শুকুৰবাৰে ডিব্ৰুগড় জিলাৰ টেঙাখাতস্থিত অইল ইণ্ডিয়া লিমিটেডৰ ইন্টাৰমিডিয়েট টেংক ফাৰ্ম (আই টি এফ)ত এক বৃহৎ অগ্নিকাণ্ড আৰু বিস্ফোৰণৰ ফলত কেইবাজনো কৰ্মী গুৰুতৰভাৱে আহত হয়।
প্ৰাথমিক খবৰ অনুসৰি এই সুবিধাটোত কৰ্মীসকলে এটা ভালভ চলাবলৈ চেষ্টা চলাই থকাৰ সময়তে এই ঘটনা সংঘটিত হয়। জানিব পৰা মতে, টেংক ফাৰ্মত খাৰুৱা তেল মজুত অংশত সংঘটিত হোৱা এই বিস্ফোৰণৰ ফলত ব্যাপক অগ্নিকাণ্ড সংঘটিত হয়।
কমেও পাঁচজন আহত ব্যক্তিক চিনাক্ত কৰা হৈছে আৰু তেওঁলোক হ’ল ডিব্ৰুগড়ৰ মিলন নগৰৰ তাপস গগৈ (৪০) আৰু বাকীকেইজন টেঙাখাটৰ শৈলেন গগৈ (৪৫), কুমুদ গগৈ (৩৮), গোলাপ দত্ত (৫৮) আৰু ইন্দ্ৰ গগৈ (৪০)।
আহত পাঁচোজন লোককে ডিব্ৰুগড়ৰ অসম চিকিৎসা মহাবিদ্যালয় হাস্পাতালত ভৰ্তি কৰোৱা হৈছে। বৰ্তমান তেওঁলোক সংকটজনক অৱস্থাত চিকিৎসাধীন হৈ থকা বুলি জানিব পৰা গৈছে।
ইফালে বিস্ফোৰণৰ ফলত আন এজন কৰ্মী সন্ধানহীন হোৱা বুলি জানিব পৰা গৈছে। তেওঁৰ স্থিতি জানিবলৈ প্ৰচেষ্টা অব্যাহত আছে।
আহত কৰ্মীসকল অইল ইণ্ডিয়া লিমিটেডৰ নিয়োজিত কোম্পানী স্পেকট্ৰন ইঞ্জিনিয়াৰ্ছ প্ৰাইভেট লিমিটেড, মুম্বাইৰ কৰ্মচাৰী বুলি জানিব পৰা গৈছে।
এই ঘটনাত আন কেইবাজনো ব্যক্তিও আহত হোৱাৰ সন্দেহ কৰা হৈছে। হতাহতৰ সঠিক সংখ্যা আৰু বিস্ফোৰণৰ পৰিস্থিতিৰ কাৰণ এতিয়াও আনুষ্ঠানিকভাৱে নিশ্চিত হোৱা নাই।
অধিক সবিশেষ জানিবলৈ অপেক্ষা কৰা হৈছে।
