‘ক্ষমতা সলনিৰ পৰিকল্পনা’ লৈ হিংসাত্মক কাৰ্যকলাপত জড়িত হ’লে চৰকাৰী চাকৰি নাপাব। উত্তৰ প্ৰদেশ চৰকাৰে এই সন্দৰ্ভত এক অধিসূচনা জাৰি কৰিছে। একাধিক খবৰ অনুসৰি চাকৰি প্ৰাৰ্থীসকলৰ কেৰেক্টাৰ ভেৰিফিকেশ্যন বা চৰিত্ৰ পৰীক্ষাৰ নিয়ম আৰু কঠোৰ কৰি যোগী আদিত্যনাথ চৰকাৰে স্পষ্ট কৰি দিছে যে ‘ক্ষমতা সলনিৰ পৰিকল্পনা’ লৈ হিংসাত্মক কাৰ্যকলাপত জড়িতসকলক চৰকাৰী চাকৰি দিয়া নহ’বও পাৰে।
সংবাদ মাধ্যম এনডিটিভিৰ এক বাতৰি অনুসৰি এলাহাবাদ উচ্চ ন্যায়ালয়ৰ নিৰ্দেশত নিযুক্তি আৰু কৰ্মী বিভাগৰ প্ৰধান সচিব এম দেৱৰাজে এই অধিসূচনা জাৰি কৰিছে। ইয়াত উল্লেখ কৰা হৈছে যে যদি কোনো চাকৰি প্ৰত্যাশী কোনো সংগঠনৰ সৈতে জড়িত হৈ থাকে যাৰ উদ্দেশ্য হিংসাৰ জৰিয়তে সমাজৰ যিকোনো প্ৰচলিত ব্যৱস্থা সলনি কৰা, তেন্তে তেওঁক চৰকাৰৰ অধীনত নিযুক্তি প্ৰক্ৰিয়াৰ বাবে অযোগ্য বুলি গণ্য কৰা হ’ব।
ৰাজনৈতিক দলৰ সমৰ্থক হ’লে কি হ’ব?
কিন্তু কোনো বিশেষ ৰাজনৈতিক মতাদৰ্শ ধাৰণ কৰা বা কোনো বিশেষ ৰাজনৈতিক দলৰ সমৰ্থক হোৱাৰ বাবে প্ৰাৰ্থীক চৰকাৰী চাকৰিৰ বাবে অযোগ্য বুলি গণ্য কৰিব নোৱাৰি। অৰ্থাৎ চৰকাৰী চাকৰি পোৱাত সেই প্ৰাৰ্থীসকলৰ কোনো বাধা নাথাকিব। একেদৰে গাইডলাইনত উল্লেখ আছে যে কেৱল এফআইআৰ দাখিল হোৱাৰ বাবেই বা তদন্ত বাকী থাকিলে সংশ্লিষ্ট প্ৰাৰ্থীৰ বাবে চৰকাৰী চাকৰিৰ দুৱাৰ বন্ধ নহ’ব।
‘ক্ষমতা সলনি’ৰ দাবী আৰু বিতৰ্ক
ভোটাৰ তালিকাৰ বিশেষ ব্যাপক সংশোধনী বা এছ আই আৰ বিৰোধী আন্দোলন আৰু মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত প্ৰতিবাদী কাৰ্যসূচীৰ সময়তে এই নিৰ্দেশনা চৰ্চালৈ আহিছে। বিৰোধী ৰাজনৈতিক দলসমূহে একেলগে সেই আন্দোলন চলাই আছে। ৰাজপথলৈ ওলাই আহিছে ককৰোচ জনতা পাৰ্টিও।
ইয়াৰ মাজতে ‘ক্ষমতা সলনি’ৰ দাবীও উত্থাপন হ’ল। ককৰোচ জনতা পাৰ্টিৰ প্ৰতিষ্ঠাপক অভিজিৎ দীপকে, আইছাৰ সভাপতি নেহা বৰা, আৰু ৰাজ্যসভাৰ সাংসদ কপিল ছিবালৰ উপস্থিতিত জ্যেষ্ঠ অধিবক্তা প্ৰশান্ত ভূষনে যুক্তি আগবঢ়ায়, ‘আমি ক্ষমতাৰ পৰিৱৰ্তন বিচাৰো। ক্ষমতা সলনি কৰাটো প্ৰতিজন নাগৰিকৰ সাংবিধানিক অধিকাৰ।’
তেওঁ লগতে কয়, ‘আমি সকলোৱে ক্ষমতাৰ পৰিৱৰ্তন বিচাৰো। তাত কিবা দোষ আছে নেকি? চৰকাৰ পৰিবৰ্তন প্ৰতিজন নাগৰিকৰ গণতান্ত্ৰিক অধিকাৰ। চৰকাৰৰ প্ৰতি অসন্তুষ্টি কোনো অপৰাধ নহয়।’ এ
ই মন্তব্যৰ পিছতে তীব্ৰ বিতৰ্কৰ সৃষ্টি হয়। প্ৰতিৰক্ষা মন্ত্ৰী ৰাজনাথ সিঙে অভিযোগ কৰে যে, ‘তেওঁলোকে (প্ৰতিবাদকাৰী) দেশৰ যুৱ প্ৰজন্মক বিশৃংখলতাৰ ৰাজনীতিত পণ্য হিচাপে ব্যৱহাৰ কৰিব বিচাৰে। বাংলাদেশত যি হৈছিল, ঠিক সেইদৰেই শাসন ব্যৱস্থা সলনি কৰাৰ পৰিকল্পনা কৰিছে।’
অৱশ্যে ককৰোচক সমৰ্থন কৰা অভিনেতা প্ৰকাশ ৰাজে দাবী কৰিছিল যে ভাৰত বাংলাদেশ বা নেপালৰ দৰে নহয়। ‘আমি এই শাসন ব্যৱস্থাৰ পতন বিচাৰো। আমি এই দেশৰ শাসন ব্যৱস্থা (অৱশ্যে) গণতান্ত্ৰিকভাৱে সলনি কৰিম।’
