উত্তৰ প্ৰদেশৰ মুজাফ্ফৰনগৰত সংঘটিত হৈছে এক ভয়ংকৰ পথ দুৰ্ঘটনা। তীব্ৰবেগী গাড়ী এখনে নিয়ন্ত্ৰণ হেৰুৱাই পথৰ কাষৰ এটা বিদ্যুতৰ খুঁটাত খুন্দা মাৰে। সংঘৰ্ষৰ ফলত নিমিষতে গাড়ীখনত জুই লাগি যায়। ভিতৰত থকা যাত্ৰীসকলে ওলাবলৈও কোনো সুযোগেই নাপালে।
এই অগ্নিকাণ্ডত গাড়ীখনত থকা ৬ জন যাত্ৰীৰ মৃত্যু হয়। নিহতসকলৰ ভিতৰত এটা শিশুও আছে। প্ৰাথমিক সূত্ৰ অনুসৰি নিহত আটাইকেইজন হাৰিয়ানাৰ জিন্দ জিলাৰ বাসিন্দা।
জানিব পৰা মতে, সোমবাৰে পুৱা উত্তৰ প্ৰদেশৰ মুজাফ্ফৰনগৰ জিলাৰ পানীপট-খাটিমা ৰাষ্ট্ৰীয় ঘাইপথত সংঘটিত হয় এই মৰ্মান্তিক দুৰ্ঘটনাটো। আৰক্ষী সূত্ৰৰ পৰা জানিব পৰা মতে, জাগাহেৰী অঞ্চলৰ সমীপত হঠাৎ নিয়ন্ত্ৰণ হেৰুৱাই পেলায় গাড়ীখন। ইয়াৰ পিছতে পথৰ কাষৰ এটা বিদ্যুতৰ খুঁটাত খুন্দা মাৰে।
সংঘৰ্ষৰ লগে লগে চিএনজি বাহনখনত অগ্নিকাণ্ড সংঘটিত হয়। নিমিষতে সমগ্ৰ গাড়ীখন জুইৰ শিখাই আগুৰি ধৰে। ভিতৰত আবদ্ধ হৈ পৰে যাত্ৰীসকল। সংবাদ সংস্থাৰ সূত্ৰৰ পৰা জানিব পৰা মতে গাড়ীখনত জীৱন্তে অগ্নিদগ্ধ হৈ মৃত্যু হয় যাত্ৰীকেইজনৰ।
দুৰ্ঘটনাৰ খবৰ পোৱাৰ পিছতে আৰক্ষীয়ে ক্ষিপ্ৰতাৰে সেই স্থানত উপস্থিত হয়। স্থানীয় লোকেও ততাতৈয়াকৈ গৈ সেই স্থানত উপস্থিত হয়। কিন্তু কোনোৱে সহায় কৰাৰ আগতেই সকলো শেষ হৈ গ’ল। আৰক্ষীয়ে জুই নিৰ্বাপন কৰি গাড়ীৰ ভিতৰত থকা ছয়জন লোকৰ মৃতদেহ উদ্ধাৰ কৰে। প্ৰাৰম্ভিক খবৰ অনুসৰি মৃত্যু হোৱা লোকসকলৰ ভিতৰত ১০ৰ পৰা ১২ বছৰ বয়সৰ এটি শিশুও আছে।
আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। মৃতকৰ পৰিচয় নিশ্চিত কৰাৰ লগতে তেওঁলোকৰ পৰিয়ালৰ সৈতে যোগাযোগ কৰাৰ প্ৰচেষ্টা অব্যাহত আছে। গাড়ীখনে কেনেকৈ নিয়ন্ত্ৰণ হেৰুৱালে সেয়া তদন্তকাৰীয়ে অনুসন্ধান কৰি আছে। অত্যধিক গতিবেগ, চালকৰ গাফিলতিৰ বাবে নে গাড়ীৰ যান্ত্ৰিক বিজুতিৰ বাবে এই দুৰ্ঘটনা সংঘটিত হৈছে সেয়া এতিয়াও স্পষ্ট হোৱা নাই।
আনহাতে, স্থানীয় একাংশ লোকৰ মতে, গাড়ীখনে ষ্ট্ৰীট লাইটৰ পোষ্টত খুন্দা মৰাৰ পিছত খুঁটাটো গাড়ীৰ ওপৰত পৰি যায়। ইয়াৰ বাবেই গাড়ীখনত অগ্নিকাণ্ড সংঘটিত হয়। আৰক্ষীয়েও এই সম্ভাৱনাৰ তদন্ত অব্যাহত ৰাখিছে। দুৰ্ঘটনাস্থলীৰ আশে-পাশে থকা চিচিটিভি ফুটেজো পৰীক্ষা কৰা হৈছে।
