নগাঁও জিলাৰ চামগুৰিৰ ৯৩২ নং ভৰাগুৰি প্ৰাথমিক বিদ্যালয়ৰ ছাত্ৰ-ছাত্ৰীসকলক টীকাকৰণ দিয়াৰ উদ্দেশ্যেৰে মঙলবাৰে বিদ্যালয়খনত উপস্থিত হৈছিল পুৰণিগুদাম ৰাজ্যিক চিকিৎসালয়ৰ অধীনৰ এটা চিকিৎসা কৰ্মীৰ দল। আৰু তাৰ পাছতে বিদ্যালয়খনত সৃষ্টি হৈছিল এক অভাৱনীয় পৰিস্থিতিৰ।
উল্লেখযোগ্য যে চিকিৎসা কৰ্মীৰ দলটোৱে বিদ্যালয়খনৰ ছাত্ৰ-ছাত্ৰীসকলক বিভিন্ন ৰোগৰ পৰা পৰিত্ৰাণ পাব পৰাকৈ মিজিলচ্ আৰু ৰুবেলা টীকাকৰণৰ প্ৰস্তুতি আৰম্ভ কৰোতেই বিভিন্ন অজুহাত দেখুৱাই একাংশ অভিভাৱকে টীকাকৰণ নকৰাকৈয়ে বিদ্যালয়খনৰ পৰা লৈ যায় নিজৰ নিজৰ সন্তানক।
স্বাস্থ্য বিভাগৰ নিৰ্দেশনা অনুযায়ী দিব লগীয়া এইসমূহ ভেকচিন বেজী ল’লে অনাকাংক্ষিতভাৱে কোনো বিপদত পৰিব বুলি আশংকা কৰিয়ে অভিভাৱক সকলে নিজৰ নিজৰ সন্তানক টীকাকৰণ কৰাৰ পৰা বিৰত ৰাখিছে বুলি সদৰি কৰে চিকিৎসা কৰ্মীৰ দলটোৱে।
ইফালে সকলো উৰা-বাতৰি পৰিহাৰ কৰি ৯ মাহৰ পৰা ১৫ বছৰ পৰ্যন্ত সকলো শিশুক এই টীকা প্ৰদান কৰিবলৈ অভিভাৱক সকলক চিকিৎসা কৰ্মীৰ দলটোৱে আহ্বান জনায়।
