উত্তৰাখণ্ডৰ চামোলি জিলাত সংঘটিত হৈছে এক শোকাৱহ হেলিকপ্টাৰ দুৰ্ঘটনা। বদ্ৰীনাথ ধামৰ পৰা ঋষিকেশলৈ উভতি অহাৰ সময়তে দুৰ্ঘটনাত পতিত হয় যাত্ৰী কঢ়িয়াই অনা এখন হেলিকপ্টাৰ। হেলিকপ্টাৰখনত থকা ছয়গৰাকী লোকৰ আটাইকেইজনৰ মৃত্যু হোৱা বুলি আশংকা কৰা হৈছে। অৱশ্যে এই পৰ্যন্ত মৃত্যুৰ আনুষ্ঠানিক নিশ্চিতি লাভ কৰা হোৱা নাই।
প্ৰাথমিক তথ্য অনুসৰি, ৩০ অক্টোবৰত ট্ৰান্স নামৰ এটা সংস্থাৰ হেলিকপ্টাৰখনে বদ্ৰীনাথ ধামৰ পৰা ছয়গৰাকী যাত্ৰীসহ ঋষিকেশ অভিমুখে যাত্ৰা আৰম্ভ কৰিছিল। কিন্তু বদ্ৰীনাথ আৰু যোশীমঠৰ মাজৰ আকাশমাৰ্গত হঠাৎ হেলিকপ্টাৰখনৰ সৈতে নিয়ন্ত্ৰণ কক্ষৰ যোগাযোগ বিচ্ছিন্ন হৈ পৰে। তাৰ পিছৰে পৰা হেলিকপ্টাৰখনৰ কোনো সন্ধান লাভ কৰা হোৱা নাছিল।
যোগাযোগ বিচ্ছিন্ন হোৱাৰ খবৰ পোৱাৰ পিছতে তৎপৰ হৈ পৰে জিলা প্ৰশাসন। হেলিকপ্টাৰখনৰ সন্ধানত প্ৰশাসনৰ লগতে সংশ্লিষ্ট কোম্পানীয়েও অভিযান আৰম্ভ কৰে। চামোলিৰ জিলা আয়ুক্ত গৌৰৱ কুমাৰে প্ৰকাশ কৰা মতে, সেনাৰ পৰা লাভ কৰা তথ্যৰ ভিত্তিত হেলিকপ্টাৰখনৰ অৱস্থানৰ সম্ভেদ পোৱা যায়। ইয়াৰ পিছতে দুৰ্ঘটনাৰ বিষয়টো নিশ্চিত হয়।
প্ৰাথমিক অনুসন্ধানত পোহৰলৈ অহা তথ্য অনুসৰি, প্ৰতিকূল বতৰৰ মাজতে চাঁই আৰু থেং গাঁৱৰ ওপৰৰ পাহাৰীয়া অঞ্চলত হেলিকপ্টাৰখন দুৰ্ঘটনাত পতিত হয়। দুৰ্গম অঞ্চলটোত উদ্ধাৰ অভিযান চলোৱাৰ ক্ষেত্ৰত প্ৰশাসনে ব্যৱস্থা গ্ৰহণ কৰিছে।
ইফালে, হেলিকপ্টাৰখনত থকা ছয়গৰাকী লোকৰ কোনো এজনেই জীৱিত অৱস্থাত উদ্ধাৰ হোৱাৰ সম্ভাৱনা ক্ষীণ বুলি আশংকা কৰা হৈছে। অৱশ্যে যাত্ৰীসকলৰ পৰিচয়, দুৰ্ঘটনাৰ সঠিক কাৰণ আৰু ক্ষয়-ক্ষতিৰ সম্পূৰ্ণ তথ্য এতিয়াও প্ৰকাশ কৰা হোৱা নাই। এই সন্দৰ্ভত প্ৰশাসনৰ আনুষ্ঠানিক বিবৃতিৰ অপেক্ষা কৰা হৈছে।
