এন আৰ চিৰ বাবে ‘সম্পৰ্ক স্থাপন’ৰ বহু প্ৰমাণপত্ৰ উপলব্ধ নোহোৱাৰ অভিযোগ এ আই য়ু ডি এফৰ

ৰাষ্ট্ৰীয় নাগৰিকপঞ্জীৰ চূড়ান্ত খচৰাত বাদ পৰা প্ৰায় ৪০ লাখ লোকৰ ওজৰ-আপত্তি দেখুৱাবৰ ক্ষেত্ৰত এইসকল লোকক নথি-পত্ৰই অসুবিধাত পেলোৱাৰ অভিযোগ উত্থাপন কৰিছে এ আই য়ু ডি এফে।

দলটোৰ মতে এই লোকসকলে পৰিয়ালৰ আন লোকৰ সৈতে সম্পৰ্ক স্থাপনৰ বাবে প্ৰদান কৰিব লগীয়া নথি উপলব্ধ নোহোৱাৰ ফলত বিপদত পৰিছে।

১৪ আগষ্টত এ আই য়ু ডি এফৰ সাধাৰণ সম্পাদক আমিনুল ইছলামে দলটোৰ কেন্দ্ৰীয় কাৰ্যালয়ত এখন সংবাদমেল অনুষ্ঠিত কৰি এই অভিযোগ উত্থাপন কৰে।

তেওঁ কয়, “১৯৭১ চনৰ বহু আগৰ পৰা থকা বহু লোকৰ সম্পৰ্ক দেখুৱলৈ supporting documents চৰকাৰে উপলব্ধ কৰি দিয়া নাই। কিছুমান নথি technically availably কৰি নিদিয়াৰ ফলত ১৯৭১ চনৰ আগৰ নথি থকাৰ পাছতো তেওঁলোকে সেই নথি আহৰণ কৰি জমা দিব পৰা নাই।”

তেওঁ কয় যে supporting documents হিচাপে বিদ্যালয়ৰ প্ৰমাণপত্ৰ দিব পাৰি যদিও বহু ঠাইত বিদ্যালয় পৰিদৰ্শককে ধৰি অন্যান্য শিক্ষা বিষয়াই counter signature কৰা নাই। যাৰ ফলত বিদ্যালয়ৰ প্ৰমাণপত্ৰ দাখিল কৰিব পৰা নাই।

ঠিক তেনেকৈ ১৯৭১ চনৰ আগৰ ভোটাৰ তালিকা বিভিন্ন জিলাত উপলব্ধ নহয় বুলি জানিবলৈ দিয়ে। ভোটাৰ তালিকা উপলব্ধ নোহোৱাৰ ফলত বহু লোকে পৰিয়ালৰ লগত সম্পৰ্ক স্থাপনৰ ক্ষেত্ৰত অসুবিধাৰ সন্মুখীন হৈছে বুলি ইছলামে জানিবলৈ দিয়ে।

জন্ম-মৃত্যুৰ পঞ্জীয়কৰ পৰা জন্মৰ প্ৰমাণপত্ৰ বহুলোকে সময়ত সংগ্ৰহ নকৰি পলমকৈ উলিওৱা প্ৰমানপত্ৰসমূহ এন আৰ চি কৰ্তৃপক্ষই গ্ৰহণ নকৰাৰো অভিযোগ উত্থাপন কৰে।

তেওঁ কয়, “জন্মৰ প্ৰমাণপত্ৰ সংগ্ৰহ কৰোতে কাৰোবাৰ পলম হ’ব পাৰে। তাৰ বাবে কিবা জৰিমনা হ’ব পাৰে। কিন্তু তাৰ বাবে সেই প্ৰমানপত্ৰ গ্ৰহণ নকৰিব আৰু এন আৰ চিত নাম নাহিব এনে হ’ব নোৱাৰে।”

ইয়াৰ উপৰি বিভিন্ন স্থানত মাটিৰ পঞ্জীয়ন নথি উপলব্ধ নোহাৱা আৰু ২০১১ চনৰ অৰ্থনৈতিক পিয়লৰ তথ্য ‘অনলাইন’ নোহোৱাৰ ফলতো অসুবিধাৰ সৃষ্টি হোৱা বুলি তেওঁ মন্তব্য কৰে।

তেওঁ কয় যে এই নথিসমূহ ‘অনলাইন’ যোগে উপলব্ধ হ’লে পৰিয়ালৰ সৈতে ‘সম্পৰ্ক স্থাপন’ৰ অসুবিধাসমূহ দূৰ হ’ব।

একেখন সংবাদমেলতে আমিনুল ইছলামে এন আৰ চিৰ চূড়ান্ত খচৰাখন অসমীয়া বা বাংলা ভাষাত প্ৰকাশ কৰা কথাটোৰো বিৰোধিতা কৰে। তেওঁ কয়, “আমাৰ ভাষাৰ এটা আৱেগ আছে সেইটো ভাল কথা। কিন্তু যিহেতু এইখন ৰাষ্ট্ৰীয় নাগৰিকপঞ্জী গতিকে ইয়াক আঞ্চলিক ভাষাত প্ৰকাশ কৰাৰ ফলত আন ৰাজ্যত দেখুৱাবলগীয়া হ’লে ইয়াক বুজি নাপাব।”

তেওঁ এইক্ষেত্ৰত মেঘালয়ৰ একাংশ ছাত্ৰ সংগঠনে মেঘালয়লৈ যোৱা লোকৰ এন আৰ চিৰ খচৰাত নাম আছে নে নাই তাৰ পৰীক্ষাৰ নামত হাৰাশাস্তি প্ৰদান কৰাৰ প্ৰসংগ উত্থাপন কৰি কয় যে মেঘালয়তে অসমীয়া ভাষাত থকা এন আৰ চিৰ খচৰা বুজি নোপোৱা বাবে তেওঁলোকে অসমীয়াত কিয় প্ৰকাশ কৰা হৈছে বুলি প্ৰশ্ন উত্থাপন কৰিছে, গতিকে আন উত্তৰ-পূৰ্বাঞ্চলৰ বাহিৰত আৰু অসুবিধা হ’ব।

ইয়াৰ উপৰি মেঘালয়ৰ ছাত্ৰ সংগাঠনৰ সমান্তৰালকৈ এন আৰ চি প্ৰকাশ নহওঁতেই নাগালেণ্ডত উত্তৰ-পূব ছাত্ৰ সংস্থা (নেছ’)ই বহিৰাগতক ওলাই যাবলৈ ৫০ দিনৰ সময়সীমা বান্ধি দিয়া আৰু অৰুণাচল প্ৰদেশত একাংশ সংগঠনে ১৬ আগষ্টৰ পাছৰ পৰা বহিৰাগতৰ বিৰুদ্ধে অভিযান আৰম্ভ কৰিব বুলি লোৱা সিদ্ধান্তৰ বিৰোধিতা কৰে।