কুৰ্ট গ’ডেল বিংশ শতিকাৰ অন্যতম শ্ৰেষ্ঠ গণিতজ্ঞ আৰু দাৰ্শনিক আছিল। ১৯৩১ চনত তেওঁৰ দুটা অসম্পূৰ্ণ উপপাদ্যই গণিতৰ জগতখন সলনি কৰি পেলাইছিল।
তেওঁৰ কামৰ পৰা অনুপ্ৰাণিত হৈ এলান টুৰিঙে আধুনিক কম্পিউটাৰ তত্ত্বৰ সূচনা কৰিছিল। নাজীৰ ভয়ত গ’ডেলে ১৯৪০ চনত নিজৰ গৃহ দেশ অষ্ট্ৰিয়া এৰি আমেৰিকালৈ যায় আৰু এলবাৰ্ট আইনষ্টাইনৰ ঘনিষ্ঠ বন্ধু হৈ পৰে।
গ’ডেলে তেওঁৰ জীৱনকালত অতি কম গৱেষণা পত্ৰ প্ৰকাশ কৰিছিল। তেওঁৰ হাতত আছিল হাজাৰ হাজাৰ পৃষ্ঠাৰ অপ্ৰকাশিত ৰচনা। তাৰ ভিতৰত ১৯৪০ৰ দশকত লিখা ১৬ খন নোটবুক গৱেষকসকলৰ বাবে এক ডাঙৰ ৰহস্য আছিল। এই ১০৯ পৃষ্ঠাৰ নোটবুকবোৰ ‘গেবেলছবাৰ্গাৰ’ নামৰ এটা অচল জাৰ্মান সংকেতলিপিত লিখা হৈছিল। গ’ডেলে ব্যৱহাৰ কৰাৰ সময়তেই এই লিপিটো প্ৰায় অচল হৈ পৰিছিল।
ফিনলেণ্ডৰ যুক্তিবিদ জান ভন প্লেটোৱে ২০১৭ চনত হেলচিংকি বিশ্ববিদ্যালয়ত এই নোটবুকৰ পাঠ উদ্ধাৰৰ কাম আৰম্ভ কৰিছিল।ইয়াৰ বাবে তেওঁ নিজেই এই বিৰল সংকেতলিপি আয়ত্ত কৰিছিল। পৃথিৱীৰ মাত্ৰ ছয়জন মানুহেহে এইটো পঢ়িব পাৰে, যাৰ ভিতৰত তেওঁৱো এজন। আনকি যেতিয়া দলটোৱে কাম আৰম্ভ কৰিছিল, তেতিয়াও অগ্ৰগতি অতি লেহেমীয়া আছিল; গড়ে প্ৰতি সপ্তাহত মাত্ৰ এটা পৃষ্ঠাহে পঢ়িব পৰা গৈছিল।
অৱশেষত ফ্ৰান্সত অনুষ্ঠিত এখন সন্মিলনত ভন প্লেটোৱে বিজ্ঞানীসকলৰ পৰামৰ্শমতে কৃত্ৰিম বুদ্ধিমত্তা বা এআই মডেল ক্ল’ডৰ সহায় লয়। তেওঁ ক্ল’ডক নোটবুকৰ কপি আৰু গ’ডেলৰ বিষয়ে তেওঁ লিখা ছখন কিতাপ দিলে। তাৰ পিছত এটা অবিশ্বাস্য ঘটনা ঘটিল! মানুহে যিটো কাম কৰিবলৈ কেইবাবছৰ সময় লাগিলহেঁতেন, ক্ল’ডে মাত্ৰ কেইদিনমানৰ ভিতৰতে সমগ্ৰ নথিৰ ৬৫০ পৃষ্ঠাৰ এক বিশদ ব্যাখ্যা প্ৰস্তুত কৰি দিলে।
ইয়াৰ পৰা দেখা যায় যে গ’ডেলে শ শ গাণিতিক উপপাদ্য প্ৰমাণ কৰিছিল যিবোৰ আগতে কোনেও নাজানিছিল। ইতিমধ্যে তেওঁ চল্লিশৰ দশকতেই সত্তৰৰ দশক আৰু আশীৰ দশকত আৱিষ্কাৰ হোৱা বহু গাণিতিক ফলাফলৰ ইংগিত দিছিল। ইয়াৰ উপৰিও তাত যুক্তিবিদ্যাৰ ১৪টা নতুন বিষয় পোৱা গৈছে, যিবোৰৰ ওপৰত আজিলৈকে কোনো গৱেষণা হোৱা নাই।
