নতুন দিল্লীৰ ঐতিহাসিক যন্তৰ মন্তৰত প্ৰতিবাদ সাব্যস্ত কৰা ছাত্ৰ-ছাত্ৰীৰ ওপৰত আৰক্ষীৰ নিৰ্যাতন আৰু অত্যধিক বল প্ৰয়োগৰ গুৰুতৰ অভিযোগ সন্দৰ্ভত অতি কঠোৰ স্থিতি গ্ৰহণ কৰিছে উচ্চতম ন্যায়ালয়ে।
বৃহস্পতিবাৰে শীৰ্ষ আদালতে স্পষ্ট কৰি দিয়ে যে এই ঘটনাৰ তদন্তৰ বাবে গঠন কৰা উচ্চ ক্ষমতাসম্পন্ন সমিতিখনে অহা এমাহৰ ভিতৰত চূড়ান্ত তদন্তৰ প্ৰতিবেদন দাখিল কৰিব লাগিব।
ন্যায়াধীশৰ বিচাৰপীঠে স্পষ্ট কৰি দিয়ে যে কোনো পৰিস্থিতিতে তদন্ত প্ৰক্ৰিয়াৰ বাবে অনিৰ্দিষ্টকাল অপেক্ষা কৰাটো সম্ভৱ নহয়।
এই গোচৰৰ শুনানি গ্ৰহণ কৰে মুখ্য ন্যায়াধীশ সূৰ্য কান্ত আৰু ন্যায়াধীশ জয়মাল্য বাগচীৰ খণ্ড বিচাৰপীঠে। আদালতে লক্ষ্য কৰে যে ৩১ অক্টোবৰত তদন্ত সমিতিয়ে দাখিল কৰা প্ৰতিবেদন কেৱল ‘ষ্টেটাছ ৰিপ’ৰ্ট’ বা কামৰ অগ্ৰগতিৰ অস্থায়ী খতিয়ানহে। আৰক্ষীৰ নিৰ্যাতন বা হিংসাৰ প্ৰকৃত অভিযোগৰ ওপৰত নিৰ্দিষ্ট কোনো চূড়ান্ত সিদ্ধান্ত বা পৰ্যবেক্ষণ কৰা হোৱা নাছিল।
এই পৰ্যন্ত লাভ কৰা সকলো নথি-পত্ৰ, ভিডিঅ’ ফুটেজ আৰু প্ৰমাণ পৰীক্ষা কৰিবলৈ উচ্চতম ন্যায়ালয়ে কমিটীক নিৰ্দেশ দিয়ে। ইয়াৰ সমান্তৰালকৈ ঘটনাৰ দিনটোত কৰ্তব্যত থকা সংশ্লিষ্ট আৰক্ষী বিষয়া-কৰ্মীসকলক মাতি আনি তেওঁলোকৰ উত্তৰ বিচাৰিব লাগিব।
উচ্চতম ন্যায়ালয়ে এই নিৰ্দেশত অতি গুৰুত্বপূৰ্ণ পৰ্যবেক্ষণ কৰিছে। উচ্চতম ন্যায়ালয়ে স্পষ্টভাৱে উল্লেখ কৰিছে যে তদন্ত সমিতিৰ পৰিসৰ কেৱল প্ৰত্যক্ষভাৱে প্ৰভাৱিত বা হাৰাশাস্তি কৰা প্ৰতিবাদকাৰীয়ে দাখিল কৰা অভিযোগৰ মাজতে সীমাবদ্ধ ৰাখিব নালাগে। তদন্তকাৰী পেনেলে তেওঁলোকৰ অধিবক্তা বা আন সাধাৰণ লোকে হাৰাশাস্তিৰ হৈ দাখিল কৰা সকলো প্ৰমাণৰ নিৰপেক্ষ মূল্যায়ন কৰিব লাগিব।
উল্লেখ্য যে যন্তৰ মন্তৰত ছাত্ৰ-ছাত্ৰীৰ শান্তিপূৰ্ণ প্ৰতিবাদৰ সময়ত আৰক্ষীৰ লাঠিচাৰ্জ আৰু অমানৱীয় ব্যৱহাৰৰ অভিযোগে সমগ্ৰ দেশতে বিতৰ্কৰ সৃষ্টি কৰিছিল। ঘটনাৰ ন্যায় বিচাৰি উচ্চতম ন্যায়ালয়ৰ কাষ চাপিছিল কেইবাটাও ছাত্ৰ সংগঠন আৰু মানৱ অধিকাৰ সংগঠন।
উচ্চতম ন্যায়ালয়ৰ এগৰাকী প্ৰাক্তন ন্যায়াধীশৰ নেতৃত্বত গঠিত উচ্চ ক্ষমতাসম্পন্ন তদন্ত সমিতিখনে আদালতত কয় যে যোৱা ২০ জুলাইত যন্তৰ মন্তৰত সংঘটিত হোৱা হিংসাত্মক ঘটনাৰ তদন্তত পৰ্যাপ্ত তথ্য আৰু উপাদানৰ অভাৱ।ভুক্তভোগী আৰু ক্ষতিগ্ৰস্ত ব্যক্তিৰ তৰফৰ পৰা বৰ বেছি আনুষ্ঠানিক অভিযোগ দাখিল কৰা হোৱা নাই।
দিল্লীৰ ৰাজপথত আন্দোলন আৰু সংসদ অভিযানৰ দিনটোত সংঘটিত ঘটনা সন্দৰ্ভত অভিযোগ দাখিল কৰিবলৈ দেশৰ প্ৰায় ১৪৯খন বাতৰি কাকতত চৰকাৰী জাননী প্ৰকাশ কৰা বুলি সমিতিখনে অৱগত কৰে। অনলাইন পৰ্টেলৰ জৰিয়তে আৰু পোনপটীয়াকৈ কাৰ্যালয়লৈ আহি অভিযোগ দাখিল কৰাৰ ব্যৱস্থা কৰাৰ পিছতো আশা কৰা ধৰণে অভিযোগ অহা নাই। পিছত ২১ অক্টোবৰত পুনৰ সংবাদ মাধ্যমত এখন জাননী জাৰি কৰা হয়, য’ত পেনেলৰ ৱেবছাইট আৰু কাৰ্যালয়ৰ ঠিকনা উল্লেখ কৰা হয়, আৰু অভিযোগৰ বাবে অনুৰোধ কৰা হয়।
মন কৰিবলগীয়া যে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত ছাত্ৰ-ছাত্ৰীৰ এই বৃহৎ আন্দোলন চলিত বৰ্ষৰ ২০ জুনৰ পৰা দিল্লীৰ যন্তৰ মন্তৰত আৰম্ভ হৈছিল, যিটো ‘ককৰোচ জনতা পাৰ্টি’ (চিজেপি)ৰ নেতৃত্বত আছিল। এই প্ৰতিবাদ দ্ৰুতগতিত দিল্লীৰ সীমাৰ বাহিৰলৈ দেশৰ বিভিন্ন চহৰলৈ বিয়পি পৰে।
যোৱা ২০ জুলাইত যেতিয়া প্ৰতিবাদকাৰীয়ে যন্তৰ মন্তৰৰ পৰা সংসদ অভিমুখে সমদল আৰু গাড়ী চলাবলৈ চেষ্টা কৰিছিল তেতিয়া নিৰাপত্তাৰক্ষীৰ সৈতে তীব্ৰ সংঘৰ্ষ হৈছিল। আৰক্ষীয়ে লাঠিচাৰ্জ কৰি কন্দুৱা গেছৰ গোলা নিক্ষেপ কৰি ৰাইজক ছত্ৰভংগ দিয়ে। এই ঘটনাই ছাত্ৰ-ছাত্ৰী আৰু প্ৰতিবাদকাৰীৰ বিৰুদ্ধে আৰক্ষীৰ বৰ্বৰতাৰ গুৰুতৰ অভিযোগ উত্থাপন কৰিছিল। বিনিময়ত আৰক্ষী জোৱানৰ ওপৰত আক্ৰমণৰ পাল্টা অভিযোগো উত্থাপন হয়।
পৰিস্থিতি গৈ পায় উচ্চতম ন্যায়ালয়। যোৱা আগষ্ট মাহত উচ্চতম ন্যায়ালয়ে কেইবাটাও জনস্বাৰ্থৰ গোচৰৰ শুনানি গ্ৰহণ কৰি এই উচ্চ ক্ষমতাসম্পন্ন তদন্ত সমিতি গঠনৰ নিৰ্দেশ দিছিল।
ইয়াৰ পাছত ২৫ জুলাইত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে শিক্ষা মন্ত্ৰী পদৰ পৰা পদত্যাগ কৰে আৰু কেন্দ্ৰীয় চৰকাৰে চিজেপিৰ অন্যান্য দাবী মানি লোৱাত পাঁচ সপ্তাহজোৰা আন্দোলন আনুষ্ঠানিকভাৱে প্ৰত্যাহাৰ কৰা হয়।
বৃহস্পতিবাৰে শুনানিৰ অন্তত উচ্চতম ন্যায়ালয়ে কয় যে এই চাঞ্চল্যকৰ গোচৰৰ পৰৱৰ্তী শুনানি অহা ২ ডিচেম্বৰত হ’ব।
