অসমৰ যুৱ শ্বুটাৰ হৃদয় হাজৰিকাই দক্ষিণ কোৰিয়াত অনুষ্ঠিত হ’ব লগা ৫২ সংখ্যক আই এছ এফ বিশ্ব শ্বুটিং চেম্পিয়নশ্বীপত ভাগ লোৱাৰ উদ্দেশ্য সোমবাৰে নতুন দিল্লীৰ পৰা দক্ষিণ কোৰিয়ালৈ ৰাওনা হৈছে।
প্ৰতিভাৱান যুৱ শ্বুটাৰ তথা ভাৰতীয় জুনিয়ৰ দলৰ শীৰ্ষ খেলুৱৈজনে বিশ্ব চেম্পিয়নশ্বীপত জুনিয়ৰৰ ব্যক্তিগত, দলীয় আৰু মিক্সড শাখাত ভাৰতক প্ৰতিনিধিত্ব কৰিব।
উল্লেখ্য যে ইতিমধ্যে নিজৰ প্ৰতিভাৰ উমান দি যোৱা ২৫ জুনত হৃদয় হাজৰিকাই জাৰ্মানীৰ শ্বুলত অনুষ্ঠিত হোৱা আই এছ এছ এফ জুনিয়ৰ বিশ্বকাপ শ্বুটিঙত ১০ মিটাৰ এয়াৰ ৰাইফল ইভেণ্টত ব্যক্তিগত আৰু দলীয় শাখাত সোণৰ পদক অৰ্জন কৰিছে।
ইয়াৰ উপৰি যোৱা জুলাই মাহত চেক গণৰাজ্যৰ পিলজেনত অনুষ্ঠিত আন্তঃৰাষ্ট্ৰীয় শ্বুটিং প্ৰতিযোগিতাতো জুনিয়ৰ শাখাত ব্ৰঞ্জ পদক অৰ্জন কৰিবলৈ সক্ষম হৈছিল হৃদয় হাজৰিকা।
প্ৰচুৰ সম্ভাৱণাপূৰ্ণ এইগৰাকী যুৱ শ্বুটাৰৰ ধাৰাবাহিক সফলতাত গৃহভূমি লখিমপুৰ জিলাৰ নাৰায়ণপুৰবাসী আনন্দত আত্মহাৰা হোৱা দেখিবলৈ পোৱা যায়।
