নিউজিলেণ্ডৰ ৱেলিংটনত ১৯ নৱেম্বৰৰ পৰা আৰম্ভ হোৱা প্ৰথমখন টেষ্ট মেচত ভাৰতীয় দলৰ মূল একাদশত বেগী বলাৰ মহম্মদ ছিৰাজক স্থান নিদিয়াৰ বিষয়টোৱে ভাৰতত ৰাজনৈতিক বিতৰ্কৰ ৰূপ লৈছে। উত্তৰ প্ৰদেশৰ চাহাৰানপুৰৰ কংগ্ৰেছ সাংসদ ইমৰান মাছুদে সংবাদ সংস্থা এএনআইৰ সৈতে হোৱা বাৰ্তালাপত ছিৰাজক দলৰ পৰা বাদ দিয়াৰ আঁৰত বৈষম্য থকাৰ অভিযোগ উত্থাপন কৰিছে। সাংসদগৰাকীৰ এই মন্তব্যৰ পাছতেই সামাজিক মাধ্যমৰ লগতে ৰাজনৈতিক মহলতো তীব্ৰ প্ৰতিক্ৰিয়াৰ সৃষ্টি হৈছে আৰু বিজেপিয়ে এই প্ৰসংগত কংগ্ৰেছ তথা ইমৰান মাছুদক উভতি ধৰিছে।
সংবাদ সংস্থা এএনআইৰ আগত কংগ্ৰেছ সাংসদ ইমৰান মাছুদে কয় যে ভাল প্ৰদৰ্শন কৰাৰ পাছতো মহম্মদ ছিৰাজক দলত স্থান দিয়া হোৱা নাই বুলি চৰ্চা চলিছে। তেওঁ অভিযোগ কৰে যে ছিৰাজৰ নাম ‘ছিৰাজ’ হোৱাৰ বাবেই তেওঁক দলত স্থান দিয়া হোৱা নাই। মাছুদে লগতে মন্তব্য কৰে যে ভাল প্ৰদৰ্শন আগবঢ়োৱাৰ পাছতো যদি কোনো খেলুৱৈক নিৰ্বাচিত কৰা নহয়, তেন্তে তাত বৈষম্য স্পষ্টভাৱে পৰিলক্ষিত হয়। সাংসদগৰাকীৰ এই বক্তব্য ৰাজহুৱা হোৱাৰ লগে লগেই সামাজিক মাধ্যমত নতুন বিতৰ্কৰ সূত্ৰপাত ঘটিছে। ইয়াৰ প্ৰত্যুত্তৰত বিজেপিয়েও কংগ্ৰেছ দল আৰু ইমৰান মাছুদৰ বিৰুদ্ধে প্ৰত্যাক্ৰমণ চলাইছে।
উল্লেখযোগ্য যে ১৯ নৱেম্বৰৰ পৰা নিউজিলেণ্ডৰ বিৰুদ্ধে আৰম্ভ হোৱা এই প্ৰথমখন টেষ্ট মেচত ভাৰতীয় দলে চাৰিগৰাকী বেগী বলাৰক লৈ খেলপথাৰত নমাৰ সিদ্ধান্ত গ্ৰহণ কৰিছিল। দলটোৰ মূল একাদশত বেগী বলাৰ হিচাপে যশপ্ৰীত বুমৰাহৰ লগতে প্ৰসিদ্ধ কৃষ্ণা, আকাশ দীপ আৰু যুৱ বেগী বলাৰ অংশুল কম্বোজক অন্তৰ্ভুক্ত কৰা হয়। ইয়াৰ বিপৰীতে স্পিনাৰ হিচাপে দলত স্থান লাভ কৰে ৱাশ্বিংটন সুন্দৰ আৰু ৰবীন্দ্ৰ জাদেজাই। চলিত বিশ্ব টেষ্ট চেম্পিয়নশ্বিপ চক্ৰত ভাৰতৰ হৈ সৰ্বাধিক উইকেট দখল কৰা বলাৰ হোৱা সত্ত্বেও মূল একাদশত মহম্মদ ছিৰাজৰ নাম নথকা বিষয়টোৱে ক্ৰীড়াপ্ৰেমীসকলকো কিছু আচৰিত কৰি তোলে।
আনহাতে, মেচখনৰ টছৰ সময়তে ভাৰতীয় দলৰ অধিনায়ক শুভমন গিলে মহম্মদ ছিৰাজ আৰু গুৰনূৰ ব্ৰাৰক মূল একাদশৰ পৰা বাহিৰত ৰখাটো এক কঠিন সিদ্ধান্ত আছিল বুলি স্বীকাৰ কৰিছিল। দুয়োগৰাকী বলাৰে এদিনীয়া শৃংখলাত ভাল প্ৰদৰ্শন আগবঢ়াইছিল বাবেই তেওঁলোকক বাদ দিয়াৰ সিদ্ধান্ত লোৱাটো সহজ নাছিল বুলি গিলে উল্লেখ কৰিছিল। বৰ্তমান ভাৰতৰ পৰা বহু দূৰৈত নিউজিলেণ্ডৰ মাটিত টেষ্ট মেচখন চলি থকাৰ মাজতে খেলুৱৈ নিৰ্বাচনক কেন্দ্ৰ কৰি দেশত আৰম্ভ হোৱা এই ৰাজনৈতিক বিতৰ্কই ব্যাপক চৰ্চা লাভ কৰিছে।





