উত্তৰ কাছাৰ পাৰ্বত্য স্বায়ত্ত শাসিত পৰিষদ নিৰ্বাচনৰ কাৰনে সাজু হৈছে চৰকাৰ। ৰাজ্যিক নিৰ্বাচন আয়োগৰ পৰা পৰিষদীয় নিৰ্বাচনৰ খচৰা ভোটাৰ তালিকা প্ৰকাশৰ কাৰনে যোৱা বুধবাৰে ৰাজ্যিক নিৰ্বাচন আয়োগৰ নিৰ্বাচনী আয়ুক্ত এইচ এন বৰাই এক নিৰ্দেশ জাৰি কৰে।
আনহাতে, যোৱা ৩ জুন তাৰিখেই উত্তৰ কাছাৰ পাৰ্বত্য স্বায়ত্ত শাসিত পৰিষদৰ কাৰ্যকালৰ ম্যাদ উকলি গৈছে। কিন্তু ৰাষ্ট্ৰীয় নাগৰিক পঞ্জীৰ উন্নীতকৰণৰ কাম চলি থকা কাৰনে ৰাজ্যপালে পৰিষদৰ কাৰ্যকাল ছ’মাহ বৃদ্ধি কৰে।
ইয়াৰ মাজতে পৰিষদৰ প্ৰাক্তন চিইএম সমৰজিৎ হাফলংবাৰে গুৱাহাটী উচ্চ ন্যায়ালয়ত এক ৰাজহুৱা স্বাৰ্থজড়িত আবেদন দাখিল কৰে। চলিত মাহৰ ১৭ তাৰিখে ইয়াৰ প্ৰথম শুনানি আছিল। কিন্তু ৰাজ্য চৰকাৰৰ ফালৰ পৰা কোনো উপস্থিত নথকাত অহা ২৫ জুলাইত দ্বিতীয় শুনানিৰ দিন ধাৰ্য কৰা হয়।
এনে পৰিস্থিতিত ২৬ জুলাইত পৰিষদৰ নিৰ্বাচনৰ ভোটাৰ তালিকাৰ খচৰা তালিকা প্ৰকাশ কৰা হ’ব। ২৭ জুলাইৰ পৰা ১০ আগষ্টলৈ ৰাইজে দাবী তথা ওজৰ-আপত্তি দাখিল কৰিব পাৰিব। ১৩ আগষ্টৰ পৰা ২৪ আগষ্টৰ ভিতৰত ওজৰ আপত্তিসমূহ নিষ্পত্তি কৰা হ’ব আৰু ৩০ আগষ্টত চুড়ান্ত ভোটাৰ তালিকা প্ৰকাশ কৰা হ’ব।
এনে পৰিপ্ৰেক্ষিতত ছেপ্টেম্বৰ মাহতেই উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচন অনুষ্ঠিত হোৱাৰ সম্ভাৱনা প্ৰকট হৈ পৰিছে।
