিকম্পৰ কেন্দ্ৰবিন্দু অৰুণাচল প্ৰদেশৰ বাছৰাৰ পৰা প্ৰায় ৩২৩ কিলোমিটাৰ উত্তৰ-উত্তৰ-পশ্চিমে আৰু ভূগৰ্ভৰ প্ৰায় ১৫ কিলোমিটাৰ গভীৰতাত আছিল।
তাৰ পিছত বৃহস্পতিবাৰে নিশা ২:০৬ বজালৈকে তাত কেইবাটাও আফটাৰশ্বক বা অনুকম্পন অনুভৱ কৰা হয়, যাৰ প্ৰতিটোৰ মাত্ৰা ৰিখটাৰ স্কেলত ৪.৫তকৈ অধিক। ইয়াৰে অধিকাংশ কম্পন ভূগৰ্ভৰ ১৫ কিলোমিটাৰৰ গভীৰত আছিল। তিব্বতৰ লগতে এই প্ৰবল কম্পন চীনৰ এক বৃহৎ অঞ্চলতো অনুভুত হৈছিল।
এই ভয়ংকৰ প্ৰাকৃতিক দুৰ্যোগৰ ফলত নাগকু অঞ্চলৰ ওচৰৰ গাঁৱৰ কেইবাটাও ঘৰত ফাট মেলিছে আৰু কমেও দুজন বাসিন্দা আহত হৈছে বুলি চৰকাৰী সূত্ৰই প্ৰকাশ কৰিছে। ঘটনাৰ কিছু ভিডিঅ’ পোহৰলৈ আহিছে, য’ত সাধাৰণ লোকে অতি আতংকিত হৈ ঘৰ এৰি মুকলি আকাশৰ তললৈ দৌৰি ওলাই আহি নিজৰ জীৱন ৰক্ষা কৰা দেখা গৈছে। ইতিমধ্যে স্থানীয় প্ৰশাসনে দুৰ্গম ক্ষতিগ্ৰস্ত অঞ্চললৈ উদ্ধাৰকাৰী দল প্ৰেৰণ কৰি ক্ষয়-ক্ষতিৰ প্ৰকৃত পৰিসৰৰ মূল্যায়ন আৰম্ভ কৰিছে।
JUST IN: At least 16 dead, 32 injured and hundreds of homes collapsed after a magnitude 7.0 earthquake struck Tibet, China, officials say. https://t.co/2nTZ5BL4CU
— Scope Report (@ScopeReport_) October 22, 2026
উল্লেখ্য যে আগষ্ট মাহত নেপাল-তিব্বত সীমান্তত হোৱা ভূমিকম্পৰ ফলত ব্যাপক ভূমিস্খলনৰ ফলত প্ৰায় ১৫০০ লোকৰ মৃত্যু হৈছিল। সেই দুৰ্যোগত নেপালৰ এক বৃহৎ অংশ কাৰ্যতঃ ধ্বংস হৈছিল। সেই কাণ্ডৰ পিছৰ পৰিস্থিতি সম্পূৰ্ণৰূপে সমাধান হোৱা নাই, আৰু তিব্বতত এনে এক শক্তিশালী ভূমিকম্পই হিমালয়ৰ কাষৰীয়া সমগ্ৰ অঞ্চলটোৰ প্ৰাকৃতিক দুৰ্যোগ আৰু নিৰাপত্তাৰ বিপদৰ বিষয়ে নতুন উদ্বেগৰ সৃষ্টি কৰিছে।
