ককৰোচ জনতা পাৰ্টি (CJP)-ৰ মুখপাত্ৰ সৌৰভ দাসৰ বিৰুদ্ধে দাখিল কৰা এখন ৰাজহুৱা স্বাৰ্থজড়িত আবেদনৰ ভিত্তিত জাননী জাৰি কৰিছে মাদ্ৰাজ উচ্চ ন্যায়ালয়ে। ন্যায় ব্যৱস্থা আৰু উচ্চতম ন্যায়ালয়ৰ ন্যায়াধীশসকলৰ বিৰুদ্ধে অপমানজনক মন্তব্য কৰাৰ অভিযোগ তুলি সৌৰভ দাসৰ পৰিচয় আৰু পাৰিবাৰিক পটভূমিৰ তদন্ত, পাছপ’ৰ্ট আৰু আধাৰ কাৰ্ড বাতিল কৰাৰ লগতে তেওঁৰ সমাজমাধ্যমৰ একাউণ্ট বন্ধ কৰাৰ দাবী জনোৱা হৈছে এই আবেদনত। শুকুৰবাৰে গোচৰটোৰ শুনানি গ্ৰহণ কৰি সৌৰভ দাসসহ কেন্দ্ৰীয় চৰকাৰৰ কেইবাটাও বিভাগলৈ জাননী প্ৰেৰণ কৰে আদালতে। অৱশ্যে এই পৰ্যায়ত অভিযোগসমূহৰ সত্যাসত্য সন্দৰ্ভত কোনো সিদ্ধান্ত দিয়া নাই ন্যায়ালয়ে।
মুখ্য ন্যায়াধীশ সুশ্ৰুত অৰবিন্দ ধৰ্মাধিকাৰী আৰু ন্যায়াধীশ জি অৰুণ মুৰুকনৰ বিচাৰপীঠত গোচৰটোৰ শুনানি অনুষ্ঠিত হয়। চেন্নাইৰ জামিন পল্লাভৰমৰ বাসিন্দা আৰ গণেশ কুমাৰে এই ৰাজহুৱা স্বাৰ্থজড়িত আবেদনখন দাখিল কৰিছে। আবেদনকাৰীৰ অভিযোগ অনুসৰি, সৌৰভ দাসে বাৰে বাৰে ন্যায় ব্যৱস্থা, আনকি ভাৰতৰ মুখ্য ন্যায়াধীশ আৰু উচ্চতম ন্যায়ালয়ৰ আন ন্যায়াধীশসকলৰ বিৰুদ্ধেও আপত্তিজনক মন্তব্য কৰি আহিছে।
আবেদনখনত কেন্দ্ৰীয় গৃহ মন্ত্ৰ্যালয়সহ সংশ্লিষ্ট কৰ্তৃপক্ষক সৌৰভ দাস আৰু তেওঁৰ পৰিয়ালৰ সদস্যসকলৰ পৰিচয় তথা অতীতৰ বিষয়ে বিশদ, সম্পূৰ্ণ আৰু নিৰপেক্ষ তদন্ত কৰাৰ নিৰ্দেশ দিবলৈ আদালতক অনুৰোধ জনোৱা হৈছে। বিশেষকৈ তেওঁৰ মাতৃ আৰু প্ৰকৃত পিতৃৰ পৰিচয় সন্দৰ্ভতো তদন্তৰ দাবী জনাইছে আবেদনকাৰীয়ে। আবেদনখনত উল্লেখ কৰা অনুসৰি, তেওঁলোক পুডুচেৰীত বাস কৰে।
তদন্তৰ জৰিয়তে প্ৰয়োজনীয় কাৰণ পোহৰলৈ আহিলে সৌৰভ দাসৰ পাছপ’ৰ্ট আৰু আধাৰ কাৰ্ড বাতিল কৰাৰ ব্যৱস্থা গ্ৰহণ কৰিবলৈও আবেদন জনোৱা হৈছে। ইয়াৰ উপৰি কেন্দ্ৰীয় তথ্য-প্ৰযুক্তি মন্ত্ৰ্যালয়ক তেওঁৰ এক্স আৰু ইনষ্টাগ্ৰামৰ একাউণ্ট বন্ধ কৰাৰ নিৰ্দেশ দিবলৈও আদালতক অনুৰোধ জনাইছে আবেদনকাৰীয়ে। ভৱিষ্যতে ন্যায় ব্যৱস্থাৰ বিৰুদ্ধে তেওঁৰ অভিযোগ অনুসৰি কৰা অপমানজনক মন্তব্য বন্ধ কৰাৰ ব্যৱস্থা গ্ৰহণৰো দাবী উত্থাপন কৰা হৈছে।
গোচৰটোত চেন্নাইৰ আঞ্চলিক পাছপ’ৰ্ট বিষয়া, আধাৰ কৰ্তৃপক্ষ, কেন্দ্ৰীয় গৃহ মন্ত্ৰ্যালয়, বৈদেশিক পৰিক্ৰমা মন্ত্ৰ্যালয়, আইন আৰু ন্যায় মন্ত্ৰ্যালয় তথা তথ্য-প্ৰযুক্তি মন্ত্ৰ্যালয়ক পক্ষভুক্ত কৰা হৈছে। ইয়াৰ লগতে এক্স আৰু ইনষ্টাগ্ৰামৰ অভিযোগ নিষ্পত্তিৰ দায়িত্বত থকা বিষয়াসকলকো গোচৰটোত পক্ষ কৰা হৈছে।
শুনানিৰ সময়ত আবেদনকাৰীৰ অধিবক্তা বি জগন্নাথে আদালতক জনায় যে যোৱা ৭ অক্টোবৰত সংশ্লিষ্ট কৰ্তৃপক্ষৰ ওচৰত এই সন্দৰ্ভত অভিযোগ দাখিল কৰা হৈছিল যদিও কোনো উত্তৰ লাভ কৰা নাই। তেওঁৰ মতে, ন্যায় ব্যৱস্থা সন্দৰ্ভত সৌৰভ দাসৰ কথিত মন্তব্যৰ ধৰণ গ্ৰহণযোগ্য নহয়। সেয়েহে বিষয়টোত চৰকাৰী পৰ্যায়ত তদন্তৰ প্ৰয়োজন আছে।
শুকুৰবাৰে জাননী জাৰি কৰি ছয় সপ্তাহৰ ভিতৰত জবাব দাখিল কৰিবলৈ সংশ্লিষ্ট পক্ষসমূহক নিৰ্দেশ দিয়ে ন্যায়ালয়ে। ইয়াৰ পাছতে গোচৰটোৰ পৰৱৰ্তী শুনানি অনুষ্ঠিত হ’ব। অৱশ্যে মন কৰিবলগীয়া যে, এই পৰ্যায়ত সৌৰভ দাসৰ বিৰুদ্ধে উত্থাপিত অভিযোগৰ সত্যতা নিৰূপণ কৰা নাই আদালতে। তেওঁৰ পৰিচয়, পাছপ’ৰ্ট, আধাৰ কাৰ্ড অথবা সমাজমাধ্যমৰ একাউণ্ট সন্দৰ্ভতো কোনো চূড়ান্ত নিৰ্দেশ দিয়া হোৱা নাই।
