জৰাজীৰ্ণ পথ মেৰামতিৰ দাবীত আজি সোণাৰিত অসম জাতীয়তাবাদী যুৱ ছাত্ৰ পৰিষদৰ ভজো আঞ্চলিক সমিতিয়ে ২ ঘণ্টীয়া পথ অৱৰোধৰ কাৰ্যসূচী গ্ৰহণ কৰে।
উল্লেখযোগ্য যে সোণাৰিৰ পৰা ভজো হৈ মৰাণ, ডিব্ৰুগড় আদিলৈ যাতায়াত কৰাৰ বাবে এই পথটি চৰাইদেউৰ জিলাৰ এটা অতি গুৰুত্বপূৰ্ণ পথ।
আনহাতে এই পথটিৰে দৈনিক বহু লোক ডিব্ৰুগড় মেডিকেললৈ আহ-যাহ কৰাৰ উপৰিও স্থানীয় ছাত্ৰ-ছাত্ৰী সকলো এই পথেৰেই সোণাৰিৰ শিক্ষানুষ্ঠানলৈ অহা-যোৱা কৰে।
মন কৰিব লগীয়া কথা যে এই গুৰুত্বপূৰ্ণ পথটোৰ জৰাজীৰ্ণ ৰূপৰ বাবে বৰ্তমান এই পথটো যাতায়াতৰ অনুপযোগী হৈ পৰিছে। আৰু এই পথৰ জৰাজীৰ্ণ ৰূপৰ একমাত্ৰ কাৰণ হ’ল এই পথেৰে দৈনিক অতিৰিক্তভাৱে বোজাই কৰা ১২/১৮ চকীয়া চিমেণ্ট, শিল, বল্ডাৰ কঢ়িওৱা ডাম্পাৰ, ট্ৰাক আদিৰ চলাচল।
ইফালে আজি এবছৰ আগৰ পৰাই পথটোৱে জৰাজীৰ্ণ ৰূপ ধাৰণ কৰি পথৰ ওপৰত পুখুৰী সদৃশ গাঁতৰ সৃষ্টি হোৱাত বহু দল-সংগঠনৰ লগেত স্থানীয় ৰাইজে বিভাগীয় কৰ্তৃপক্ষক বহুবাৰ পথটি মেৰামতিৰ বাবে দাবী জনাই আহিছিল। কিন্তু বিভাগীয় কৰ্তৃপক্ষই এই ক্ষেত্ৰত এতিয়ালৈকে কোনো ধৰণৰ ব্যৱস্থা গ্ৰহণ নকৰিলে।
পৰিতাপৰ কথা যে কিছুদিন পূৰ্বে ৰাজ্য চৰকাৰৰ গড়কাপ্তানি মন্ত্ৰী গৰাকীৰ চৰাইদেউ আগমনৰ প্ৰাকক্ষণত পথটি মেৰামতিৰ বাবে কিছু পুঁজি মোকলাই দিয়া হৈছিল।
কিন্তু সোণাৰিৰ পৰা টীয়ক দলঙলৈকে মাত্ৰ কেইটামান চেণ্ডগ্ৰেভেল ছটিয়াই বিভাগীয় বিষয়া আৰু ঠিকাদাৰে ধন আত্মসাৎ কৰা বুলি অভিযোগ উত্থাপন কৰে।
যাৰ ফলত আজি অসম জাতীয়তাবাদী যুৱ ছাত্ৰ পৰিষদৰ ভজো আঞ্চলিক সমিতিয়ে পথ অৱৰোধৰ দৰে কাৰ্যসূচী গ্ৰহণ কৰিবলৈ বাধ্য হয়। আৰু সংগঠনটোৱে চৰাইদেউৰ জিলা উপায়ুক্তক এখন স্মাৰকপত্ৰ প্ৰদান কৰে।
লগতে অহা ১০ দিনৰ ভিতৰত এই জৰাজীৰ্ণ পথটি মেৰামতি নকৰিলে অনাগত দিনত ইয়াতকৈও ভয়াৱহ আন্দোলন গঢ়ি তুলবি বুলি হুংকাৰ দিয়ে।
জৰাজীৰ্ণ পথ মেৰামতিৰ দাবীত আজি সোণাৰিত অসম জাতীয়তাবাদী যুৱ ছাত্ৰ পৰিষদৰ ভজো আঞ্চলিক সমিতিয়ে ২ ঘণ্টীয়া পথ অৱৰোধৰ কাৰ্যসূচী গ্ৰহণ কৰে।
